തനിക്ക് ജയിലില്‍ കിടക്കാന്‍ താല്‍പ്പര്യമില്ലെന്ന് പൊട്ടിത്തെറിച്ച് സിപിഎം അംഗം; ടെന്‍ഡര്‍ വിളിക്കാതെ സദ്യാ സാധനങ്ങള്‍ വാങ്ങുന്നത് അഴിമതിയാകും; വിയോജന കുറിപ്പ് എഴുതി അഡ്വ സന്തോഷ്; ബിനോയ് വിശ്വത്തിന് പരാതി നല്‍കി കെ രാജു; ശബരിമലയിലെ 'സദ്യ നല്‍കലില്‍' തിരുവിതാംകൂര്‍ ദേവസ്വം ബോര്‍ഡില്‍ തീരുമാനമായില്ല; ജയകുമാര്‍ നേരിട്ടത് കടുത്ത പ്രതിരോധം; സ്റ്റോര് പര്‍ച്ചേസ് റൂള്‍ അട്ടിമറിക്കുന്നത് വിവാദത്തില്‍
തിരുവനന്തപുരം: ശബരിമലയിലെ 'സദ്യ നല്‍കലില്‍' തിരുവിതാംകൂര്‍ ദേവസ്വം ബോര്‍ഡില്‍ തീരുമാനമായില്ല. പ്രസിഡന്റ് കെ ജയകുമാറിന്റെ നിര്‍ദ്ദേശങ്ങളോട് മറ്റ് രണ്ട് ബോര്‍ഡ് അംഗങ്ങള്‍ വിയോജിച്ചു. ടെന്‍ഡറൊന്നും വിളിക്കാതെ സദ്യയിലേക്ക് പോകുന്നതിനെ സിപിഎം അംഗം എതിര്‍ത്തു. തനിക്ക് ജയിലില്‍ കിടക്കാന്‍ താല്‍പ്പര്യമില്ലെന്നാണ് ബോര്‍ഡ് യോഗത്തില്‍ സിപിഎം അംഗം അഡ്വ പിഡി സന്തോഷ് കുമാര്‍ ആഞ്ഞടിച്ചത്. സ്റ്റോര് പര്‍ച്ചേസ് റൂളിന് വിരുദ്ധമായൊന്നും ചെയ്യാനാകില്ലെന്നാണ് സന്തോഷ് കുമാറിന്റെ പക്ഷം. സിപിഐ അംഗവും മുന്‍മന്ത്രിയുമായ കെ രാജുവും പ്രതിഷേധത്തിലാണ്. ശബരിമലയില്‍ ഏകപക്ഷീയ തീരുമാനം എടുക്കാന്‍ ആരേയും അനുവദിക്കില്ലെന്നതാണ് രാജുവിന്റെ നിലപാട്. പുതിയ ക്വട്ടേഷന്‍ ഒന്നും കൊടുക്കാതെ നിലവില്‍ സാധനം നല്‍കുന്നവരെ കൊണ്ട് സദ്യയ്ക്ക് സാധനം എത്തിക്കാനാണ് ജയകുമാറിന്റെ നീക്കം. ഇത് ഭാവിയില്‍ പ്രതിസന്ധിയാകുമെന്നാണ് ബോര്‍ഡ് അംഗങ്ങളുടെ നിലപാട്. ഇതോടെ ചൊവ്വാഴ്ച ശബരിമലയില്‍ തുടങ്ങേണ്ട സദ്യയില്‍ ആകെ ആശയക്കുഴപ്പമായി. നാളെയോടെ എല്ലാം പരിഹരിക്കാനാണ് ജയകുമാറിന്റെ തീരുമാനം. ഇനിയും സദ്യയില്‍ ഉത്തരവ് ഇറങ്ങിയിട്ടില്ല. തിങ്കളാഴ്ച ഉത്തരവ് ഇറങ്ങിയാല്‍ മാത്രമേ ചൊവ്വാഴ്ച സദ്യ നല്കാന് കഴിയൂ. അതിനിടെ സദ്യയുടെ മെനു മാറ്റുന്നതില്‍ പ്രശ്‌നമൊന്നും ഉണ്ടാകില്ലെന്ന വാദവും സജീവമാണ്. സദ്യയുമായി ബന്ധപ്പെട്ട ഫയലില്‍ സിപിഎം അംഗം വിയോജന കുറിപ്പും എഴുതി.
ദേവസ്വം ബോര്‍ഡില്‍ പ്രസിഡന്റ് കെ. ജയകുമാറിന്റെ സ്വേച്ഛാധിപത്യ ഭരണമെന്നാരോപിച്ച് കലാപക്കൊടിയുയര്‍ത്തി കെ. രാജു രംഗത്ത് എത്തികഴിഞ്ഞു. അംഗങ്ങളുമായി ആലോചിക്കാതെ ജയകുമാര്‍ ഉദ്യോഗസ്ഥ പിന്തുണയോടെ തീരുമാനമെടുക്കുന്നെന്നാണ് ആരോപണം. ഇക്കാര്യം ചൂണ്ടിക്കാട്ടി സിപിഐ സംസ്ഥാന സെക്രട്ടറി ബിനോയ് വിശ്വത്തിന് കെ. രാജു പരാതി നല്കിയതായാണ് വിവരം. അന്നദാനത്തിനു പകരമായി ഡിസംബര്‍ രണ്ടു മുതല്‍ വിഭവ സമൃദ്ധമായ കേരള സദ്യ നല്കാന് ജയകുമാര്‍ തനിച്ചു തീരുമാനിച്ചതാണ് രാജുവിനെ ചൊടിപ്പിച്ചത്. ബോര്‍ഡിലെ മൂന്നംഗങ്ങള്‍ക്കും നിയമ പ്രകാരം തുല്യാവകാശമാണ്. ബോര്‍ഡ് മീറ്റിങ് നയിക്കാനുള്ള അവകാശമല്ലാതെ പ്രസിഡന്റിന് ഒറ്റയ്ക്കു തീരുമാനിക്കാനാകില്ല. മൂന്നില്‍ രണ്ടു ഭൂരിപക്ഷം തീരുമാനങ്ങള്‍ക്കു വേണം. എതിര്‍ക്കുന്ന അംഗത്തിന്റെ വിയോജനക്കുറിപ്പോടെയാണ് തീരുമാനം ഉത്തരവാകേണ്ടത്. എന്നാല്‍ സിപിഎം പ്രതിനിധി പി ഡി. സന്തോഷിന്റെ അഭിപ്രായം പോലും പ്രസിഡന്റ് കേട്ടില്ലെന്നാണ് പരാതി. സ്വര്‍ണക്കൊള്ളയില്‍ മുഖം വികൃതമായ സര്‍ക്കാര്‍, ബോര്‍ഡില്‍ രാഷ്ട്രീയ ഇടപെടലില്ലെന്ന് ഭക്തരെ തെറ്റിദ്ധരിപ്പിക്കാനാണ് ജയകുമാറിനെ പ്രസിഡന്റാക്കിയത്. എന്നാല്‍ മറ്റു രണ്ടംഗങ്ങളും സിപിഎം, സിപിഐ നോമിനികളാണ്. ഇവര്‍ ജയകുമാറിനെതിരെ കടുത്ത നിലപാട് എടുക്കുന്നു.
ശബരിമലയില്‍ അടക്കം സാധനങ്ങള്‍ വാങ്ങുന്നതിനാണ് സ്റ്റോര് പര്‍ച്ചേസ് റൂളുള്ളത്. ഇതു പ്രകാരം ഓരോ സാധനത്തിനും ടെന്‍ഡര്‍ വിളിക്കണം. കുറഞ്ഞ തുകയില്‍ സാധനം സപ്ലൈ ചെയ്യാമെന്ന് പറയുന്നവര്‍ക്ക് നല്‍കണം. സദ്യയെന്നത് ദേവസ്വം ബോര്‍ഡ് പ്രസിഡന്റ് എടുത്ത അതിവേഗ തീരുമാനമാണ്. ഇതിന് ടെന്‍ഡര്‍ വിളിക്കാനുള്ള സമയം പോലുമില്ല. ടെന്‍ഡര്‍ വിളിക്കാതെ ശബരിമലയില്‍ പുലാവിനും മറ്റും സാധനം എത്തിക്കുന്നവരിലൂടെ സദ്യയ്ക്കുള്ള സാധനങ്ങളും എത്തിക്കാനാണ് നീക്കം. ഇലയില്ലാ സദ്യയും വിവാദത്തിലായിട്ടുണ്ട്. ഇലയില്ലാതെ നല്‍കുന്ന സദ്യയെ കേരളീയ സദ്യയെന്നും വിളിക്കാന്‍ കഴിയില്ല. കൂടിയാലോചനയില്ലാതെ തീരുമാനം എടുത്തതിന്റെ പരിണിത ഫലമാണ് ഇതെന്നാണ് വിലയിരുത്തല്‍.
കെ. ജയകുമാറിനെ നിയന്ത്രിക്കാനാണ് സാമ്പത്തികാഴിമതിയില്‍ ആരോപണ വിധേയനും കടുത്ത സിപിഎമ്മുകാരനുമായ ജി. ബിനുവിനെ പ്രൈവറ്റ് സെക്രട്ടറിയാക്കിയത്. സ്ഥാനമൊഴിഞ്ഞ പ്രസിഡന്റ് പി.എസ്. പ്രശാന്തിന്റെ പ്രൈവറ്റ് സെക്രട്ടറിയായിരുന്നു ജി. ബിനു. ബിനുവിന്റെ നിയമനം വിവാദമായിട്ടും കെ. ജയകുമാറിന് ഒന്നും ചെയ്യാനായില്ല. പ്രസിഡന്റിനു കടിഞ്ഞാണിടാനാണ് ബിനുവിനെ പുനര്‍ നിയമിച്ചത്. ഇതെല്ലാം ദേവസ്വം ബോര്‍ഡ് ഭരണത്തെ വിവാദത്തിലാക്കുന്നുണ്ട്. അതിനിടെ പുതിയ ആവശ്യവുമായി ഹിന്ദു സംഘടനകളും രംഗത്തു വന്നിട്ടുണ്ട്. : ശബരിമലയെന്നല്ല, ക്ഷേത്രങ്ങളെല്ലാം പ്രശ്നങ്ങള്‍ നേരിടുന്നു. ഇതിന് ശാശ്വത പരിഹാരം ക്ഷേത്ര പരിപാലന നിയമം മാറുക എന്നതാണ്. രാഷ്ട്രീയ നിയന്ത്രണം ഒഴിവാക്കിയുള്ള പുതിയ നിയമം വേണം. അതിന് നിയമസഭയില്‍ ഹിന്ദു വിശ്വാസികള്‍ ഉണ്ടാവണം. അതിന് ഹിന്ദു എംഎല്‍എമാര്‍ ഉണ്ടാകണം. ഹിന്ദുക്കളുടെ വന്‍ ശക്തികേന്ദ്രീകരണം ഉണ്ടാകണം, ശബരിമലയുടെ സംരക്ഷണത്തിന് എന്നും മുന്‍നിരയില്‍ നിന്നിട്ടുള്ള ബിജെപി നേതാവു കൂടിയായ കുമ്മനം രാജശേഖരന്‍ പറയുന്നു. ശബരിമലയിലെ സ്വര്‍ണ്ണക്കൊള്ള പുറം ലോകമറിയാന്‍ കാരണം സര്‍ക്കാരല്ല, കേരള പോലീസുമല്ല. അയ്യപ്പസ്വാമിയുടെ തീരുമാനമാണ്. ഇപ്പോള്‍ പുറത്തുവന്നതൊന്നുമല്ല. ഞെട്ടിക്കുന്ന, സംഭവങ്ങളുടെ വിവരങ്ങള്‍ വരാനിരിക്കുന്നതേയുള്ളുവെന്ന് കുമ്മനം പറയുന്നു.
ശബരിമല വിഷയത്തില്‍ ഇപ്പോള്‍ നടക്കുന്ന എസ്ഐടിയുടെ അന്വേഷണം മെച്ചമെന്നോ മോശമെന്നോ വിലയിരുത്താനില്ല. പക്ഷേ, ഈ അന്വേഷണത്തിലും വിശാലമായ അന്വേഷണം വരണം. സ്വര്‍ണ്ണപ്പാളി മോഷ്ടിച്ചവരെ കണ്ടെത്താനായേക്കും, പക്ഷേ മോഷണംപോയ സ്വര്‍ണ്ണം എവിടെയെന്ന് ആര്‍ക്കറിയാം. എങ്ങനെ കണ്ടെത്തും. അതിന് അന്താരാഷ്ട്ര തലത്തില്‍ അന്വേഷണം വേണ്ടിവരും. സിബിഐ പോലുള്ള ഏജന്‍സികള്‍ക്കേ അതിനു സാധിക്കൂ. അവര്‍ക്ക് ഇന്റര്‍പോളിന്റെ സഹായമുള്‍പ്പെടെ തേടാനാകും. കോടതിയുടെ മേല്‍നോട്ടത്തിലാണ് ഇപ്പോള്‍ അന്വേഷണം. വിശാല അന്വേഷണത്തിന് കോടതിയുടെ തീരുമാനം വന്നേക്കാം. പുതിയ ദേവസ്വം ബോര്‍ഡ് പ്രസിഡന്റ് കവിയാണ്, ശുദ്ധനാണ് എന്നതൊക്കെ ശരിയാണ്. പക്ഷേ, അദ്ദേഹം രാഷ്ട്രീയക്കാരുടെ സര്‍ക്കാരിന്റെ ബന്ധനത്തിലാണ്. ഒന്നും ചെയ്യാനാവില്ല. അദ്ദേഹം പറയുന്നു, ഇതുവരെ സംഭവിച്ച തെറ്റുകള്‍ ആവര്‍ത്തിക്കില്ലെന്ന്. അപ്പോള്‍ തെറ്റുകള്‍ സംഭവിച്ചുവെന്ന് സമ്മതിക്കുകയാണ്. ആ തെറ്റുകള്‍ക്ക് ആരാണ് ഉത്തരവാദിയെന്ന് അദ്ദേഹം പറയണ്ടേ. കണ്ടെത്തേണ്ടെ?-ഇതാണ് കുമ്മനം ഉയര്‍ത്തുന്ന ചോദ്യം. ദേവസ്വം ബോര്‍ഡ് പ്രസിഡന്റ് കെ ജയകുമാറിന്റെ പേഴ്‌സണല്‍ സ്റ്റാഫിലെ ആരോപണ വിധേയരെ തുടരാന്‍ അനുവദിക്കുന്നത് ശബരിമല സ്വര്‍ണ്ണക്കൊള്ളയിലെ അന്വേഷണം അട്ടിമറിക്കാനാണെന്ന് ബിജെപി നേതാവ് എന്‍. ഹരി ആരോപിച്ചിരുന്നു. സഖാവ് പിണറായി വിജയനും സഖാവ് വി എന്‍ വാസവനും ചേര്‍ന്ന് ഐഎഎസ് ഉദ്യോഗസ്ഥനായ പ്രസിഡന്റിനെ വെറും നോക്കുകുത്തിയാക്കി മാറ്റുകയാണ്. ഇതിന് മുഖ്യമന്ത്രിയുടെയും ദേവസം മന്ത്രി വി എന്‍ വാസവന്റെയും ഒത്താശ ഉണ്ടെന്ന് സംശയിക്കുന്നു. ശബരിമലയില്‍ അറസ്റ്റിലായ ഉദ്യോഗസ്ഥരുമായി വര്‍ഷങ്ങളായി ബന്ധം പുലര്‍ത്തുന്നവരാണ് ഇരുവരും. അവിടുത്തെ പലഇടപാടുകളെക്കുറിച്ചും വ്യക്തമായ ധാരണ ഇരുവര്‍ക്കും ഉണ്ടെന്നും ഹരി പറഞ്ഞു.
ശബരിമലയില്‍ സംശുദ്ധീകരണത്തിന്റെ ഭാഗമാണ് കെ ജയകുമാര്‍ ഐഎസിനെ പ്രസിഡണ്ടായി നിയമിച്ചതെങ്കില്‍ ഇത്തരം അവതാരങ്ങളെ തുടരാന്‍ അനുവദിക്കുന്നത് എന്തിനാണ്. അതിനാല്‍ എസ് ഐ ടി അന്വേഷണം സുതാര്യമായി പൂര്‍ത്തിയാക്കാന്‍ ഇത്തരത്തിലുള്ള ഉദ്യോഗസ്ഥരെ കൂടി മാറ്റേണ്ടത് അനിവാര്യമാണ്. കെ .ജയകുമാറിനെപ്പോലെ ഒരു മുതിര്‍ന്ന ഐഎഎസ് ഉദ്യോഗസ്ഥന്‍ ദേവസ്വം ബോര്‍ഡ് തലപ്പത്ത് വന്നപ്പോള്‍ പൊതുവേ സ്വാഗതം ചെയ്യപ്പെടുകയുണ്ടായി. എന്നാല്‍ അതു മറയാക്കി തങ്ങളുടെ അജണ്ട നടപ്പാക്കാന്‍ ആണ് പിണറായിയും വാസവനും ശ്രമിക്കുന്നത്. ജയകുമാറിനൊപ്പം ഉള്ള സ്റ്റാഫുകളെ കുറിച്ച് ഇതിനകം തന്നെ പൊതുസമൂഹത്തിന് ബോധ്യപ്പെട്ടിട്ടുള്ളതാണ്. എന്നിട്ടും തുടരാന്‍ അനുവദിക്കുന്നത് അത്യന്തം ദുരൂഹമാണെന്ന് ഹരി വ്യക്തമാക്കിയിരുന്നു. എന്നാല്‍ പേഴ്‌സണല്‍ സ്റ്റാഫിനെ മാറ്റാന്‍ ജയകുമാറും ശ്രമിക്കുന്നില്ലെന്നതാണ് വസ്തുത.
