വൈദ്യുതി ടവറിന് മുകളിൽ അള്ളിപിടിച്ചിരുന്ന് ഒരാളുടെ കൈവിട്ട കളി; ഡാ..മോനെ താഴെ ഇറങ്ങെന്ന് ഉച്ചത്തിൽ വിളിച്ചുകൂവുന്ന നാട്ടുകാർ; കാരണം വിചിത്രമെന്ന് ബന്ധുക്കൾ

കനൗജ്: ഭാര്യാ സഹോദരിയെ വിവാഹം കഴിക്കണമെന്നാവശ്യപ്പെട്ട് വൈദ്യുതി ടവറിൽ കയറി യുവാവിന്‍റെ വിചിത്രമായ പ്രതിഷേധം. ഉത്തർപ്രദേശിലെ കനൗജിലാണ് നാടിനെ നടുക്കിയ സംഭവം. രാജ് സക്സേന എന്ന യുവാവാണ് നാട്ടുകാരെ മുൾമുനയിലാക്കിയത്.

2021-ൽ രാജ് സക്സേനയുടെ ആദ്യ വിവാഹം നടന്നു. ഒരു വർഷത്തിനു ശേഷം ഭാര്യ രോഗബാധിതയായി മരിച്ചു. തുടർന്ന്, രാജ് ഭാര്യയുടെ സഹോദരിയെ വിവാഹം കഴിച്ചു. ഈ ബന്ധം ആരംഭിച്ച് രണ്ട് വർഷത്തിന് ശേഷമാണ് രാജ് മൂന്നാമത്തെ സഹോദരിയുമായി പ്രണയത്തിലാവുകയും അവരെ വിവാഹം കഴിക്കണമെന്ന് ആവശ്യപ്പെടുകയുമായിരുന്നു.

കഴിഞ്ഞ ദിവസം ഈ ആവശ്യം ഭാര്യയെ അറിയിച്ചപ്പോൾ അവർ എതിർത്തു. ഇതേത്തുടർന്ന് പ്രകോപിതനായ രാജ്, പ്രദേശത്തെ വൈദ്യുതി ടവറിൽ കയറി മൂന്നാമത്തെ സഹോദരിയെ വിവാഹം കഴിച്ചു നൽകണമെന്ന് ഉറക്കെ ആവശ്യപ്പെട്ടു.

ഏഴ് മണിക്കൂറോളം നീണ്ട അനുനയത്തെ തുടർന്ന്, അദ്ദേഹത്തിൻ്റെ ഭാര്യയുടെ സഹോദരിയെ വിവാഹം കഴിച്ചു നൽകാം എന്ന് ഉറപ്പ് നൽകിയ ശേഷമാണ് പോലീസ് ഉദ്യോഗസ്ഥരും കുടുംബാംഗങ്ങളും ചേർന്ന് യുവാവിനെ ടവറിൽ നിന്ന് താഴെയിറക്കിയത്. മൂന്നാമത്തെ സഹോദരിക്കും തന്നെ ഇഷ്ടമാണെന്ന് രാജ് മാധ്യമപ്രവർത്തകരോട് പറഞ്ഞു. ഈ സംഭവം ഉത്തർപ്രദേശിൽ വലിയ ചർച്ചകൾക്ക് വഴിവെച്ചിട്ടുണ്ട്.