എയര്‍ബസ് വിമാനങ്ങളില്‍ സോഫ്റ്റ്‍വെയർ മാറ്റം; ഇന്‍ഡിഗോയും എയര്‍ ഇന്ത്യയും അടക്കം ഇന്ത്യയിലെ 200ഓളം വിമാന സര്‍വീസുകളെ ബാധിക്കും: സര്‍വീസുകളില്‍ തടസ്സം നേരിട്ടേക്കുമെന്ന് സൂചന
സോഫ്റ്റ്‍വെയർ മാറ്റം; ഇന്ത്യയിലെ 200ഓളം വിമാന സര്‍വീസുകളെ ബാധിക്കും:
ന്യൂഡല്‍ഹി: എയര്‍ബസ് വിമാനങ്ങളിലെ സോഫ്റ്റ്‍വെയർ മാറ്റം ഇന്ത്യയിലെ 200ഓളം വിമാന സര്‍വീസുകളെ ബാധിക്കുമെന്ന് റിപ്പോര്‍ട്ട്. ഇന്ത്യന്‍ എയര്‍ലൈന്‍സുകളായ ഇന്‍ഡിഗോ, എയര്‍ ഇന്ത്യ, എയര്‍ ഇന്ത്യ എക്‌സ്പ്രസ് എന്നിവ പ്രവര്‍ത്തിപ്പിക്കുന്ന ഏകദേശം 200-250 വിമാനങ്ങളെ തീരുമാനം ബാധിക്കും. സോഫ്റ്റ്‍വെയർഅപ്ഡേഷനുവേണ്ടി ഈ വിമാനങ്ങള്‍ നിശ്ചിതസമയത്തേക്ക് നിലത്തിറക്കേണ്ടതിനാല്‍ സര്‍വീസുകളില്‍ തടസ്സം നേരിട്ടേക്കുമെന്നാണ് സൂചന.
അതിതീവ്രമായ സൗരവികിരണം ഫ്‌ലൈറ്റ് കണ്‍ട്രോള്‍ സംബന്ധിച്ച നിര്‍ണായക ഡേറ്റയെ ബാധിക്കാനിടയുണ്ടെന്ന വിലയിരുത്തലിനെത്തുടര്‍ന്നാണ് എയര്‍ബസ് എ320 വിഭാഗത്തില്‍പ്പെട്ട ഒട്ടേറെ വിമാനങ്ങളില്‍ സോഫ്റ്റ്വെയര്‍ മാറ്റങ്ങള്‍ നിര്‍ബന്ധമാക്കിയിരിക്കുന്നത്. ചില വിമാനങ്ങള്‍ വൈകാനോ റദ്ദാക്കാനോ ഇടയുണ്ടെന്ന് ഇന്ത്യന്‍ എയര്‍ലൈന്‍സ് അറിയിച്ചു. ആഗോളതലത്തില്‍ 6000 വിമാനങ്ങളെ ബാധിക്കപ്പെടുമെന്നാണ് വിലയിരുത്തല്‍.
മുന്‍കരുതല്‍ നടപടികള്‍ സ്വീകരിക്കാന്‍ എയര്‍ബസ് ഓപ്പറേറ്റര്‍മാര്‍ക്ക് നിര്‍ദേശം നല്‍കിയിട്ടുണ്ടെന്നാണ് വിവരം. ഇതിന്റെ അടിസ്ഥാനത്തില്‍ യൂറോപ്യന്‍ യൂണിയന്‍ വ്യോമയാന സുരക്ഷാ ഏജന്‍സി(ഇഎഎസ്എ) അടിയന്തര മാര്‍ഗനിര്‍ദേശം ഉടന്‍ പുറത്തിറക്കും.
