ഗോവ: ഗോവയിൽ അവധിക്കാലം ആഘോഷിക്കാനെത്തിയ യുവതിക്ക് വിനോദസഞ്ചാരിയാണെന്ന് തെറ്റിദ്ധരിച്ച് പുരുഷന്മാരിൽ നിന്നും മോശം അനുഭവം നേരിടേണ്ടി വന്നതായി പരാതി. സൗമ്യ ഖന്ന എന്ന യുവതിയാണ് ഇൻസ്റ്റഗ്രാം വഴി തനിക്കുണ്ടായ ദുരനുഭവം പങ്കുവെച്ചത്. സംഭവത്തിൻ്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.

താൻ പൂർണ്ണമായും വസ്ത്രം ധരിച്ചിരുന്നിട്ടും "ചാർജ് എത്രയാണ്?", "നീ എവിടെ നിന്നാണ്?", "ഇന്ത്യക്കാരിയാണോ അതോ വിദേശിയാണോ?" എന്നിങ്ങനെയുള്ള ചോദ്യങ്ങളുമായി മൂന്നു പുരുഷന്മാർ തന്നെ പിന്തുടർന്നുവെന്നും മോശമായി സംസാരിച്ചുവെന്നും യുവതി വീഡിയോയിൽ പറയുന്നു. ഈ വീഡിയോ ഇതിനോടകം തന്നെ വലിയ ചർച്ചകൾക്ക് വഴിവെച്ചിട്ടുണ്ട്.

സൗമ്യ പങ്കുവെച്ച വീഡിയോക്ക് താഴെ നിരവധി അഭിപ്രായങ്ങളാണ് വന്നുകൊണ്ടിരിക്കുന്നത്. ഇത്തരം സംഭവങ്ങൾ ഗോവയിൽ മാത്രമല്ല, രാജ്യത്തിൻ്റെ പല ഭാഗങ്ങളിലും സ്ത്രീകൾ ഒറ്റയ്ക്ക് യാത്ര ചെയ്യുമ്പോൾ നേരിടേണ്ടി വരുന്നതായി പലരും ചൂണ്ടിക്കാണിക്കുന്നു. "പ്രശ്നം ഗോവയോ ഡൽഹിയോ അല്ല, പുരുഷന്മാരാണ്" എന്നൊരു കമന്റ് ഏറെ ശ്രദ്ധിക്കപ്പെട്ടു. ഇത്തരം അനുഭവങ്ങൾ അപലപനീയമാണെന്നും ഇത്തരം പെരുമാറ്റങ്ങൾക്കെതിരെ നടപടിയെടുക്കണമെന്നും ആവശ്യമുയരുന്നുണ്ട്.

യുവതിദുരനുഭവംഗോവ

സ്വന്തം ലേഖകൻ