അമ്മയെ അസഭ്യം പറഞ്ഞ അയൽവാസിയെ കമ്പിവടികൊണ്ട് തലയ്ക്കടിച്ച് കൊന്നു; പിന്നാലെ പോലീസിൽ വിവരം അറിയിച്ചു; 26കാരൻ അറസ്റ്റിൽ

ബെംഗളൂരു: വീട്ടിലെത്തി അമ്മയെ അസഭ്യം പറഞ്ഞ അയൽവാസിയെ തലയ്ക്കടിച്ചു കൊലപ്പെടുത്തിയ കേസിൽ 26-കാരനായ യുവാവ് അറസ്റ്റിൽ. ബെംഗളൂരു ഉള്ളാൽ ഉപനഗരയിലെ രാമചന്ദ്രപ്പ ലേഔട്ടിൽ താമസിക്കുന്ന കാർത്തിക് ആണ് അയൽവാസിയായ 36-കാരൻ അവിനാശിനെ കമ്പിവടികൊണ്ട് തലയ്ക്കടിച്ച് കൊലപ്പെടുത്തിയത്.

സംഭവ ദിവസം അമ്മ സുമംഗലയുടെ വീട്ടിലെത്തി അവിനാശ് അവരെ അസഭ്യം പറഞ്ഞുവെന്ന് പറയപ്പെടുന്നു. അവിനാശ് അസഭ്യം പറയുമ്പോൾ കാർത്തിക് വീട്ടിൽ ഉണ്ടായിരുന്നില്ല. എന്നാൽ, സുമംഗല ഫോണിൽ വിളിച്ച് വിവരം അറിയിച്ചതിനെ തുടർന്ന് കാർത്തിക് സംഭവസ്ഥലത്തെത്തുകയായിരുന്നു. തുടർന്ന്, അവിനാശിനെ കമ്പിവടികൊണ്ട് തലയ്ക്കടിച്ച് വീഴ്ത്തി. അടിയേറ്റ ഉടൻ തന്നെ അവിനാശ് മരിച്ചു. കൊലപാതകത്തിന് ശേഷം കാർത്തിക്ക് പോലീസിൽ വിവരം അറിയിക്കുകയും കീഴടങ്ങുകയുമായിരുന്നു.