ലോക് ബന്ധു രാജ് ആശുപത്രിയില്‍ വന്‍ തീപിടിത്തം; ഇരുനൂറിലധികം രോഗികളെയും ജീവനക്കാരെയും ഒഴിപ്പിച്ചു; തീ നിയന്ത്രണ വിധേയമാക്കി; തീപിടിത്തത്തിന്റെ കാരണം വ്യക്തമല്ല
ലഖ്‌നൗ: ഉത്തര്‍പ്രദേശിലെ പ്രശസ്തമായ ലോക് ബന്ധു രാജ് നാരായണ്‍ ആശുപത്രിയില്‍ വന്‍ തീപിടിത്തം. ആശുപത്രിയുടെ രണ്ടാം നിലയിലാണ് തിങ്കളാഴ്ച വൈകിട്ട് തീ പടര്‍ന്നത്. ശ്വാസം മുട്ടുന്ന തരത്തില്‍ പുക ഉയരുന്നത് കണ്ടതോടെ, അടിയന്തരമായി ഇരുനൂറിലധികം രോഗികളെയും ജീവനക്കാരെയും ഒഴിപ്പിക്കുകയായിരുന്നു.
തീപിടിത്തത്തില്‍ നിന്ന് ഒരാളെയും ഗൗരവമായി ബാധിക്കാതെയായത് സുരക്ഷാ ജീവനക്കാരുടെയും അഗ്നിശമന സേനയുടെയും സമയോചിതമായ ഇടപെടലിനാലാണെന്ന് അധികൃതര്‍ അറിയിച്ചു. തീ പടര്‍ന്നതിനു പിന്നാലെ നിരവധി അഗ്നിശമന യൂണിറ്റുകള്‍ സ്ഥലത്തെത്തി, തീ നിയന്ത്രണ വിധേയമാക്കി.
ഉപമുഖ്യമന്ത്രി ബ്രജേഷ് പതക് തന്നെ സ്ഥലത്തെത്തി രക്ഷാപ്രവര്‍ത്തനങ്ങള്‍ നിരീക്ഷിച്ചു. മുഖ്യമന്ത്രി യോഗി ആദിത്യനാഥ് സംഭവത്തെക്കുറിച്ച് ഉടന്‍ പ്രതികരിച്ച് ആരോഗ്യവകുപ്പ് ഉദ്യോഗസ്ഥരുമായി ചര്‍ച്ച നടത്തി. തീപിടിത്തത്തിന്റെ യഥാര്‍ഥ കാരണം ഇതുവരെ വ്യക്തമല്ല. വൈദ്യുതലൈനിലെ തകരാറാവാമെന്നാണ് പ്രാഥമിക സംശയം. സംഭവം സംബന്ധിച്ച് വിശദമായ അന്വേഷണത്തിന് ഉത്തരവിട്ടതായി അധികൃതര്‍ അറിയിച്ചു.
