ഐശ്വര്യ റായിയുടെ കാറില്‍ ബസ് ഇടിച്ച് അപകടം; ആര്‍ക്കും പരിക്കില്ലെന്ന് റിപ്പോര്‍ട്ട്; സംഭവത്തില്‍ സുരക്ഷാ ഉദ്യോഗസ്ഥന്‍ ബസ് ഡ്രൈവറെ മര്‍ദ്ദിച്ചതായി റിപ്പോര്‍ട്ട്; അപകടത്തിന്റെ സിസിടിവി ദൃശ്യങ്ങള്‍ പുറത്ത്
മുംബൈ: പ്രശസ്ത ബോളിവുഡ് നടി ഐശ്വര്യ റായിയുടെ കാറില്‍ ബസ് ഇടിച്ച് അപകടം. ബുധനാഴ്ച മുംബൈയിലെ ജുഹുവിലായിരുന്നു അപകടം. സംഭവത്തില്‍ ആരും പരിക്കേറ്റിട്ടില്ലെന്നാണ് റിപ്പോര്‍ട്ട്. ബ്രിഹന്‍മുംബൈ ഇലക്ട്രിക് സപ്ലൈ ആന്‍ഡ് ട്രാന്‍സ്‌പോര്‍ട്ട് ബസാണ് നടിയുടെ കാറില്‍ ഇടിച്ചിരുന്നത്. സംഭവസമയത്ത് ഐശ്വര്യ കാറിലില്ലായിരുന്നുവെന്ന് സൂചനയുണ്ട്.
അപകടത്തിന്റെ സിസിടിവി ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചു. ജുഹു ബസ് ഡിപ്പോയില്‍ നിന്ന് പുറപ്പെട്ട ബസ്, അമിതാഭ് ബച്ചന്റെ വീട്ടിന് സമീപം എത്തിയപ്പോള്‍ നിയന്ത്രണം വിട്ട് നടിയുടെ കാറിന് പിന്നില്‍ ഇടിക്കുകയായിരുന്നു. കാറിന് ചെറിയതോതില്‍ മാത്രമാണ് കേടുപാടുകള്‍ സംഭവിച്ചത്. തുടര്‍ന്ന്, ഇടയ്‌ക്കൊരു സമയത്തിനുശേഷം കാര്‍ സ്ഥലത്ത് നിന്ന് നീങ്ങിയതും ദൃശ്യങ്ങളില്‍ കാണാം.
സംഭവത്തെ തുടര്‍ന്ന് അമിതാഭ് ബച്ചന്റെ സുരക്ഷാ ഉദ്യോഗസ്ഥന്‍ ബസ് ഡ്രൈവറെ മര്‍ദ്ദിച്ചതായി റിപ്പോര്‍ട്ടുകളുണ്ട്. ഡ്രൈവര്‍ ഉടന്‍ തന്നെ പോലീസ് കണ്‍ട്രോള്‍ റൂമിലേക്ക് വിവരമറിയിക്കുകയും, പോലീസ് സ്ഥലത്തെത്തുകയും ചെയ്തു. സംഭവം വലിയ പ്രശ്നമായില്ല. അമിതാഭ് ബച്ചന്റെ സുരക്ഷാ സംഘത്തിലെ അംഗങ്ങള്‍ പിന്നീട് ഡ്രൈവറോട് ക്ഷമാപണം ചെയ്തതോടെ വിഷയത്തില്‍ കൂടുതല്‍ നടപടി ഉണ്ടായില്ല. പോലീസിന് ലഭിച്ച ഔദ്യോഗിക പരാതി ഇല്ലെന്നും, ഇതുവരെ എഫ്‌ഐആര്‍ രജിസ്റ്റര്‍ ചെയ്തിട്ടില്ലെന്നുമാണ് വിവരം.
