വിവാഹം കഴിഞ്ഞ് മാസങ്ങള്‍ക്കുള്ളില്‍ പീഡനം തുടങ്ങി; ദീപ്തിയെ ഭര്‍ത്താവും കുടുംബവും ശാരീരികവും മാനസികവുമായി പീഡിപ്പിച്ചു: പാന്‍മസാല വ്യവസായിയുടെ കുടുംബത്തിനെതിരെ ഗുരുതര ആരോപണം
പാന്‍മസാല വ്യവസായിയുടെ കുടുംബത്തിനെതിരെ ഗുരുതര ആരോപണം
ന്യൂഡല്‍ഹി: മരുമകളുടെ മരണത്തിന് പിന്നാലെ പാന്‍മസാല വ്യവസായിയുടെ കുടുംബത്തിനെതിരെ ഗുരുതര ആരോപണവുമായി മരിച്ച യുവതിയുടെ അമ്മ രംഗത്ത്. 2010 ഡിസംബറിലാണ് ദീപ്തി വിവാഹിതയായത്. വിവാഹം കഴിഞ്ഞ് ഭര്‍തൃവീട്ടിലെത്തി മാസങ്ങള്‍ക്കുള്ളില്‍ തന്നെ ഭര്‍ത്താവും വീട്ടുകാരും പീഡനം ആരംഭിച്ചതായും യുവതിയുെട അമ്മ വെളിപ്പെടുത്തി.
കമല പസന്ത് പാന്‍ മസാല ബ്രാന്‍ഡ് ഉടമ കമല്‍ കിഷോര്‍ ചൗരസ്യയുടെ മരുമകള്‍ ദീപ്തി (38) യെയാണ് തെക്കുപടിഞ്ഞാറന്‍ ഡല്‍ഹിയിലെ വസതിയില്‍ തൂങ്ങിമരിച്ച നിലയില്‍ കണ്ടെത്തിയത്. ഡല്‍ഹിയിലെ വസന്ത് വിഹാറിലെ വസതിയില്‍ വച്ച് ദീപ്തി ആത്മഹത്യ ചെയ്തതിനു പിന്നാലെ പാന്‍മസാല വ്യവസായിയുടെ കുടുംബത്തിനെതിരെ രംഗത്തെത്തുകയാണ് മാതാവ്.
കേസ് എല്ലാ കോണുകളില്‍ നിന്നും സിബിഐ അന്വേഷിക്കണമെന്നും ദീപ്തിയുടെ അമ്മ ആവശ്യപ്പെട്ടതായി വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്തു. ദീപ്തി മരിച്ച് ദിവസങ്ങള്‍ക്ക് ശേഷമാണ് ഡല്‍ഹി പൊലീസ് ഭര്‍ത്താവിനും ഭര്‍തൃമാതാവിനുമെതിരെ എഫ്ഐആര്‍ റജിസ്റ്റര്‍ ചെയ്തു. മകളുടെ ഭര്‍ത്താവും കുടുംബവും വളരെക്കാലമായി ശാരീരികവും മാനസികവുമായി ദീപ്തിയെ പീഡിപ്പിച്ചിരുന്നെന്നും ദീപ്തിയുടെ അമ്മ ആരോപിച്ചു.
നവംബര്‍ 25 ന് രാവിലെ 11.30 ഓടെയാണ് ദീപ്തി ആത്മഹത്യ ചെയ്തത്. ഉച്ചകഴിഞ്ഞ് വസന്ത് വിഹാറിലെ വീട്ടിലെ ഒരു മുറിയില്‍ ദീപ്തിയെ തൂങ്ങിമരിച്ച നിലയില്‍ കണ്ടെത്തുകയായിരുന്നു. ദീപ്തിയുടെ മുറിയില്‍ നിന്ന് കണ്ടെടുത്ത ഒരു ഡയറിയില്‍ കുടുംബബന്ധത്തിലെ പ്രശ്നങ്ങള്‍ പരാമര്‍ശിച്ചിരുന്നു. എന്നാല്‍ ഭര്‍ത്താവും കുടുമംബവും ആരോപണങ്ങളോട് ഇതുവരെ പ്രതികരിച്ചിട്ടില്ല.
