കന്നഡ രാഷ്ട്രീയത്തിലെ റോക്കിഭായ്! പത്രം തൊട്ട് പപ്പടം വരെ വ്യാപിച്ചുകിടുക്കുന്ന, 2000 കോടിയിലേറെ വരുന്ന വ്യവസായ ശൃഖല; ട്രബിള്‍ഷൂട്ടറും കിങ്മേക്കറും; ഇപ്പോള്‍ മുഖ്യമന്ത്രി സ്ഥാനത്തില്‍ വഞ്ചിക്കപ്പെട്ടു; ഡി കെയെന്ന മുറിവേറ്റ സിംഹത്തിന്റെ ശ്വാസം കോണ്‍ഗ്രസിനെ വിറപ്പിക്കുമ്പോള്‍
കന്നഡ രാഷ്ട്രീയത്തിലെ റോക്കിഭായ്!
'മുറിവേറ്റ സിംഹത്തിന്റെ ശ്വാസം ഗര്‍ജ്ജനത്തേക്കാള്‍ ഭയാനകമായിരുന്നു' എന്ന കെജിഎഫ് സിനിമയിലെ മാസ് ഡയലോഗിന് സമാനമായി ഒരു വാചകം കര്‍ണ്ണാടക രാഷ്ട്രീയം കേട്ട ദിവസങ്ങളാണ് കടന്നുപോവുന്നത്.''ജഡ്ജിയായാലും, പ്രസിഡന്റായാലും, ഞാനടക്കം മറ്റാരായാലും, എല്ലാവരും പറഞ്ഞ വാക്ക് പാലിക്കണം. വാക്കാണ് ലോകശക്തി. പുറകില്‍ നില്‍ക്കുന്നവര്‍ക്ക് കസേരയുടെ വില അറിയില്ല. ആ കസേരയ്ക്ക് എന്ത് വിലയും പ്രാധാന്യവുമാണുള്ളതെന്ന് അവര്‍ക്കറിയില്ല. ഒഴിഞ്ഞ കസേര വലിച്ച് അതിലിരിക്കുന്നതിന് പകരം അവര്‍ നില്‍ക്കുകയാണ്. എല്ലാ മുതിര്‍ന്ന നേതാക്കളും ഇരിക്കുമ്പോള്‍, അവര്‍ ഇരിക്കാന്‍ കൂട്ടാക്കാതെ നില്‍ക്കുന്നു. നിങ്ങള്‍ക്ക് ഒരു കസേരയും കിട്ടില്ല, നിങ്ങള്‍ പിന്നിലായിപ്പോകും.''- കര്‍ണാടകയിലെ മാത്രമല്ല ദേശീയ തലത്തില്‍ തന്നെ കോണ്‍ഗ്രസിനെ ഞെട്ടിച്ച ഒരു പോസ്റ്റാണിത്. അത് കര്‍ണ്ണാടക ഉപമുഖ്യമന്ത്രിയും ഇന്ന് ദേശീയ രാഷ്ട്രീയത്തിലടക്കം കോണ്‍ഗ്രസിന്റെ ഏറ്റവും വലിയ ട്രബിള്‍ ഷൂട്ടറുമായ
ദൊഡ്ഡലഹള്ളി കമ്പഗൗഡ ശിവകുമാര്‍ എന്ന ഡി കെ ശിവകുമാറിന്റെതാണ്!
കര്‍ണാടകയില്‍ മുഖ്യമന്ത്രി പദം പങ്കുവെക്കുന്നതിനെയും ചൊല്ലിയുള്ള വിവാദം ദിനംപ്രതി വഷളായിക്കൊണ്ടിരിക്കെ കോണ്‍ഗ്രസ് ഹൈക്കമാന്‍ഡിനെതിരെ ഡി.കെ. ശിവകുമാര്‍ എയ്ത ഒളിയമ്പാണിത്. രണ്ടര വര്‍ഷം കഴിഞ്ഞാല്‍ തന്നെ മുഖ്യമന്ത്രിയാക്കാമെന്ന വാക്ക്, കോണ്‍ഗ്രസ് ഹൈക്കമാന്‍ഡ് പാലിക്കണമെന്നാണ് അദ്ദേഹം ആവശ്യപ്പെടുന്നത്. സിദ്ധരാമയ്യപക്ഷം ഏകപക്ഷീയമായി കരാര്‍ ലംഘിച്ചുവെന്നാണ് ഡി കെ പക്ഷം പറയുന്നത്. മുഖ്യമന്ത്രി പദവിയൊഴുന്ന സൂചന ഇതുവരെ സിദ്ധരാമയ്യ നല്‍കിയിട്ടില്ല. ഇതോടെ ശിവകുമാര്‍ എന്ന മുറിവേറ്റ സിംഹം എന്ത് നിലപാടെടുക്കുമെന്നാണ് രാഷ്ട്രീയ വൃത്തങ്ങള്‍ ഉറ്റുനോക്കുന്നത്.
കര്‍ണ്ണാടക രാഷ്ട്രീയത്തിലെ കെജിഎഫ് ഹീറോ റോക്കിഭായ് തന്നെയാണ് ഡി കെ. ഏതെങ്കിലും രണ്ടുപേരെ തല്ലി ഡോണായ ആളല്ല അയാള്‍. അയാള്‍ ഡോണുകള്‍ക്കിടയില്‍നിന്ന് അടിച്ച് വളര്‍ന്നുവന്നനാണ്. മുറിവേറ്റ ഈ രാഷ്ട്രീയ റോക്കിഭായ് ബിജെപിയില്‍ ചേരുമെന്നും, 60 എംഎല്‍എമാരെ ഒപ്പം കൂട്ടി പാര്‍ട്ടി പിളര്‍ത്തുമെന്നൊക്കെയുള്ള അഭ്യൂഹങ്ങളുണ്ട്. അതിനിടെ കോണ്‍ഗ്രസ് ഹൈക്കമാന്‍ഡും അനുനയ നീക്കം നടത്തുന്നുണ്ട്. ശരിക്കം ഒരു ത്രില്ലര്‍ സിനിമപോലെയാവുകയാണ് വീണ്ടും കര്‍ണ്ണാടക കോണ്‍ഗ്രസ് രാഷ്ട്രീയം.
ഡി കെ എന്ന കോടീശ്വര ചാണക്യന്‍
രണ്ടര വര്‍ഷം മുമ്പ് ബിജെപിയില്‍നിന്ന് അധികാരം തിരിച്ച് പടിക്കുമ്പോള്‍, കിങ് മേക്കറായത്, പിസിസി അധ്യക്ഷനും, രാജ്യത്തെ ഏറ്റവും സമ്പന്നനായ രാഷ്ട്രീയക്കാരനുമായ ഡി കെ ശിവകുമാര്‍ തന്നെയായിരുന്നു. പത്രം തൊട്ട് പപ്പടം വരെ വ്യാപിച്ചുകിടുക്കുന്ന, 2000 കോടിയിലേറെ വരുന്ന വ്യവസായ ശൃഖലയുടെ ഉടമകൂടിയായ ഡി കെ, അമിത്ഷായൊക്കെ ചെയ്യുന്ന അതുപോലെ തന്നെ കാശിറക്കി കളിക്കാന്‍ പ്രാപ്തനായ നേതാവാണ്. അതുകൊണ്ടുതന്നെ ഡി കെയെ പൂട്ടുക എന്നതായിരുന്നു ബിജെപി സ്വീകരിച്ച ഒരു തന്ത്രം. ഡി കെയുടെ സ്ഥാപനങ്ങളില്‍ ഇ ഡി നിരന്തരം റെയഡ് നടത്തി. അക്കാലത്ത്, ഡി കെയെ രാവിലെ വാതിലില്‍ മുട്ടി വിളിച്ചുണര്‍ത്തിയത് പലപ്പോഴും ഇ.ഡി ഉദ്യോഗസ്ഥരായിരുന്നു.
ഏറ്റവും കൂടുതല്‍ റെയ്ഡ് ചെയ്യപ്പെട്ട രാഷ്ട്രീയക്കാരനും ഇദ്ദേഹമാണ്. 2019 സെപ്റ്റംബറില്‍, ഇ ഡി ശിവകുമാറിനെ ജയിലടച്ചത് മറക്കാനാവില്ല. ഡല്‍ഹി തിഹാര്‍ ജയിലില്‍ ഒരമാസത്തോളം അദ്ദേഹം കിടന്നു. തുര്‍ന്നാണ് ജാമ്യം കിട്ടിയത്. അന്ന് അദ്ദേഹം എടുത്ത പ്രതിജ്ഞയാണ് കര്‍ണ്ണാടകയില്‍നിന്ന് ബിജെപിയെ കെട്ടുകെട്ടിക്കുമെന്ന്. പിന്നീട്, 2024 മാര്‍ച്ച് 5-ന്,സുപ്രീം കോടതി ഈ കേസു തന്നെ റദ്ദാക്കി. താന്‍ ബിജെപി നേതാക്കളെപ്പോലെ നികുതി വെട്ടിക്കുന്നില്ലെന്നും തന്റെ എല്ലാം പരസ്യമാണെന്നുമാണ് ഡി കെ പറയുന്നത്. താന്‍ സ്വത്ത് വിവരം മറച്ചുവെക്കാറില്ലെന്നും, അത് കൃത്യമായി പറയുന്നത് കൊണ്ടാണ് തന്റെ സ്വത്തില്‍ വര്‍ധനവുണ്ടാകുന്നത് എന്നുമായിരുന്നു അദ്ദേഹത്തിന്റെ വാദം.
ആളിന് ആളും പണത്തിന് പണവും ആയി മുന്നില്‍ നിന്ന് നയിക്കുന്ന വീരനായകനാണ് കോണ്‍ഗ്രസുകാര്‍ക്ക് ഡി.കെ ശിവകുമാര്‍ എന്ന ഡി.കെ. പ്രതിസന്ധി ഘട്ടത്തിലെല്ലാം ഡി.കെയുടെ ഫോണിലേക്ക് വിളിവരും. അത് ചിലപ്പോള്‍ രാജസ്ഥാനില്‍ നിന്നോ ഗുജറാത്തില്‍ നിന്നോ മധ്യപ്രദേശില്‍ നിന്നോ മഹാരാഷ്ട്രയില്‍ നിന്നോ ഒക്കെയാകാം. ഹൈക്കമാന്‍ഡിനും വിവിധ സംസ്ഥാനമുഖ്യമന്ത്രിമാരേയും സര്‍ക്കാരുകളേയും പലതവണ ഡി.കെ രക്ഷിച്ചു. അഹമ്മദ് പട്ടേലിന് ശേഷം കോണ്‍ഗ്രസിന്റെ ട്രബിള്‍ ഷൂട്ടറായി ദേശീയ രാഷ്ട്രീയത്തിലും ഡി കെയുണ്ടായിരുന്നു. 2019- ല്‍ കോണ്‍ഗ്രസില്‍ നിന്ന് എംഎല്‍എമാരെ ചാക്കിട്ട് ബിജെപി സര്‍ക്കാരുണ്ടാക്കിയപ്പോള്‍ സര്‍ക്കാരിനെ രക്ഷിക്കാന്‍ സകല അടവും പയറ്റി പക്ഷേ ഫലിച്ചില്ല. എന്നാല്‍ ആ ദിവസം മുതല്‍ ഡി.കെ 2023- ന്റെ പദ്ധതിയിലായിരുന്നു.
ഡി കെയെ അപമാനിക്കാനായി അദ്ദേഹം ടിപ്പുവിന്റെ ബന്ധുവാണെന്നാണ്, തെരഞ്ഞെടുപ്പിന്റെ അവസാന നിമിഷം, അസം മുഖ്യമന്ത്രി ഹിമന്ത ബിശ്വാസ് അടക്കമുള്ളവര്‍ അടിച്ചുവിട്ടത്. തന്റെ പിതാവും മുത്തഛനുമൊക്കെ ആരാണെന്ന് ഈ നാട്ടുകാര്‍ക്ക് നന്നായി അറിയാമെന്നാണ് ശിവകുമാര്‍ തിരിച്ചടിച്ചത്. അതുപോലെ ശിവകുമാര്‍ ഒരു പാര്‍ട്ടി കഴിഞ്ഞ് മദ്യപിച്ച് മടങ്ങുന്ന ഒരു വീഡിയോയും ബിജെപിക്കാര്‍ എന്തോ ആനക്കാര്യംപോലെ പ്രചരിപ്പിച്ചു. എന്നാല്‍ താന്‍ വല്ലപ്പോഴും മദ്യപിക്കാറുണ്ടെന്ന് എല്ലാവര്‍ക്കും അറിവുള്ളതാണെന്നും, അതില്‍ എന്താണ് പ്രശ്നമെന്നും ഡി കെ തിരിച്ചടിച്ചതോടെ ബിജെപിക്കാരുടെ ഫ്യൂസ് പോയി.
കഴിഞ്ഞ തിരഞ്ഞെടുപ്പില്‍, തന്റെ മണ്ഡലമായ കനകപുരയില്‍ അധികം ശ്രദ്ധിക്കാതെ കോണ്‍ഗ്രസ് പ്രവര്‍ത്തകര്‍ക്ക് അവേശം പകരാനായി കര്‍ണ്ണാടക മുഴവന്‍ ഓടി നടന്ന് ഡികെ പ്രചാരണം നടത്തി. സാധാരണ എല്ലാ തെരഞ്ഞെടുപ്പ് കാലത്തും മറ്റ് പാര്‍ട്ടികളില്‍നിന്ന് ബിജെപിയിലേക്കാണ് ഒഴുക്ക് ഉണ്ടാവാറുള്ളത്. പക്ഷേ 2023-ല്‍ മുതിര്‍ന്ന ബിജെപി നേതാവ് ജഗദീഷ് ഷെട്ടാര്‍ അടക്കമുള്ള ഒരു ഡസനിലേറെ നേതാക്കളെ തന്നെ ശിവകുമാര്‍ കോണ്‍ഗ്രസിലേക്ക് കാലമാറ്റി കൊണ്ടുവന്നു. ലിംഗായത്ത് സമുദായത്തിലെ പ്രബല നേതാവായ ഷെട്ടാറിനെ ഒപ്പം ചേര്‍ത്തത് കോണ്‍ഗ്രസിന് പ്രചാരണത്തില്‍ കൂടുതല്‍ കരുത്ത് പകര്‍ന്നു. ബിജെപി നേതാവും മുന്‍ ഉപമുഖ്യമന്ത്രിയുമായിരുന്ന ലക്ഷ്മണ്‍ സാവഡിയേയും ഡി കെ ഒപ്പം ചേര്‍ത്തു. യെദ്യൂരപ്പയുടെ വിശ്വസ്തനായിരുന്ന സാവഡിയുടെ കൂറുമാറ്റം കോണ്‍ഗ്രസിനെ തെല്ലൊന്നുമല്ല സഹായിച്ചത്. കനകപുരയില്‍ തനിക്കെതിരേ കഴിഞ്ഞതവണ മത്സരിച്ച ജെഡിഎസ് നേതാവ് നാരായണ ഗൗഡയെയും സ്വന്തം പാളയത്തിലെത്തിച്ചു. ഗൗഡയ്‌ക്കൊപ്പം ജെഡിഎസ് നേതാവായ പ്രഭാകര്‍ റെഡ്ഡിയും കോണ്‍ഗ്രസില്‍ ചേര്‍ന്നിരുന്നു. അമിത്ഷാപോലും ഞെട്ടുന്ന തന്ത്രങ്ങളാണ് ഡി കെ ആസൂത്രണം ചെയ്തത്.
ബിജെപിയുടെ ഇലക്ഷന്‍ കാമ്പയിന്‍ പൊളിച്ചതും ഡികെയുടെ തന്ത്രങ്ങളായിരുന്നു. അവസാനം ഹനുമാനെ എടുത്തിട്ടായിരുന്നു ബിജെപി ധ്രുവീകരണത്തിന് ശ്രമിച്ചത്. ബജ്‌റംഗ്ദളിനെ നിരോധിക്കുമെന്ന് കോണ്‍ഗ്രസ് പറഞ്ഞത് ബംഗ്റംഗ്ബലി അഥവാ ഹനുമാന്റെ പേരിലിട്ട് ബിജെപി പ്രചാരണം തുടങ്ങി. എന്നാല്‍ ഹനുമാന്‍ വിവാദം കൊഴുത്തതോടെ, പ്രായോഗിക രാഷ്ട്രീയത്തിന്റെ ചാമ്പ്യനായ ഡി കെ ശിവകുമാര്‍ ഇടപെട്ടു. പാര്‍ട്ടി അധികാരത്തിലെത്തിയാല്‍ സംസ്ഥാനത്ത് പുതിയ ഹനുമാന്‍ ക്ഷേത്രങ്ങള്‍ നിര്‍മ്മിക്കുമെന്ന വാഗ്ദാനവും ഡികെ ശിവകുമാര്‍ മുന്നോട്ടുവച്ചു. 'ബജ് രംഗ്ബലിയും ബജ്രംഗ്ദളും തമ്മില്‍, എന്താണ് ബന്ധം? ഞാനും ഒരു ഹനുമാന്‍ ഭക്തനാണ്. അവര്‍ മാത്രമല്ല ഹനുമാന്‍ ചാലിസ ചൊല്ലുന്നത്. ഞങ്ങളും എല്ലാ ദിവസവും ചൊല്ലാറുണ്ട്'' - -ഡി കെ പറഞ്ഞു. ഇതോടെയാണ് ആ വിവാദം കെട്ടടങ്ങിയത്. ഇങ്ങനെ ഓരോ ഘട്ടത്തിലും പാര്‍ട്ടിയെ രക്ഷിച്ചത് ഡി കെ ആയിരുന്നു.
കന്നടയിലെ വിഎസ്
ഒരു ഭാഗത്ത് ആളും അര്‍ത്ഥവും നല്‍കി ഡി കെ ഒരു മഹാമേരുപോലെ ഉറച്ചുനില്‍ക്കുമ്പോള്‍ അഴിമതിവിരുദ്ധ പ്രതിഛായ വളര്‍ത്തി സാധാരണക്കാരുടെ വോട്ട് നേടുകയായിരുന്നു, കെ സിദ്ധരാമയ്യ. കര്‍ണ്ണാടകയില്‍ ഏറ്റവും പേരുള്ള അഴിമതിരഹിത പ്രതിഛായയുള്ള നേതാവായ അദ്ദേഹത്തെ, വിഎസിന് സമാനനായിട്ടാണ് ഇന്ത്യാ ടുഡെ വിലയിരുത്തിയത്. കോണ്‍ഗ്രസിലെ സോഷ്യലിസ്റ്റ് മുഖമാണ് സിദ്ധരാമയ്യ. സീ വോട്ടര്‍ 2023-ല്‍ നടത്തിയ അഭിപ്രായ സര്‍വേ പ്രകാരം, കര്‍ണാടകയിലെ 40.1 ശതമാനം വോട്ടര്‍മാര്‍ സിദ്ധരാമയ്യയെ അടുത്ത മുഖ്യമന്ത്രിയാകണമെന്നാണ് ആഗ്രഹിച്ചത്. ഈ സര്‍വേയില്‍ വോട്ടര്‍മാരില്‍ 4.2 ശതമാനം മാത്രമാണ് ശിവകുമാറിനെ മുഖ്യമന്ത്രി സ്ഥാനത്തേക്ക് ആഗ്രഹിച്ചത്.
ജെ.ഡി.എസിലെ ശക്തനായ നേതാവായിരുന്നു സിദ്ധരാമയ്യ. പാര്‍ട്ടിയുടെ മുതിര്‍ന്ന നേതാവും മുന്‍ പ്രധാനമന്ത്രിയുമായ എച്ച്.ഡി ദേവഗൗഡയുടെ അടുത്ത അനുയായിയായി ആയിരുന്നു. എന്നാല്‍ തന്റെ പിന്‍ഗാമിയായി മകന്‍ കുമാരസ്വാമിയെ അഭിഷേകം ചെയ്യാനുള്ള ദേവഗൗഡയുടെ തീരുമാനത്തില്‍ അസ്വസ്ഥനായ സിദ്ധരാമയ്യ 2005-ല്‍ പാര്‍ട്ടി വിട്ട് കോണ്‍ഗ്രസില്‍ ചേര്‍ന്നു. 2013-ലെ നിയമസഭാ തെരഞ്ഞെടുപ്പില്‍ കോണ്‍ഗ്രസ് നേടിയ മികച്ച വിജയത്തോടെ സിദ്ധരാമയ്യ കര്‍ണാടകയുടെ മുഖ്യമന്ത്രിയായി. 2018-ല്‍ രണ്ട് സീറ്റില്‍ മത്സരിച്ച സിദ്ധരാമയ്യ ഒരിടത്ത് പരാജയപ്പെട്ടിരുന്നു. ദളിത്, മുസ്ലിം സമുദായങ്ങള്‍ക്കിടയില്‍ സിദ്ധരാമയ്യക്ക് ശക്തമായ സ്വാധീനമുണ്ട്. അതും കോണ്‍ഗ്രസിന് ഗുണം ചെയ്തു.
ബിജെപി സര്‍ക്കാറിന്റെ അഴിമതിക്കെതിരെ അതിശക്തമായ കാമ്പയിനാണ് സിദ്ധരാമയ്യ അഴിച്ചുവിട്ടത്. 2023-ല്‍െ കര്‍ണ്ണാടക തെരഞ്ഞെടുപ്പിന് ഏതാനും ദിവസങ്ങള്‍ക്ക് മുമ്പ് ബംഗലൂരുവില്‍ ഉടനീളം അന്നത്തെ മുഖ്യമന്ത്രി ബസവരാജ് ബൊമ്മെയുടെ ചിത്രവും ക്യുആര്‍ കോഡും ഉള്ള പോസ്റ്ററുകള്‍ നിറഞ്ഞത് അമ്പരിപ്പിക്കുന്ന ഒരു കാഴ്ചയായിരുന്നു. പേടിഎമ്മിന്റെ ചിഹ്നത്തില്‍ മാറ്റം വരുത്തി 'പേ സി എം' എന്നാക്കിയാണ് പോസ്റ്ററുകള്‍. ക്യുആര്‍ കോഡ് സ്‌കാന്‍ ചെയ്യുന്നതതോടെ, 40 പെര്‍സെന്റ് സര്‍ക്കാര്‍ എന്ന വെബ്സൈറ്റിലേക്കാണ് എത്തുക. കോണ്‍ഗ്രസ് നിര്‍മ്മിച്ച വെബ്സൈറ്റാണിത്. എന്തിനും 40 ശതമാനം കമ്മീഷന്‍ വാങ്ങുന്ന ബിജെപി നേതാക്കളുടെ അഴിമതി റിപ്പോര്‍ട്ട് ചെയ്യാനുള്ള സൈറ്റാണ് ഇത്. ഈ പരിപാടിയുടെ തല സിദ്ധരാമയ്യയുടെ ടീമായിരുന്നു.
40 പെര്‍സെന്റ് കമ്മീഷന്‍ എന്ന ടാഗ്ലൈനും ഇതോടൊപ്പം സോഷ്യല്‍ മീഡിയയില്‍ സിദ്ധരാമയ്യ വ്യാപകമായി പ്രചരിച്ചു. അഴിമതി റിപ്പോര്‍ട്ട് ചെയ്യാനും പരാതി നല്‍കാനുമായി കോണ്‍ഗ്രസ് രൂപകല്‍പ്പന ചെയ്ത 40 പേര്‍സെന്റ് സര്‍ക്കാര്‍ ഡോട്ട് കോം എന്ന വെബ്സൈറ്റും ഹിറ്റായി. അഴിമതി ഒരു മുഖ്യ അജണ്ടയാക്കിയെടുക്കാന്‍ സിദ്ധരാമയ്യക്കായി. അദ്ദേഹത്തിന്റെ പൊതുയോഗങ്ങള്‍ വന്‍ ജനക്കൂട്ടം ആകര്‍ഷിച്ചു.
'കൊള്ളക്കാരും തട്ടിപ്പുകാരും നിറഞ്ഞ 40 പേര്‍സന്റ് സര്‍ക്കാര്‍' എന്ന് പറഞ്ഞാണ് സിദ്ധരാമയയ്യ പൊതുയോഗങ്ങളില്‍ ആഞ്ഞടിക്കാറുള്ളത്. തെരഞ്ഞെടുപ്പിന് തൊട്ടുമുമ്പ് അഴിമതിയെക്കുറിച്ച് സംവാദം നടത്താന്‍ മുഖ്യമന്ത്രി ബൊമ്മെ, സിദ്ധരാമയ്യയെ വെല്ലുവിളിച്ചിരുന്നു. കോവിഡ് കാലത്ത് സ്വിമ്മിങ്ങ് പൂളില്‍ പുളച്ചു മറിഞ്ഞ ആരോഗ്യമന്ത്രി ഡോ സുധാകറിനെതിരെയും അദ്ദേഹം ആഞ്ഞടിച്ചു. ഫലം വന്നപ്പോള്‍ ഡോ സുധാകര്‍ അടക്കം തോറ്റു. ഡി കെയും തന്ത്രങ്ങളും സിദ്ധരാമയ്യുടെ ജനപ്രീതിയും ചേര്‍ന്നതോടെ ശരിക്കും ഡബിള്‍ എഞ്ചിന്‍ ആയി, കോണ്‍ഗ്രസ് പാര്‍ട്ടി മാറുകയായിരുന്നു. ആകെയുള്ള 224 സീറ്റില്‍ 135 എണ്ണം നേടി കോണ്‍ഗ്രസ് അധികാരത്തിലേറി.
മറന്നുപോയ അധികാരക്കരാര്‍
രണ്ട് കരുത്തരായ നേതാക്കള്‍. അപ്പോള്‍ ആരെ മുഖ്യമന്ത്രിയാക്കും. 2023 മേയില്‍ നടന്ന നിയമസഭാതിരഞ്ഞെടുപ്പിന് ശേഷം സിദ്ധരാമയ്യ മുഖ്യമന്ത്രിയായത് ഒരു അധികാര പങ്കുവെക്കല്‍ കരാറിന്റെ പുറത്താണെന്നാണ് പറയുന്നത്. ഇതനുസരിച്ച് രണ്ടര വര്‍ഷത്തിനുശേഷം സിദ്ധരാമയ്യ പദവിയൊഴിയുകയും ശിവകുമാര്‍ മുഖ്യമന്ത്രിയാകുകയും ചെയ്യും. ഈ കരാര്‍ അനുസരിച്ചുള്ള വാക്ക് പാലിക്കണമെന്നാണ് ശിവകുമാര്‍ പക്ഷത്തിന്റെ ആവശ്യം. ശിവകുമാര്‍ ക്യാമ്പിലെ വൃത്തങ്ങള്‍ പറയുന്നതനുസരിച്ച്, സിദ്ധരാമയ്യ, ശിവകുമാര്‍, കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ, കെ.സി. വേണുഗോപാല്‍, രണ്‍ദീപ് സുര്‍ജേവാല, ശിവകുമാറിന്റെ സഹോദരനും എം.പി.യുമായ ഡി.കെ. സുരേഷ് എന്നിവര്‍ പങ്കെടുത്ത നീണ്ട ചര്‍ച്ചകള്‍ക്ക് ശേഷമാണ് അധികാര പങ്കുവെക്കല്‍ കരാര്‍ ഉറപ്പിച്ചത്. ആദ്യത്തെ രണ്ടര വര്‍ഷം ഡി കെ ആവശ്യപ്പെട്ടിരുന്നുവെങ്കിലും, സീനിയോറിറ്റി ചൂണ്ടിക്കാട്ടി സിദ്ധരാമയ്യ അത് നിരസിച്ചു. ഒടുവിലത്തെ ഒത്തുതീര്‍പ്പ് പ്രകാരം ആദ്യ പകുതി സിദ്ധരാമയ്യക്ക് ലഭിച്ചു, പിന്നീട് ശിവകുമാര്‍ അധികാരം ഏറ്റെടുക്കുമെന്നായിരുന്നു ധാരണ. ഇതാണ് ഇപ്പോള്‍ നടക്കാതെ പോവുന്നത്. പച്ചമലയാളത്തില്‍ പറഞ്ഞാല്‍ ഡി കെ പറ്റിക്കപ്പെട്ടു എന്നാണ് അദ്ദേഹത്തിന്റെ അണികള്‍ പറയുന്നത്.
ഇത് സാമുദായികമായും പ്രശ്നങ്ങള്‍ ഉണ്ടാക്കുന്നുണ്ട്. ഡി കെ ശിവകുമാര്‍ ഉള്‍പ്പെടുന്ന 'വൊക്കലിംഗ സമുദായത്തില്‍നിന്ന് ഒരു മുഖ്യമന്ത്രി' എന്നായിരുന്നു അദ്ദേഹത്തിന്റെ അനുയായികള്‍ അഴിച്ചുവിട്ട ക്യാമ്പയിന്‍. ഈ തിരഞ്ഞെടുപ്പില്‍ നിര്‍ണായകമായിരുന്നു വൊക്കലിഗ സമുദായത്തിന്റെ വോട്ടുകള്‍. 14 ശതമാനമാണ് കര്‍ണാടകത്തില്‍ ഇവരുടെ അംഗബലം. 60 ഓളം മണ്ഡലങ്ങളില്‍ വൊക്കലിഗ വോട്ട് നിര്‍ണായകമാണ്. ലിംഗായത്ത് കഴിഞ്ഞാല്‍ സംസ്ഥാനത്തെ ഏറ്റവും പ്രബലവിഭാഗമാണവര്‍. സ്വാതന്ത്ര്യത്തിന് ശേഷം ഒരു പ്രധാനമന്ത്രിയും ഏഴ് മുഖ്യമന്ത്രിമാരും ഉണ്ടായ സമുദായമാണിത്. ഓള്‍ഡ് മൈസൂരു മേഖലയാണ് വൊക്കലിഗ ശക്തികേന്ദ്രം.
ജെഡി-എസും കോണ്‍ഗ്രസുമാണു മേഖലയിലെ പ്രമുഖ രാഷ്ട്രീയകക്ഷികള്‍. വൊക്കലിഗ പരമ്പരാഗതമായി ജെഡിഎസ്സിനെ പിന്തുണയ്ക്കുന്നവരാണ്. പക്ഷേ ഡി കെ മുഖ്യമന്ത്രിയാവുമെന്ന് കണ്ടാണ് അവര്‍ മാറ്റിക്കുത്തിയത് എന്നാണ് അദ്ദേഹത്തിന്റെ അനുയായികള്‍ പറയുന്നത്.
ബിജെപിയും വൊക്കലിഗ കോട്ടയില്‍ ശക്തമായ പ്രചാരണത്തിനുണ്ടായിരുന്നു. എന്നാല്‍ പ്രചാരണത്തിനിടെയിണ്ടായ നാക്കുപിഴകളും വസ്തുതാപരമായ തെറ്റുകളും ബിജെപിക്ക് തിരിച്ചടിയായി. ടിപ്പു സുല്‍ത്താനെ വധിച്ചത് ധീരന്മാരായ ഉറിഗൗഡ-നഞ്ചേഗൗഡ എന്ന വൊക്കലിഗ സമുദായക്കാരാണെന്നായിരുന്നു ബിജെപിയുടെ പ്രചാരണം. എന്നാല്‍ ചരിത്രപരമായ യാതൊരു തെളിവും ഇതിനുണ്ടായിരുന്നില്ല. വൊക്കലിഗ നേതാക്കളായ കുമാരസ്വാമിയും ഡികെ ശിവകുമാറും ഇതിനെതിരെ രംഗത്ത് വന്നു. ഇതോടെ ബിജെപി ശരിക്കും പ്രതിരോധത്തിലായി. വൊക്കലിഗ പുരോഹിതന്‍ ഈ വിഷയത്തില്‍ ബിജെപിക്ക് ഉപദേശവും നല്‍കി. അത് പാര്‍ട്ടിക്ക് ആകെ നാണക്കേടുണ്ടാക്കി.
വൊക്കലിഗ മുഖ്യമന്ത്രി എന്ന കാര്‍ഡ് കൂടിയാണ് ഡികെ ഇറക്കിയത്. ''ഞാന്‍ വൊക്കലിഗ സമുദായാംഗമാണ്. 20 വര്‍ഷങ്ങള്‍ക്കുശേഷമാണ് വൊക്കലിഗ സമുദായത്തില്‍ നിന്ന് മുഖ്യമന്ത്രിയുണ്ടാകാന്‍ പോകുന്നത്. സോണിയ ഗാന്ധി തന്നെ പാര്‍ട്ടി അധ്യക്ഷനാക്കി. ഇനി നിങ്ങളുടെ ഊഴമാണ്. ഈ അവസരം നഷ്ടമാക്കരുത്''- എന്നാണ് ഡികെ ശിവകുമാര്‍ വൊക്കലിഗ സമുദായത്തോട് ആവശ്യപ്പെട്ടത്. ദളിതര്‍ അവരില്‍ നിന്നൊരാള്‍ മുഖ്യമന്ത്രിയാകാന്‍ ആഗ്രഹിക്കുന്നു. അതുപോലെ വൊക്കലിഗ സമുദായാംഗങ്ങളും ആഗ്രഹിക്കേണ്ടതുണ്ടെന്നും അദ്ദേഹം വ്യക്തമാക്കിയിരുന്നു. ഇത് വോട്ടായി. ഇപ്പോള്‍ കോണ്‍ഗ്രസ് നേതൃത്വം പറഞ്ഞു പറ്റിച്ചു എന്ന വികാരമാണ് ആ സമുദാത്തിനകത്തും ഉയരുന്നത്. ഇതും മല്ലികാര്‍ജുന്‍ ഗാര്‍ഗെ അടക്കമുള്ള ദേശീയ നേതൃത്വം പരിഗണിച്ച് വരുന്ന വിഷയമാണ്.
കണ്ണും നട്ട് ബിജെപി
വാഗ്ദാന ലംഘനത്തില്‍ ശരിക്കും വ്രണിതനാണ് ശിവകുമാറും അദ്ദേഹത്തെ അനുകൂലിക്കുന്നവരും. 60 എംഎല്‍എമാര്‍ പൂര്‍ണ്ണമായും ഡി കെയോട് കൂറ് പുലര്‍ത്തുന്നവരാണ്. രഹസ്യമായി അദ്ദേഹത്തെ അനുകൂലിക്കുന്ന 20ഓളം പേര് വെറെയുമുണ്ട്. അങ്ങനെയാവുമ്പോള്‍ ഡി കെ വിചാരിച്ചാല്‍ നിഷ്പ്രായാസം പാര്‍ട്ടി പിളര്‍ത്താന്‍ കഴിയും. മാത്രമല്ല കര്‍ണ്ണാടകയില്‍ പാര്‍ട്ടിയെന്നാല്‍ ഡി കെയാണ്. ഡി കെയെ കണ്ടിട്ടാണ് ആളുകള്‍ പാര്‍ട്ടിയില്‍ പ്രവര്‍ത്തിക്കുന്നത്. അല്ലാതെ തിരിച്ചല്ല.
കോണ്‍ഗ്രസിലെ ഈ തര്‍ക്കങ്ങളില്‍ കണ്ണും നട്ട് കാത്തിരിക്കയാണ് ബിജെപി. ഡി കെ ചുവടുമാറിയെത്തുകയാണെങ്കില്‍ രണ്ടുകൈയും നീട്ടി സ്വീകരിക്കാമെന്നാണ് ബിജെപിയുടെ നിലപാട്. ബി എസ് യദൂരിയപ്പയുടെ പടിയിറക്കത്തോടെ കര്‍ണ്ണാടക ബിജെപിയില്‍ കരുത്തനായ ഒരു നേതാവില്ലാത്ത അവസ്ഥയാണ്. യദൂരിയപ്പയുടെ മകനും, എംഎല്‍എയുമായ വിജേന്ദ്രയാണ് ബിജെപി സംസ്ഥാന അധ്യക്ഷന്‍. താരമമ്യേന ജൂനിയറായ ഇദ്ദേഹം നേതൃത്വം ഏറ്റെടുത്തതോടെ സീനിയറായ പല നേതാക്കളും അസ്വസ്ഥതയിലാണ്. അതോടെ പാര്‍ട്ടി മെഷനറി ചലിക്കാതെയായി. അത് മാറ്റിയെടുക്കാന്‍ ഡി കെ കഴിയുമെന്നാണ് ബിജെപി കണക്കുകൂട്ടുന്നത്. മാത്രമല്ല, വൊക്കലിംഗ സമുദായത്തിന്റെ വോട്ടുബാങ്കും അവര്‍ മനക്കോട്ടെ കെട്ടുന്നു.
ഡി കെ മുഖ്യമന്ത്രിയായാല്‍ പിന്തുണക്കുമെന്ന് മുന്‍ മുഖമന്ത്രിയും ബിജെപി നേതാവുമായ സദാനന്ദഗൗഡ പറഞ്ഞു കഴിഞ്ഞു. മാത്രമല്ല സിദ്ധരാമയ്യ സര്‍ക്കാറിനെതിരെ അവിശ്വാസപ്രമേയത്തിനും, ബിജെപി ഒരുങ്ങുന്നുണ്ട്. അടുത്തമാസം ആദ്യം ആരംഭിക്കുന്ന സഭാ സമ്മേളനത്തില്‍ പ്രമേയം കൊണ്ടുവരാനാണ്, തീരുമാനം. ബിജെപിയുടെ ഈ നീക്കവും കോണ്‍ഗ്രസ് ഹൈക്കമാന്‍ഡിനെ സമ്മര്‍ദത്തിലാക്കും.
ഇടഞ്ഞുനില്‍ക്കുന്ന കൊമ്പനെ അനുനയിപ്പിക്കാന്‍ കോണ്‍ഗ്രസ് നേതൃത്വവും വലിയ ശ്രമങ്ങള്‍ നടത്തുന്നുണ്ട്. പ്രശ്നത്തില്‍ രാഹുല്‍ ഗാന്ധി നേരിട്ട് ഇടപെട്ടിരിക്കയാണ്. അതിന്റെ ഭാഗമായാണ് ഇന്ന് സിദ്ധരാമയ്യയും ഡി കെ ശിവകുമാറും ഇന്ന് മുഖാമുഖം ചര്‍ച്ച നടത്തിയത്. തല്‍ക്കാലം എങ്ങനെയെങ്കിലും ഒരു വെടിനിര്‍ത്തല്‍ ഉണ്ടാക്കുക എന്നതാണ് ഹൈക്കമാന്‍ഡ് ആഗ്രഹിക്കുന്നത്. രണ്ടുമാസം കൂടി മുഖ്യമന്ത്രി സ്ഥാനത്ത് സിദ്ധരാമയ്യയെ തുടരാന്‍ അനുവദിക്കുമെന്നാണ് ദേശീയ മാധ്യമങ്ങള്‍ നല്‍കുന്ന സൂചന. മുന്‍ മുഖ്യമന്ത്രി ദേവ്രാജ് അരിശിനെ മറികടന്ന്, ഏറ്റവും കൂടുതല്‍ കാലം മുഖ്യമന്ത്രിയായ നേതാവ് എന്ന പേര് നേടിയശേഷം സിദ്ധരാമയ്യ രാജിവെക്കുമെന്ന് പറഞ്ഞുകേള്‍ക്കുന്നു. ഒരു ബജറ്റ് കൂടി അവതരിപ്പിക്കണം എന്ന ആഗ്രഹവും സിദ്ധരാമയ്യ മുന്നോട്ട് വെച്ചിട്ടുണ്ട്.
ഇപ്പോഴും കര്‍ണ്ണാടകയില്‍ വലിയ ജനപ്രീതിയുള്ള സിദ്ധരാമയ്യയെ പുര്‍ണ്ണമായും പിണക്കാനും ഹൈക്കമാന്‍ഡിന് കഴിയില്ല. നേതൃമാറ്റം ആവശ്യപ്പെട്ട് ശിവകുമാറിനെ അനുകൂലിക്കുന്ന എംഎല്‍എമാര്‍ തലസ്ഥാനത്ത് ഒത്തുകൂടിയപ്പോഴും, സിദ്ധരാമയ്യയുടെ സാമ്പത്തിക ഉപദേഷ്ടാവും മുഖ്യമന്ത്രിയുടെ ക്യാമ്പിലെ മുതിര്‍ന്ന നേതാവുമായ ബസവരാജ് രായറെഡ്ഡി ഡല്‍ഹിയില്‍ നിന്നുള്ള സമ്മര്‍ദ്ദത്തെ തള്ളിപ്പറഞ്ഞു. വ്യക്തമായ ഒരു കാരണം ഹൈക്കമാന്‍ഡ് നല്‍കിയില്ലെങ്കില്‍ സിദ്ധരാമയ്യ സ്ഥാനമൊഴിയില്ലെന്ന് രായറെഡ്ഡി കൂട്ടിച്ചേര്‍ക്കുകയും ചെയ്തു.
പക്ഷേ ഡി കെ ബിജെപിയില്‍ ചേരുമെന്നതൊക്കെ വെറും അതിവായനയാണെന്ന് പറയുന്നവരും കുറവല്ല. ബിജെപി സര്‍ക്കാര്‍ കള്ളക്കേസില്‍ കുടുക്കി തിഹാര്‍ ജയിലിലടച്ച നേതാവാണ് അദ്ദേഹമെന്നത് മറക്കാന്‍ കഴിയില്ല. കഴിഞ്ഞ നിയമസഭാ സമ്മേളനത്തില്‍ ഡി കെ ആര്‍എസ്എസ് ഗണഗീതം ആലപിച്ചത് വലിയ വിവാദമായിരുന്നു. ഇത് ബിജെപിയിലേക്ക് അടുക്കുന്നതിന്റെ സൂചനയായാണ് വിലയിരുത്തപ്പെട്ടത്. എന്നാല്‍ താന്‍ കോണ്‍ഗ്രസുകാരനാണെന്നും, കോണ്‍ഗ്രസുകാരനായി തന്നെ മരിക്കുമെന്നുംു പറഞ്ഞ് അദ്ദേഹം അഭ്യൂഹങ്ങള്‍ തള്ളിക്കളഞ്ഞു. ഇപ്പോഴും ഡി കെയുടെ മനസ്സറിയവുന്നവര്‍ പറയുന്നത് അദ്ദേഹം ബിജെപിക്കൊപ്പം പോവില്ല എന്നാണ്. പക്ഷേ രാഷ്ട്രീയത്തില്‍ സ്ഥിരമായി മിത്രങ്ങളോ ശത്രുക്കളോ ഇല്ലല്ലോ!
വാല്‍ക്കഷ്ണം: കേരളത്തിലെ വിഎസ്- പിണറായി പോരുപോലെ പലരും ഡി കെ -സിദ്ധരാമയ്യ പ്രശ്നത്തെ കാണുന്നുണ്ട്. പക്ഷേ അതുപോലെയല്ല, സിദ്ധരാമയ്യയും ഡി കെയും. നേരത്തെ അവര്‍ പരസ്പര ബഹുമാനം പുലര്‍ത്തുന്ന സുഹൃത്തുക്കളായിരുന്നു. ഇത്തവണ ഭരണത്തിലേറിയതോടെയാണ് അവര്‍ അകന്നത്. ധര്‍മ്മസ്ഥലയിലെ കൂട്ടുക്കുഴിമാട വിവാദത്തില്‍ മുഖ്യമന്ത്രി സിദ്ധരാമയ്യ അതിത താല്‍പ്പര്യമെടുത്തതായി വിമര്‍ശനമുണ്ട്. ഡി കെ തുടക്കം മുതല്‍ ധര്‍മ്മസ്ഥല ക്ഷേത്രത്തിന് ഒപ്പമായിരുന്നു. ഡി കെ ഉപമുഖ്യമന്ത്രിയല്ല, സൂപ്പര്‍ മുഖ്യമന്ത്രി കളിക്കുന്നുവെന്നാണ് സിദ്ധരാമയ്യ അനുകൂലികള്‍ ആരോപിച്ചത്. ഈ ഈഗോ ക്ലാഷാണ് ഇപ്പോള്‍ വളര്‍ന്ന് ഇവിടെ എത്തിയത്.
