അഗ്നിവീർ പദ്ധതി: ആദ്യ ബാച്ചുമായി ആശയവിനിമയം നടത്തി പ്രധാനമന്ത്രി നരേന്ദ്ര മോദി
ന്യൂഡൽഹി: അഗ്നിവീർ പദ്ധതിയിലൂടെ നിയമനം ലഭിച്ച ആദ്യബാച്ചിലുള്ളവരുമായി ആശയവിനിമയം നടത്തി പ്രധാനമന്ത്രി നരേന്ദ്ര മോദി. ഓൺലൈനായി ആയിരുന്നു കൂടിക്കാഴ്‌ച്ച. പ്രതിരോധമന്ത്രി രാജ്നാഥ് സിംഗും യോഗത്തിൽ പങ്കെടുത്തു. സായുധ സേനയിലെ ഹ്രസ്വകാല നിയമന പദ്ധതിയാണിത്. കൂടിക്കാഴ്‌ച്ചയിൽ അഗ്‌നിവീരുകളുടെ ആദ്യ ബാച്ചിനെ പ്രധാനമന്ത്രി അഭിനന്ദിച്ചു.
25,000ത്തിൽ അധികം അഗ്‌നിവീരുകളുടെ ആദ്യ ബാച്ചാണ് ചടങ്ങിൽ പങ്കെടുത്തത്. ഈ പരിവർത്തന നയം നമ്മുടെ സായുധ സേനയെ ശക്തിപ്പെടുത്തുന്നതിലും അവരുടെ ഭാവി സജ്ജരാക്കുന്നതിലും മാറ്റം കൊണ്ടുവരുമെന്ന് പ്രധാനമന്ത്രി പഞ്ഞു. അഗ്നിപഥ് പദ്ധതി സ്ത്രീകളെ ശാക്തീകരിക്കുമെന്ന് ചർച്ച ചെയ്ത പ്രധാനമന്ത്രി, മൂന്ന് സേനകളിലും വനിതകളെ കാണാൻ കാത്തിരിക്കുകയാണെന്നും പ്രധാനമന്ത്രി കൂട്ടിച്ചേർത്തു.
25,800 സൈനികരുടെ ആദ്യ ബാച്ചിൽ ആർമിയിലേക്ക് 19,000 റിക്രൂട്ട്‌മെന്റുകളും 271 വനിതകൾ ഉൾപ്പെടെ 2,800 പേർ നേവിയിലേക്കും 3,000 പേർ ഇന്ത്യൻ എയർഫോഴ്‌സിലേക്കും (ഐഎഎഫ്) ഉൾപ്പെടുന്നു. പ്രതിരോധ മന്ത്രി രാജ്നാഥ് സിംഗും അഗ്നിവീർ ബാച്ചുമായി സംവദിച്ചിരുന്നു.
കഴിഞ്ഞ വർഷം ജൂൺ പതിനാലിനാണ് സർക്കാർ അഗ്നിപഥ് പ്രഖ്യാപിച്ചത്. പതിനേഴര വയസ്സ് പ്രായമായവരെ നാല് വർഷ കാലയളവിൽ സൈന്യത്തിലേക്ക് നിയമിക്കുന്ന
പദ്ധതിയാണിത്. പ്രായപരിധി 25 വയസ്സായി സർക്കാർ ഉയർത്തിയിരുന്നു. 17 ഉം, 21 ഉം ആണ് പ്രായപരിധിയായി സർക്കാർ ആദ്യം നിർദ്ദേശിച്ചിരുന്നത്. ഇത്തരത്തിൽ സേവനം അനുഷ്ടിക്കുന്ന 25 ശതമാനം പേർക്ക് 15 വർഷത്തേയ്ക്ക് തുടർ നിയമനവും ലഭിക്കും.
