സുരക്ഷാ മുന്നറിയിപ്പുകള്‍ മറികടന്ന് ട്രെയിനിന്റെ മുകളില്‍ കയറി റീല്‍സ് ചിത്രീകരണം; ട്രാക്കിന് മുകളിലെ വൈദ്യുത ലൈനില്‍ നിന്ന് ഷോക്കേറ്റ് 15 കാരന്‍ മരിച്ചു
കൊല്‍ക്കത്ത: ട്രെയിനിന് മുകളില്‍ കയറി റീല്‍സ് ചിത്രീകരിക്കുന്നതിനിടെ 15 കാരന്‍ ഷോക്കേറ്റ് മരിച്ചു. പശ്ചിമ ബംഗാളിലെ ഈസ്റ്റ് ബര്‍ദ്‌വാന്‍ ജില്ലയിലെ ജ്ഞാന്‍ദാസ് കന്‍ദ്ര റെയില്‍വെ സ്റ്റേഷനിലായിരുന്നു അപകടം. ഈസ്റ്റ് ബര്‍ദ്‌വാനിലെ ഖാജിഗ്രാം സ്വദേശിയായ ഇബ്രാഹിം ചൗധരി (15) ആണ് മരിച്ചത്. സ്റ്റേഷനില്‍ നിര്‍ത്തിയിട്ടിരുന്ന ട്രെയിനിന്റെ മുകളില്‍ കയറി റീല്‍സ് ചിത്രീകരിക്കുകയായിരുന്നു. ട്രാക്കിന് മുകളിലുണ്ടായിരുന്ന വൈദ്യുത ലൈനില്‍ നിന്ന് ഷോക്കേല്‍ക്കുകയായിരുന്നു.
സുരക്ഷ മുന്നറിയിപ്പുകള്‍ മറികടന്ന് നിര്‍ത്തിയിട്ടിരുന്ന ട്രെയിനിന്റെ മുകളില്‍ കയറി വീഡിയോ എടുക്കുന്നതിനിടെ മുകളിലൂടെ പോയ വൈദ്യുത ലൈന്‍ കുട്ടി ശ്രദ്ധിച്ചില്ല. ലൈനില്‍ തട്ടിയ ഉടന്‍ ഷോക്കേറ്റ് കുട്ടി ട്രെയിനിന്റെ മുകളില്‍ തന്നെ് ബോധം കെട്ട് വീഴുകയായിരുന്നു. മൂക്കില്‍ നിന്നും വായില്‍ നിന്നും രക്തം വന്ന നിലയിലാണ് പരിസരത്തുണ്ടായിരുന്നവര്‍ കുട്ടിയെ ആശുപത്രിയിലേക്ക് കൊണ്ടുപോയത്. അവിടെ എത്തിയപ്പോഴേക്കും മരണം സംഭവിച്ചതായി ഡോക്ടര്‍മാര്‍ സ്ഥിരീകരിക്കുകയായിരുന്നു. സംഭവത്തില്‍ അധികൃതര്‍ അന്വേഷണം തുടങ്ങിയിട്ടുണ്ട്.
