ദേഷ്യം സഹിക്കാൻ വയ്യാതെ ഓടി വന്ന് മൊബൈൽ ടവറിന് മുകളിലേക്ക് ചാടിക്കയറിയ യുവതി; താഴെ അനുനയിപ്പിക്കാൻ ശ്രമിക്കുന്ന നാട്ടുകാർ; പോലീസ് എത്തിയപ്പോൾ അറിഞ്ഞത് മറ്റൊന്ന്

മിർസാപൂർ: ദീപാവലിക്ക് വീട് വൃത്തിയാക്കാൻ അമ്മ ആവശ്യപ്പെട്ടതിലുള്ള ദേഷ്യം തീർക്കാൻ യുവതി മൊബൈൽ ടവറിൽ കയറിയ സംഭവം ഉത്തർപ്രദേശിലെ മിർസാപൂരിൽ. കച്ച്‌വ പോലീസ് സ്റ്റേഷൻ പരിധിയിലെ ദീഹ് ഗ്രാമത്തിലാണ് ഈ വിചിത്ര സംഭവം നടന്നത്. സംഭവത്തിന്റെ വീഡിയോ സാമൂഹിക മാധ്യമങ്ങളിൽ വ്യാപകമായി പ്രചരിക്കുന്നുണ്ട്.

വീട് വൃത്തിയാക്കുന്ന ജോലി സഹോദരനെയോ മറ്റ് കുടുംബാംഗങ്ങളെയോ ഏൽപ്പിക്കാതെ തന്നിൽ മാത്രം ഏൽപ്പിച്ചതിലുള്ള അതൃപ്തിയാണ് യുവതിയെ പ്രകോപിപ്പിച്ചത്. ഇതേത്തുടർന്ന് ദേഷ്യത്തോടെ മൊബൈൽ ടവറിലേക്ക് ഓടിക്കയറുകയായിരുന്നു യുവതി. ടവറിൽ യുവതിയെ കണ്ട നാട്ടുകാർ ഉടൻതന്നെ വിവരമറിയിക്കുകയും തുടർന്ന് പോലീസ് സ്ഥലത്തെത്തി യുവതിയെ അനുനയിപ്പിച്ച് താഴെയിറക്കുകയും ചെയ്തു.

"ദീപാവലിക്ക് വീട് വൃത്തിയാക്കാൻ അമ്മ മകളോട് ആവശ്യപ്പെട്ടെന്നും ഇതിൽ ദേഷ്യം പൂണ്ടാണ് അവൾ ടവറിൽ കയറിയതെന്നും സദർ സർക്കിൾ ഓഫീസർ അമർ ബഹദൂർ പറഞ്ഞു. സംഭവം ഏറെ വിചിത്രമാണെന്നും അദ്ദേഹം കൂട്ടിച്ചേർത്തു.