മുംബൈ: രാജ്യതലസ്ഥാനമായ ഡൽഹിക്കു പിന്നാലെ മുംബൈയിലും വായുഗുണനിലവാരം അതീവ ഗുരുതരാവസ്ഥയിലേക്ക് കൂപ്പുകുത്തുന്നതായി റിപ്പോർട്ട്. മലിനീകരണ നിയന്ത്രണ ബോർഡ് പുറത്തുവിട്ട കണക്കുകൾ പ്രകാരം ശനിയാഴ്ച നഗരത്തിന്റെ പല ഭാഗങ്ങളിലും വായു ഗുണനിലവാര സൂചിക (എ.ക്യു.ഐ) 150-നും 200-നും ഇടയിൽ രേഖപ്പെടുത്തി. ദിയോനാർ, വഡാല തുടങ്ങിയ പ്രദേശങ്ങളിൽ ഇത് 'ഗുരുതരം' എന്ന വിഭാഗത്തിലെത്തിയിട്ടുണ്ട്. മലിനീകരണത്തിന്റെ ഈ രൂക്ഷമായ വർദ്ധനവിൽ ഭരണസംവിധാനത്തിന്റെ വീഴ്ച ആരോപിച്ച് കോൺഗ്രസും ശിവസേനയും (യുബിടി) രംഗത്തെത്തിയപ്പോൾ, ബോംബെ ഹൈക്കോടതിയും വിഷയത്തിൽ അതൃപ്തി രേഖപ്പെടുത്തി.

മുംബൈ മെട്രോപൊളിറ്റൻ മേഖലയിലെ വായുഗുണനിലവാരം ഇതേ നിലയിൽ തുടരുകയാണെങ്കിൽ നഗരവാസികളുടെ ശരാശരി ആയുർദൈർഘ്യം അഞ്ചു മുതൽ ഏഴു വർഷം വരെ കുറയാൻ സാധ്യതയുണ്ടെന്ന് കോൺഗ്രസ് എം.പി. വർഷ ഗെയ്‌ക്‌വാദ് മുന്നറിയിപ്പ് നൽകി. കുട്ടികളും പ്രായമായവരും ഉയർന്ന അപകടസാധ്യതയിലാണെന്നും അവർ ചൂണ്ടിക്കാട്ടി. ഈ പ്രതിസന്ധി പരിഹരിക്കുന്നതിനായി കോൺഗ്രസ് ശനിയാഴ്ച ഒരു മാനിഫെസ്റ്റോ പുറത്തിറക്കുമെന്നും പരിസ്ഥിതി മന്ത്രി പങ്കജ മുണ്ടെക്കും മുനിസിപ്പൽ കമ്മീഷണർക്കും അടിയന്തര ഇടപെടൽ ആവശ്യപ്പെട്ട് കത്തെഴുതുമെന്നും ഗെയ്‌ക്‌വാദ് അറിയിച്ചു.

മുംബൈ നഗരത്തിലെ വായു ഗുണനിലവാര നിരീക്ഷണ സംവിധാനങ്ങൾ കാര്യക്ഷമമല്ലെന്ന് അധികൃതർ തന്നെ സമ്മതിച്ചിട്ടുണ്ടെന്നും മാലിന്യം തള്ളുന്ന സ്ഥലങ്ങളിൽ പതിവായുണ്ടാകുന്ന തീപ്പിടിത്തങ്ങൾ പ്രശ്നം കൂടുതൽ വഷളാക്കുകയാണെന്നും കോൺഗ്രസ് നേതാവ് സച്ചിൻ സാവന്ത് ആരോപിച്ചു. വായുമലിനീകരണം സംബന്ധിച്ച ഉത്തരവാദിത്വത്തിൽനിന്ന് സംസ്ഥാന സർക്കാരിന് ഒളിച്ചോടാൻ കഴിയില്ലെന്നും അദ്ദേഹം കൂട്ടിച്ചേർത്തു. ബൃഹൻമുംബൈ മുനിസിപ്പൽ കോർപ്പറേഷനും സംസ്ഥാന സർക്കാരും വായുഗുണനിലവാരം മെച്ചപ്പെടുത്താനുള്ള നടപടികൾ സ്വീകരിക്കുന്നതിൽ പരാജയപ്പെട്ടുവെന്നും പ്രതിപക്ഷം കുറ്റപ്പെടുത്തുന്നു.

നഗരത്തിലെ മലിനീകരണ തോത് സംബന്ധിച്ച് ബൃഹൻമുംബൈ മുനിസിപ്പൽ കോർപ്പറേഷൻ (ബി.എം.സി.), മഹാരാഷ്ട്ര മലിനീകരണ നിയന്ത്രണ ബോർഡ് (എം.പി.സി.ബി.), അമിക്കസ് ക്യൂറി എന്നിവർ സ്വീകരിച്ച പരസ്പരവിരുദ്ധമായ നിലപാടുകളിൽ മുംബൈ ഹൈക്കോടതി വെള്ളിയാഴ്ച അതൃപ്തി പ്രകടിപ്പിച്ചു. ബി.എം.സി.യുടെ മലിനീകരണ നിയന്ത്രണ മാർഗനിർദേശങ്ങൾ യഥാർത്ഥത്തിൽ പാലിക്കപ്പെടുന്നില്ലെന്നും കോടതി നിരീക്ഷിച്ചു.

മുംബൈഡൽഹിവായുഗുണനിലവാരം

സ്വന്തം ലേഖകൻ