ഇനി വേഗതയുടെ രാജാവിനെ കാണാൻ അങ്ങ് ആഫ്രിക്കൻ ഭൂഖണ്ഡം വരെ പോകണ്ട..; ഇന്ത്യയിലെ ആദ്യത്തെ ചീറ്റ സഫാരിക്ക് മധ്യപ്രദേശിലെ കുനോ ദേശീയോദ്യാനത്തിൽ തുടക്കം; ത്രില്ലിൽ സഞ്ചാരികൾ

ഭോപ്പാൽ: വന്യജീവി ടൂറിസത്തിന്റെ ചരിത്രത്തിൽ പുതിയ അധ്യായം രചിച്ച് ഇന്ത്യയിലെ ആദ്യത്തെ ചീറ്റ സഫാരിക്ക് മധ്യപ്രദേശിലെ കുനോ ദേശീയോദ്യാനത്തിൽ തുടക്കമായി. ലോകത്തിലെ ഏറ്റവും വേഗതയേറിയ മൃഗമായ ചീറ്റയെ അടുത്തറിയാനും അവയുടെ സ്വാഭാവിക ആവാസവ്യവസ്ഥയെക്കുറിച്ച് മനസ്സിലാക്കാനും സഞ്ചാരികൾക്ക് ഇത് സുവർണ്ണാവസരമാണ്. ഈ സംരംഭം മേഖലയിലെ ടൂറിസത്തിന് വലിയ ഉത്തേജനം നൽകുമെന്നാണ് പ്രതീക്ഷ.

ഷിയോപൂർ ജില്ലയിലെ കുനോ ദേശീയോദ്യാനം, ചീറ്റ സംരക്ഷണ പദ്ധതിക്കായി തിരഞ്ഞെടുത്ത പ്രധാന സ്ഥലങ്ങളിലൊന്നാണ്. പുൽമേടുകളും ഇരകളുടെ ലഭ്യതയും ഇവിടെ ചീറ്റകളുടെ അതിജീവനത്തിന് സഹായകമായിട്ടുണ്ട്. 2022-ൽ ആദ്യമായി ചീറ്റകളെ ഇവിടെയെത്തിച്ചതിനു ശേഷം, സംരക്ഷണ പ്രവർത്തനങ്ങളുടെ ഫലമായി നിലവിൽ 16 ചീറ്റകൾ ഇവിടെ സുരക്ഷിതമായി വസിക്കുന്നുണ്ട്. ഉയർന്ന നിലവാരമുള്ള വന്യജീവി അനുഭവങ്ങൾ നൽകുന്നതിനാണ് ഈ സഫാരി രൂപകൽപ്പന ചെയ്തിരിക്കുന്നത്. ചീറ്റകൾ ഏറ്റവും സജീവമായിരിക്കുന്ന അതിരാവിലെയും വൈകുന്നേരങ്ങളിലുമാണ് സഫാരികൾ ക്രമീകരിച്ചിരിക്കുന്നത്.

പരിശീലിതരായ ഗൈഡുകളാണ് ഓരോ സഫാരിക്കും നേതൃത്വം നൽകുന്നത്. ചീറ്റകളുടെ സ്വഭാവരീതികൾ, വേട്ടയാടൽ വിദ്യകൾ, ഇന്ത്യയിലേക്കുള്ള ഇവയുടെ തിരിച്ചുവരവ് തുടങ്ങിയ വിഷയങ്ങളിൽ ഗൈഡുകൾ സഞ്ചാരികൾക്ക് വിശദമായ വിവരങ്ങൾ നൽകും. ഫോട്ടോഗ്രാഫിക്ക് അനുയോജ്യമായ തുറന്ന പ്രദേശമായതിനാൽ ആകർഷകമായ ചിത്രങ്ങൾ പകർത്താനും അവസരമുണ്ട്. വന്യജീവികൾക്ക് ശല്യമുണ്ടാകാത്ത രീതിയിൽ കർശനമായ റൂട്ടുകളും സഞ്ചാരികളുടെ എണ്ണത്തിൽ നിയന്ത്രണങ്ങളും ഏർപ്പെടുത്തിയിട്ടുണ്ട്. സഫാരിയിലൂടെ ലഭിക്കുന്ന വരുമാനം ആവാസവ്യവസ്ഥയുടെ പരിപാലനം, ചീറ്റകളുടെ നിരീക്ഷണം, പ്രാദേശിക സമൂഹത്തെ കേന്ദ്രീകരിച്ചുള്ള സംരക്ഷണ പ്രവർത്തനങ്ങൾ എന്നിവയ്ക്കായി ഉപയോഗിക്കും.