ന്യൂഡല്‍ഹി: ഇന്ത്യയില്‍ റോഡപകടങ്ങളില്‍ മരിക്കുന്നവരുടെ എണ്ണം വര്‍ധിച്ചതായി കേന്ദ്ര മന്ത്രി നിതിന്‍ ഗഡ്കരി. 2024 ല്‍ റോഡപകട മരണം 1.77 ലക്ഷമായി ഉയര്‍ന്നുവെന്നും പ്രതിദിനം ഏകദേശം 485 പേര്‍ മരണപ്പെടുന്നുവെന്നാണ് റിപ്പോര്‍ട്ട് ചെയ്യപ്പെട്ട കണക്കുകള്‍ സൂചിപ്പിക്കുന്നുതെന്നും മന്ത്രി പാര്‍ലമെന്റിനെ അറിയിച്ചു.

4,80,583 റോഡ് അപകടങ്ങളാണ് 2023 ല്‍ ഉണ്ടായത്. 1,72,890 പേര്‍ മരിക്കുകയും 4,62,825 പേര്‍ക്ക് പരിക്കേല്‍ക്കുകയും ചെയ്തു. എന്നാല്‍ 2024 ലെ കണക്ക് അനുസരിച്ച് മരണസംഖ്യ 1.77 ലക്ഷമായി ഉയര്‍ന്നു. ഇത് പ്രകാരം, രാജ്യത്ത് ഓരോ ദിവസവും റോഡപകടങ്ങളില്‍ 485 പേര്‍ക്ക് ജീവന്‍ നഷ്ടപ്പെടുന്നു എന്നാണ് കണക്ക്. റോഡപകടങ്ങളിലെ മരണങ്ങളില്‍ 60 ശതമാനവും 18-നും 34-നും ഇടയില്‍ പ്രായമുള്ള യുവാക്കളാണ് എന്നതാണ് ഏറ്റവും ഞെട്ടിക്കുന്ന കണക്ക്. റോഡപകടങ്ങളിലെ മരണം രാജ്യത്തിന് അന്താരാഷ്ട്ര വേദികളില്‍ പോലും നാണക്കേടുണ്ടാക്കുന്നതാണെന്നും റോഡപകടങ്ങള്‍ തടയാന്‍ കര്‍ശനമായ നടപടികള്‍ സ്വീകരിക്കേണ്ടത് അത്യാവശ്യമാണെന്നും അദ്ദേഹം ലോക്‌സഭയെ അറിയിച്ചു.

റോഡപകടങ്ങള്‍ക്ക് പ്രധാന കാരണം റോഡ് എഞ്ചിനീയറിങ്ങിലെ പിഴവുകളും റോഡിലെ നിയമങ്ങള്‍ പാലിക്കാത്തതുമാണെന്ന് മന്ത്രി ചൂണ്ടിക്കാട്ടി. മോശം റോഡ് നിര്‍മ്മാണ രേഖകളും അശാസ്ത്രീയമായ രൂപകല്‍പ്പനയും അപകടങ്ങളുടെ 'ബ്ലാക്ക് സ്‌പോട്ടുകള്‍' വര്‍ദ്ധിക്കാന്‍ കാരണമായിട്ടുണ്ട്. പ്രശ്‌നം പരിഹരിക്കുന്നതിനായി രാജ്യവ്യാപകമായി 77 അതീവ അപകട സാധ്യതയുള്ള റോഡുകള്‍ കണ്ടെത്തിയിട്ടുണ്ട്. ഇവയുടെ നവീകരണത്തിനും സുരക്ഷാ സംവിധാനങ്ങള്‍ ഒരുക്കുന്നതിനുമായി 40,000 കോടി അനുവദിച്ചിട്ടുണ്ടെന്നും മന്ത്രി വ്യക്തമാക്കി.

ഇന്ത്യറോഡ് അപകടംനിതിന്‍ ഗഡ്കരി

സ്വന്തം ലേഖകൻ