വിജയപുര: സിന്ദഗി താലൂക്കിലെ കന്നോളി ടോൾ ഗേറ്റിന് സമീപം കെ.എസ്.ആർ.ടി.സി ബസും ബൈക്കും കൂട്ടിയിടിച്ചുണ്ടായ തീപിടുത്തത്തിൽ ബൈക്ക് യാത്രികൻ മരിച്ചു. തിങ്കളാഴ്ചയാണ് നാടിനെ നടുക്കിയ അപകടം നടന്നത്. കൂട്ടിയിടിക്ക് പിന്നാലെ ബൈക്കിന് തീപിടിക്കുകയും നിമിഷങ്ങൾക്കുള്ളിൽ തീ ബസ്സിലേക്ക് പടരുകയുമായിരുന്നു.

ബൈക്ക് യാത്രികൻ സംഭവസ്ഥലത്ത് തന്നെ വെന്തുമരിച്ചു. അപകടത്തിന്റെ ആഘാതത്തിൽ ബൈക്ക് പൂർണ്ണമായും കത്തിയമർന്നു. മരിച്ചയാളെ തിരിച്ചറിഞ്ഞിട്ടില്ല. ബൈക്കിൽ നിന്ന് ബസ്സിലേക്ക് തീ പടരുന്നത് ശ്രദ്ധയിൽപ്പെട്ട ഉടൻ ഡ്രൈവറും കണ്ടക്ടറും യാത്രക്കാരും പുറത്തേക്ക് ഓടിയിറങ്ങിയതിനാൽ വലിയൊരു ദുരന്തം ഒഴിവായി. ബസ്സിലുണ്ടായിരുന്നവർ സുരക്ഷിതരാണെന്ന് അധികൃതർ അറിയിച്ചു.

അഗ്നിശമനസേന സ്ഥലത്തെത്തിയാണ് തീ പൂർണ്ണമായും അണച്ചത്. അപകടത്തെത്തുടർന്ന് മേഖലയിൽ ഗതാഗതം തടസ്സപ്പെട്ടു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. മരിച്ചയാളെ തിരിച്ചറിയാനുള്ള ശ്രമങ്ങൾ തുടരുകയാണ്.

കെ എസ് ആർ ടി സി ബസ്ബൈക്ക്അപകടം

സ്വന്തം ലേഖകൻ