ഭര്‍ത്താവിന് കുംഭമേളയില്‍ പങ്കെടുക്കാനായില്ല; വിഡിയോ കോള്‍ ചെയ്ത് ഫോണ്‍ വെള്ളത്തില്‍ മുക്കി ഭാര്യ; വീഡിയോ വൈറലായതോടെ കമന്റുകളും ട്രോളുകളും
ഭര്‍ത്താവിനെ വിഡിയോ കോള്‍ ചെയ്ത് ഫോണ്‍ ഗംഗയില്‍ മുക്കി ഭാര്യ
പ്രയാഗ്രാജ്: മഹാകുംഭമേളയില്‍ പങ്കെടുക്കാന്‍ കോടി കണക്കിന് ഭക്തരാണ് എത്തിയത്. കുംഭമേള അവസാനഘട്ടത്തിലേക്ക് കടക്കുമ്പോള്‍ പങ്കെടുക്കാന്‍ കഴിയാത്തതിന്റെ നിരാശയും നിരവധിപേര്‍ പങ്കുവെക്കുന്നു. എന്നാല്‍ മഹാ കുംഭമേളയില്‍ ഭര്‍ത്താവ് പുണ്യസ്‌നാനത്തിന് എത്താതിരുന്നതിന് യുവതി സ്വീകരിച്ച അസാധാരണ പരിഹാരവും സമൂഹമാധ്യമങ്ങളില്‍ വൈറലാണ്.
ഭര്‍ത്താവില്ലാതെ പുണ്യസ്‌നാന ചടങ്ങില്‍ പങ്കെടുത്ത യുവതി ഭര്‍ത്താവിനെ വിഡിയോ കോള്‍ ചെയ്ത ശേഷം ഫോണ്‍ വെള്ളത്തില്‍ നിരവധി തവണ മുക്കിയാണ് ആചാരത്തിന്റെ ഭാഗമാക്കിയത്. ഈ വിഡിയോ സമൂഹ മാധ്യമത്തില്‍ പ്രചരിപ്പിച്ചിരുന്നു. സംഭവം വൈറലായതോടെ നിരവധി കമന്റുകളും ട്രോളുകളുമാണ് വിഡിയോക്ക് താഴെ നിറയുന്നത്.
യുവതിയുടെ യുക്തിയെ ചോദ്യം ചെയ്ത് നിരവധിപേര്‍ വിമര്‍ശനമുയര്‍ത്തുകയും ചെയ്തു. ഫോണ്‍ വെള്ളത്തില്‍ വീണിരുന്നെങ്കില്‍ ഭര്‍ത്താവിന് 'മോക്ഷം' ലഭിക്കുമായിരുന്നെന്നാണ് ഒരാള്‍ കമന്റ് ചെയ്തതത്.
ഫെബ്രുവരി 26ന് മഹാശിവരാത്രിയില്‍ അവസാനിക്കുന്ന കുംഭമേളയില്‍ ഈ വര്‍ഷം 63 കോടി ആളുകളാണ് പങ്കെടുത്തത്. കുംഭമേളയില്‍ നേരിട്ട് പങ്കെടുക്കാനാകാത്ത സാഹചര്യത്തില്‍ ചിലര്‍ അവരുടെ പ്രിയപ്പെട്ടവരുടെ ഫോട്ടോകള്‍ ഗംഗയില്‍ മുക്കിയും പ്രതീകാത്മക പേരുകള്‍ വിളിച്ച് ഗംഗാസ്നാനം നടത്തുകയും ചെയ്തിരുന്നു.
