ഹൈക്കോടതി ജഡ്ജിയുടെ മകളെന്ന വ്യാജേദ പണം തട്ടി; വനിതാ കോണ്‍സ്റ്റബിള്‍ പിടിയില്‍; പണം തട്ടിയത് പോലീസ് ഉദ്യോഗസ്ഥരുടെ പക്കല്‍ നിന്നും
ചെന്നൈ: ഹൈക്കോടതി ജഡ്ജിയുടെ മകളെന്ന വ്യാജേന തിരിച്ചറിയല്‍ രേഖ ഉപയോഗിച്ച് പൊലീസ് ഉദ്യോഗസ്ഥരെ ഭീഷണിപ്പെടുത്തുകയും പണം തട്ടുകയും ചെയ്ത വനിതാ കോണ്‍സ്റ്റബിള്‍ അറസ്റ്റിലായി. എസ്പ്ലനേഡ് സ്റ്റേഷനിലെ വനിതാ കോണ്‍സ്റ്റബിളായ രേഖയ്ക്കെതിരെയാണ് നടപടി. നിലവില്‍ അഞ്ച് മാസത്തോളം സേവനത്തില്‍ നിന്നും വിട്ടുനിന്നിരുന്നയാളാണ് രേഖ എന്നാണ് പൊലീസ് വ്യക്തമാക്കുന്നത്.
പൊലീസിന്റെ വിശദീകരണം പ്രകാരം, സെമ്പിയം സ്റ്റേഷനിലേക്കുള്ള ഫോണില്‍ വിളിച്ച യുവതി താന്‍ ഹൈക്കോടതി ജഡ്ജിയുടെ മകളാണെന്ന് ആരോപിച്ചു. സമീപത്തെ ഹോട്ടലില്‍ താമസിച്ചതിനും ഭക്ഷണച്ചെലവിനും വേണ്ടി ബില്‍ അടയ്ക്കാന്‍ ആവശ്യപ്പെട്ടതോടെ പൊലീസ് ഉദ്യോഗസ്ഥര്‍ പണം നല്‍കി. എന്നാല്‍ യുവതിയുടെ പെരുമാറ്റത്തില്‍ സംശയം തോന്നിയ ഉന്നത പൊലീസ് ഉദ്യോഗസ്ഥര്‍ തുടര്‍ന്നും അന്വേഷണം നടത്തി.
ഹോട്ടലിലെ സിസിടിവി ദൃശ്യങ്ങള്‍ പരിശോധിച്ചതിലും വ്യക്തമായ വിവരങ്ങള്‍ ശേഖരിച്ചതിലുമാണ് യഥാര്‍ഥാവസ്ഥ പുറത്തായത്. തുടര്‍ന്ന് പൊലീസ് നടത്തിയ അന്വേഷണത്തില്‍ തട്ടിപ്പ് നടത്തിയയാള്‍ രേഖയാണെന്ന് തിരിച്ചറിഞ്ഞു. സംഭവത്തെ തുടര്‍ന്ന് യുവതിയെ അറസ്റ്റ് ചെയ്ത് കസ്റ്റഡിയില്‍ എടുത്തതായി പൊലീസ് അറിയിച്ചു. സംഭവം പൊലീസ് വിഭാഗത്തിനുള്ളില്‍ വലിയ ചര്‍ച്ചയ്ക്കാണ് വഴിയൊരുക്കിയിരിക്കുന്നത്. ഒരു സര്‍ക്കാര്‍ ഉദ്യോഗസ്ഥ ഇത് പോലെ ചട്ടങ്ങള്‍ ലംഘിച്ച് തട്ടിപ്പ് നടത്താന്‍ ശ്രമിച്ച സംഭവത്തില്‍ കര്‍ശന നടപടി സ്വീകരിക്കുമെന്നും മുതിര്‍ന്ന പൊലീസ് ഉദ്യോഗസ്ഥര്‍ അറിയിച്ചു.
