ആകാശത്ത് പറക്കുന്നതിനിടെ ഒന്ന് ഉറങ്ങിപ്പോയി; ഉടൻ തന്നെ ആർക്കും ശല്യമാകാതെ വിമാനത്തിലെ ജീവനക്കാർ ചെയ്തത്; സോഷ്യൽ മീഡിയയിൽ ചർച്ചയായി പോസ്റ്റ്

മുംബൈ: ആകാശ എയർ വിമാനയാത്രയ്ക്കിടെ ഉറങ്ങിപ്പോയ ഒരു യാത്രക്കാരന് ജീവനക്കാർ നൽകിയത് ഹൃദയംതൊടുന്ന അനുഭവമാണ്. ഭക്ഷണവിതരണ സമയത്ത് യാത്രക്കാരനെ ശല്യപ്പെടുത്താതെ, ഉണരുമ്പോൾ ഭക്ഷണം ലഭ്യമാക്കുമെന്ന് ഉറപ്പുനൽകി സീറ്റിൽ വെച്ച കുറിപ്പ് സമൂഹമാധ്യമങ്ങളിൽ വലിയ പ്രശംസ നേടുകയാണ്. ആകാശ എയർ ജീവനക്കാരുടെ ഈ കരുതലുള്ള നടപടിക്ക് നിരവധി പേരാണ് അഭിനന്ദനം അറിയിച്ചത്.

ജോലി സംബന്ധമായ തിരക്കുകൾ കാരണം വളരെയധികം ക്ഷീണിതനായിരുന്ന കുഷ് എന്ന യാത്രക്കാരനാണ് വിമാനത്തിൽവെച്ച് ഉറങ്ങിപ്പോയത്. ഈ സമയം വിമാനത്തിൽ ഭക്ഷണവിതരണം നടന്നെങ്കിലും, ഉറങ്ങുകയായിരുന്ന അദ്ദേഹത്തെ ശല്യപ്പെടുത്താൻ ജീവനക്കാർ തയ്യാറായില്ല. പകരം, കുഷ് ഉണരുമ്പോൾ കാണാനായി സീറ്റിൽ ഒരു കുറിപ്പ് ഒട്ടിച്ചുവെക്കുകയായിരുന്നു.

കുറിപ്പിൽ ഇങ്ങനെ രേഖപ്പെടുത്തിയിരുന്നു: "നിങ്ങൾ ഉറങ്ങുകയായിരുന്നതിനാൽ നിങ്ങളെ ശല്യപ്പെടുത്തേണ്ട എന്ന് ഞങ്ങൾ കരുതി. അതുകൊണ്ടാണ് ഭക്ഷണം നൽകാതിരുന്നത്. നിങ്ങൾ ഉണരുമ്പോൾ ദയവായി സർവീസ് ബട്ടൺ അമർത്തുക, ഞങ്ങൾ ഭക്ഷണം എത്തിച്ചു നൽകാം."

ഈ കരുതൽ നിറഞ്ഞ സേവനത്തെ 'ഏറ്റവും ചിന്തനീയമായ സേവനം' എന്നാണ് കുഷ് വിശേഷിപ്പിച്ചത്. തന്റെ എക്സ് (X) അക്കൗണ്ടിലൂടെ അദ്ദേഹം ഈ അനുഭവം പങ്കുവെച്ചതോടെയാണ് സംഭവം ശ്രദ്ധേയമായത്.

കുഷിന്റെ ട്വീറ്റിന് മറുപടിയുമായി ആകാശ എയറും രംഗത്തെത്തി. തങ്ങളുടെ യാത്രക്കാർക്ക് സുഖകരവും അവിസ്മരണീയവുമായ യാത്രാനുഭവം നൽകാനാണ് തങ്ങൾ ശ്രമിക്കുന്നതെന്നും, ഇത്തരം നല്ല വാക്കുകൾ ജീവനക്കാർക്ക് വലിയ പ്രചോദനമാണെന്നും കമ്പനി വ്യക്തമാക്കി. യാത്രക്കാരുടെ സൗകര്യത്തിന് മുൻഗണന നൽകുന്ന ഇത്തരം ചെറിയ കാര്യങ്ങളാണ് പലപ്പോഴും വലിയ മാറ്റങ്ങൾ ഉണ്ടാക്കുന്നതെന്ന് സമൂഹമാധ്യമ ഉപയോക്താക്കളും അഭിപ്രായപ്പെട്ടു.