കാണ്ഡഹാർ ജയിൽ ആക്രമിച്ച് കീഴടക്കി താലിബാൻ; ആയിര കണക്കിന് തടവുകാരെ തുറന്നുവിട്ടു; കാബൂളിലേക്ക് ഉള്ള മുന്നേറ്റം തുടരുമ്പോൾ അഫ്ഗാനിസ്ഥാന്റെ 65 ശതമാനം അവർ കൈയടക്കി എന്ന് യൂറോപ്യൻ യൂണിയൻ; എട്ട് പ്രവിശ്യ തലസ്ഥാനങ്ങൾ നിയന്ത്രണത്തിൽ; അഷ്റഫ് ഗനി പ്രാദേശിക സേനകളെ കൂട്ടി ചെറുത്ത് നിൽപ്പിന് വട്ടം കൂട്ടുന്നു എങ്കിലും മേൽക്കൈ നേടി എതിരാളികൾ
ന്യൂഡൽഹി; താലിബാൻ കാണ്ഡഹാറിലെ സെൻട്രൽ ജയിൽ പിടിച്ചെടുത്തു. നൂറുകണക്കിന് തടവുകാരെ തുറന്നുവിട്ടു. താലിബാൻ വക്താവ് ഖാരി യൂസഫ് അഹ്മദിയാണ് ഇക്കാര്യം സ്ഥിരീകരിച്ചത്.സർപോസ ജയിൽ എന്നും അറിയപ്പെടുന്ന കാണ്ഡഹാർ ജയിലിൽ നിന്ന് താലിബാൻ കുറ്റവാളികളെ വിട്ടയ്ക്കുന്നത് ഇതാദ്യമല്ല. 2008 ലും 2011 ലും സമാനരീതിയിൽ കാണ്ഡഹാർ ജയിൽ ആക്രമിച്ചിരുന്നു.
തങ്ങളെ മോചിപ്പിച്ചതിനെ തടവുകാർ സ്വാഗതം ചെയ്‌തെന്നും താലിബാൻ വക്താവ് അറിയിച്ചു. കാബൂളിൽ, പ്രസിഡന്റ് അഷ്റഫ് ഗനിയുടെ ഭരണകൂടത്തെ പുറത്താക്കാൻ ഉള്ള മുന്നേറ്റത്തിൽ പ്രവിശ്യകൾ തോറും കീഴടക്കി വരികയാണ് അവർ. കഴിഞ്ഞ ആഴ്ചകളിൽ 3000 ത്തോളം താലിബാൻ അംഗങ്ങളെ കാണ്ഡഹാർ ജയിലിൽ നിന്ന് അഫ്്ഗാൻ സർക്കാർ മാറ്റിയിരുന്നു. എന്നിരുന്നാലും ആയിരക്കണക്കിന് തടവുകാർ ഇവിടെ ഇപ്പോഴും തടങ്കലിൽ കഴിയുന്നുണ്ട്.
താലിബാൻ ഇപ്പോൾ അഫ്ഗാനിസ്ഥാന്റെ 65 ശതമാനം കൈയടക്കിയെന്ന് ഒരു യൂറോപ്യൻ യൂണിയൻ വക്താവ് അറിയിച്ചു. വടക്കൻ പ്രവിശ്യയായ ബാഗ്ലന്റെ തലസ്ഥാനമായ പുൽ ഇ ഖുംറിയുടെ നിയന്ത്രണം ഏറ്റെടുത്തതോടെയാണ് യൂണിയന്റെ പ്രസ്താവന വന്നത്.
അതേസമയം, താലിബാൻ 90 ദിവസത്തിനകം കാബുൾ പിടിച്ചടക്കുമെന്ന് യുഎസ് ഇന്റലിജൻസ്. 30 ദിവസത്തിനകം അവർ കാബൂൾ നഗരം വളയും. റോയിട്ടേഴ്‌സാണ് ഇക്കാര്യം റിപ്പോർട്ട് ചെയ്തത്. എന്നാൽ, ഇത് അന്തിമ വാക്കല്ല. അഫ്ഗാൻ സുരക്ഷാ സേന എത്രത്തോളം ചെറുത്തുനിൽക്കുന്നോ, അത്രയും പിടിച്ചടക്കൽ വൈകിയേക്കാം.
എട്ട് പ്രവിശ്യ തലസ്ഥാനങ്ങൾ താലിബാന്റെ കീഴിലായെന്ന് റിപ്പോർട്ടുകൾക്കിടെയാണ് യുഎസ് ഇന്റലിജൻസിന്റെ മുന്നറിയിപ്പ് വരുന്നത്. ഫറ, ബഗ്ലനിലെ പുൽ ഇ ഖുംനി എന്നീ നഗരങ്ങളാണ് ഇനി താലിബാൻ കീഴടക്കാനുള്ളത്. വെള്ളിയാഴ്ചയ്ക്ക് ശേഷം താലിബാന്റെ അധീനതയിലായത് വടക്കൻ മേഖലയിലെ ആറ് പ്രവിശ്യകളാണ്. നിലവിൽ, മേഖലയിലെ ഏറ്റവും വലിയ നഗരമായ മസാർ ഇ ഷെരീഫിലാണ് താലിബാൻ കണ്ണുവച്ചിരിക്കുന്നത്. കൂടുതൽ മേഖലകൾ ശത്രുപക്ഷത്തായതോടെ അഫ്ഗാൻ പ്രസിഡന്റ് അഷ്രഫ് ഗനി സൈനിക മേധാവിയെ മാറ്റിയതായി റിപ്പോർട്ടുണ്ട്. അതിനിടെ, മസാരെ ഷെരീഫിലേക്ക് പറന്ന് അഫ്ഗാനിസ്ഥാൻ പ്രസിഡന്റ് അഷ്റഫ് ഗാനി ഞെട്ടിച്ചു. നാലു ഭാഗത്തുനിന്നുമുള്ള താലിബാൻ ആക്രമണം നേരിടുന്ന അഫ്ഗാൻ സൈന്യത്തിനു പിന്തുണ നൽകാനാണ് പ്രസിഡന്റ് നേരിട്ട് മസാരെ ഷെരീഫിലേക്ക് എത്തിയത്.
സുരക്ഷാ സേനയ്ക്കൊപ്പം അണിനിരക്കണമെന്ന് പ്രാദേശിക സേനകളോട് പ്രസിഡന്റ് അഷ്റഫ് ഗാനി അഭ്യർത്ഥിച്ചിരുന്നു. ഫൈസാബാദ് താലിബാൻ കീഴടക്കിയതിനു പിന്നാലെയാണ് അഷ്റഫ് ഗനി മസാരെയിൽ എത്തിയത്. മസാരെയിലെ കരുത്തനായ അറ്റാ മുഹമ്മദ് നൂറുമായും യുദ്ധപ്രഭുവായ അബ്ദുൽ റഷീദ് ദോസ്തവുമായും പ്രസിഡന്റ് ചർച്ച നടത്തി.മസാരെ ഷെരീഫ് വീഴുന്നത് ഗനി ഭരണകൂടത്തിന് കനത്ത തിരിച്ചടിയായിരിക്കും. മസാരെയുടെ കിഴക്കുള്ള ഫൈസാബാദ് നഗരം കഴിഞ്ഞ ദിവസം താലിബാൻ പിടിച്ചെടുത്തിരുന്നു. കാണ്ഡഹാറിലും ഹെൽമന്ദിലും പൊരിഞ്ഞ പോരാട്ടമാണ് താലിബാനുമായി നടക്കുന്നത്.
ഇന്ത്യക്കാർ അഫ്ഗാൻ വിടണമെന്ന് കേന്ദ്രസർക്കാർ
യുദ്ധം രൂക്ഷമായതോടെ അഫ്ഗാനിലെ മസാരെ ഷെരീഫിലെ ഇന്ത്യൻ കോൺസുലേറ്റ് അടച്ചിരുന്നു. നയതന്ത്ര ഉദ്യോഗസ്ഥരോടും ഇന്ത്യൻ പൗരന്മാരോടും തിരിച്ചുപോരാൻ നിർദ്ദേശിച്ച ഇന്ത്യ ഇവരെ എത്തിക്കാൻ പ്രത്യേക സേനാവിമാനം അയയ്ക്കുകയും ചെയ്തു. ഇതോടെ തലസ്ഥാനമായ കാബൂളിലെ എംബസി ഒഴികെ അഫ്ഗാനിലെ എല്ലാ ഇന്ത്യൻ നയതന്ത്ര ഓഫിസുകളും അടച്ചു. വാണിജ്യ വിമാനങ്ങൾ സർവീസ് അവസാനിപ്പിക്കും മുമ്പ് നാട്ടിലേക്ക് മടങ്ങാനാണ് ഇന്ത്യക്കാർക്ക് ഏംബസി നൽകിയിരിക്കുന്ന ഉപദേശം.
20 വർഷത്തെ കോട്ടം തീർക്കാൻ താലിബാൻ
അതിനിടെ, യുദ്ധം ഒഴിവാക്കുന്ന കാര്യം താലിബാനുമായി ചർച്ച ചെയ്യാൻ യുഎസ് പ്രതിനിധി സൽമയ് ഖലീൽസദ് ദോഹയിലെത്തി. യുഎൻ, യൂറോപ്യൻ യൂണിയൻ പ്രതിനിധികളും ചൈന, പാക്കിസ്ഥാൻ, ഉസ്ബെക്കിസ്ഥാൻ എന്നീ രാജ്യങ്ങളുടെ നയതന്ത്ര പ്രതിനിധികളും പങ്കെടുക്കും.
സമാധാന ചർച്ചകളോട് താലിബാൻ പൊതുവെ മുഖം തിരിച്ചിരിക്കുകയാണ്.
20 വർഷംമുമ്പ് തങ്ങളെ പുറത്താക്കിയതിന്റെ കോട്ടം തീർക്കാൻ സൈനിക വിജയം മാത്രമാണ് അവരുടെ ലക്ഷ്യം. ഈ വർഷത്തെ യുദ്ധത്തിലൂടെ മാത്രം, 3,59,000 പേർ കുടിയൊഴിക്കപ്പെട്ടു എന്നാണ് യുഎൻ കുടിയേറ്റ സംഘടന ചൊവ്വാഴ്ച വ്യക്തമാക്കിയത്.
