ടോയ്ലറ്റ് വേസ്റ്റുകൾ നേരിട്ട് മുകളിലുള്ള കുഴിയിലേക്ക് വഴിതിരിച്ചുവിട്ടു; ഇതോടെ ഇൻഡോറെ ഞെട്ടിച്ച് വൻ ദുരന്തം; മലിനജലം കുടിച്ച് മരിച്ചവരുടെ എണ്ണം പത്തായി ഉയർന്നു; വേദനയിൽ മുങ്ങി കുടുംബങ്ങൾ
ഇൻഡോർ: ഇന്ത്യയിലെ ഏറ്റവും വൃത്തിയുള്ള നഗരമെന്ന ഖ്യാതിയുള്ള ഇൻഡോറിൽ മലിനജലം കുടിവെള്ളത്തിൽ കലർന്ന് 10 പേർ മരിച്ചു. ഭഗീരത്പുരയിൽ വയറിളക്കവും ഛർദ്ദിയും പടർന്നുപിടിച്ചതിനെ തുടർന്ന് 1,100-ൽ അധികം പേർക്ക് രോഗം ബാധിക്കുകയും ചെയ്തിട്ടുണ്ട്. കുടിവെള്ള പൈപ്പ്ലൈനിന് മുകളിലായി നിർമ്മിച്ച ശുചിമുറിയിൽ നിന്നുള്ള മലിനജലം കലർന്നതാണ് ദുരന്തകാരണമെന്ന് ഇൻഡോർ മുനിസിപ്പൽ കോർപ്പറേഷൻ (ഐഎംസി) കണ്ടെത്തി.
പ്രധാന ജലവിതരണ പൈപ്പ്ലൈനിലെ ചോർച്ചയാണ് മലിനീകരണത്തിന് കാരണമെന്ന് ഐഎംസി കമ്മീഷണർ ദിലീപ് കുമാർ യാദവ് വ്യക്തമാക്കി. ടോയ്ലറ്റിൽ നിന്നുള്ള മാലിന്യം പൈപ്പ്ലൈനിന് നേരിട്ട് മുകളിലുള്ള ഒരു കുഴിയിലേക്ക് വഴിതിരിച്ചുവിടുകയായിരുന്നു. ലൈനിലെ അയഞ്ഞ ജോയിന്റിലൂടെയാണ് മലിനജലം കുടിവെള്ള വിതരണ സംവിധാനത്തിലേക്ക് കലരാൻ കാരണമായതെന്നും നഗരസഭാ ഉദ്യോഗസ്ഥർ പറഞ്ഞു. ഭഗീരത്പുരയിലെ താമസക്കാർ രോഗബാധിതരായി ഒരാഴ്ചയ്ക്കുള്ളിൽ നിരവധി മരണങ്ങൾ റിപ്പോർട്ട് ചെയ്തിട്ടുണ്ടെന്ന് മേയർ പുഷ്യമിത്ര ഭാർഗവ പിടിഐ വാർത്താ ഏജൻസിയോട് പറഞ്ഞു.
സംഭവത്തിൽ ഉദ്യോഗസ്ഥർക്ക് വീഴ്ച പറ്റിയെന്ന് മധ്യപ്രദേശ് മന്ത്രി കൈലാഷ് വിജയവർഗിയ സമ്മതിക്കുകയും ഉത്തരവാദിത്തപ്പെട്ടവർക്കെതിരെ നടപടിയെടുക്കുമെന്ന് അറിയിക്കുകയും ചെയ്തു. നഗരവികസന, ഭവന മന്ത്രിയായ വിജയവർഗിയ പ്രതിനിധീകരിക്കുന്ന ഇൻഡോർ -1 നിയമസഭാ മണ്ഡലത്തിലാണ് ഭഗീരത്പുര സ്ഥിതി ചെയ്യുന്നത്.
സ്ഥിതിഗതികൾ അവലോകനം ചെയ്ത മുഖ്യമന്ത്രി മോഹൻ യാദവ്, സംഭവത്തെ അടിയന്തര സമാനമായ സാഹചര്യമെന്ന് വിശേഷിപ്പിച്ചു. ഭാഗീരഥ്പുരയിൽ ഏകദേശം 40,000 പേരെ പരിശോധിച്ചതായും 2,456 സംശയാസ്പദമായ കേസുകൾ കണ്ടെത്തിയതായും അദ്ദേഹം കൂട്ടിച്ചേർത്തു.
