അസഗാവോ: ഗോവയിൽ കാറിൽ ജീപ്പിടിച്ച് വയോധികൻ കൊല്ലപ്പെട്ട സംഭവത്തിൽ പ്രതിയെ രക്ഷിക്കാൻ ആസൂത്രിത നീക്കങ്ങൾ നടക്കുന്നതായി ആരോപണം. ഹ്യുണ്ടായ് ഐ20 കാറിൽ മഹീന്ദ്ര ഥാർ ഇടിച്ചാണ് അപകടമുണ്ടായത്. ഡൽഹി ഹൗസ് ഖാസ് സ്വദേശിയായ 19 കാരൻ ശൗര്യ ഗോയലാണ് വാഹനം ഓടിച്ചതെന്നാണ് പോലീസ് പറയുന്നത്. കേസിൽ ശൗര്യ ഗോയലിനെ പ്രധാന പ്രതിയാക്കിയാണ് എഫ്.ഐ.ആർ രജിസ്റ്റർ ചെയ്തിരിക്കുന്നത്. എന്നാൽ, അപകടത്തിന് തൊട്ടുപിന്നാലെ ഥാറിലുണ്ടായിരുന്നവർ ഡ്രൈവർ സീറ്റ് മാറാൻ ശ്രമിച്ചതായി ദൃക്സാക്ഷികൾ പറയുന്നു. യുവതിയാണ് വാഹനം ഓടിച്ചിരുന്നതെന്നാണ് വെളിപ്പെടുത്തൽ.

വാടകയ്ക്കെടുത്ത മഹീന്ദ്ര ഥാറാണ് പ്രതി ഓടിച്ചിരുന്നതെന്ന് എഫ്.ഐ.ആർ വ്യക്തമാക്കുന്നു. അപകടത്തിന് പിന്നാലെ പുറത്തുവന്ന വീഡിയോ ദൃശ്യങ്ങളിൽ, ശൗര്യയുടെ തൊട്ടടുത്തിരുന്ന യുവതി മുഖം മറയ്ക്കാൻ ശ്രമിക്കുന്നത് കാണാം. ശൗര്യ തന്റെ പിതാവിനെ ഫോണിൽ വിളിച്ചുകൊണ്ട് വാഹനത്തിൽ നിന്ന് പുറത്തിറങ്ങുന്നതും ദൃശ്യങ്ങളിലുണ്ട്. കൂടാതെ, എസ്.യു.വി.യുടെ പിൻസീറ്റുകളിൽ മൂന്നിലധികം യുവതികൾ കൂടി ഉണ്ടായിരുന്നുവെന്നും ദൃശ്യങ്ങളിൽ നിന്ന് വ്യക്തമാണ്.

മനുഷ്യജീവന് വിലകൽപ്പിക്കാതെ, യാതൊരു ജാഗ്രതയുമില്ലാതെ അമിതവേഗതയിലാണ് ശൗര്യ വാഹനം ഓടിച്ചിരുന്നത്. മാപുസയിൽ നിന്ന് അഞ്ജുനയിലേക്ക് പോവുകയായിരുന്ന മഹീന്ദ്ര ഥാർ അസഗാവോയിലെ ഹാപ്പി ബാറിന് സമീപമുള്ള ജംഗ്ഷനിൽ വെച്ച് നിയന്ത്രണം വിട്ട് ഹ്യുണ്ടായ് ഐ20 കാറിലേക്ക് ഇടിച്ചുകയറുകയായിരുന്നു. അപകടത്തിൽ ഐ20 ഓടിച്ചിരുന്ന ഭോപ്പാൽ സ്വദേശിയായ 65 വയസ്സുകാരൻ ഭഗത് റാം കൊല്ലപ്പെട്ടു. അസഗാവോയിൽ നിന്ന് പറ വില്ലേജ് ഭാഗത്തേക്ക് പോകുന്നതിനിടെയാണ് ഇദ്ദേഹത്തിന്റെ വാഹനത്തിൽ ഥാർ ഇടിച്ചത്.

അപകടത്തിൽ ഇരു വാഹനങ്ങൾക്കും ഗുരുതരമായ കേടുപാടുകൾ സംഭവിച്ചു. പുറത്തുവന്ന ദൃശ്യങ്ങൾ പ്രകാരം ഹ്യുണ്ടായ് ഐ20 കാറിന്റെ ഇടതുഭാഗം പൂർണ്ണമായും തകർന്ന നിലയിലാണുള്ളത്. ഹാച്ച്ബാക്കിന്റെ മുൻഭാഗവും പാടെ തകർന്നു. അപകടത്തിന് പിന്നാലെ ഭഗത് റാമിനെ മാപുസ ജില്ലാ ആശുപത്രിയിൽ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു. വയോധികനൊപ്പം കാറിലുണ്ടായിരുന്ന അഞ്ചുമാസം പ്രായമുള്ള കുഞ്ഞ് ഉൾപ്പെടെയുള്ള മറ്റ് രണ്ട് യാത്രക്കാർക്ക് നിസാര പരിക്കേറ്റു.

ഒരു പെൺകുട്ടിയാണ് വാഹനം ഓടിച്ചിരുന്നതെന്നും അവളെ രക്ഷിക്കാൻ വേണ്ടി പിന്നീട് ഡ്രൈവറെ മാറ്റാൻ ശ്രമം നടന്നതായും ദൃക്സാക്ഷികൾ ആരോപിക്കുന്നു. "ആദ്യം ഒരു പെൺകുട്ടിയായിരുന്നു വണ്ടി ഓടിച്ചിരുന്നത്, പിന്നീട് ഡ്രൈവറെ മാറ്റി. മുതിർന്ന പൗരന്മാരുടെ അവസ്ഥ ഗുരുതരമാണ്. മാപുസ ഭാഗത്തുനിന്നാണ് ഈ കാർ വന്നത്," ഒരു ദൃക്സാക്ഷി പറഞ്ഞു.

ഈ ആരോപണം തെളിവുകൾ സഹിതം സ്ഥിരീകരിക്കപ്പെട്ടാൽ കേസ് അന്വേഷണം സങ്കീർണ്ണമാകും. സംഭവസ്ഥലത്തുനിന്ന് പുറത്തുവന്ന ദൃശ്യങ്ങളിൽ, ഥാറിലുണ്ടായിരുന്ന ഒരു യുവാവ് ഫോണിൽ സംസാരിക്കുന്നത് കാണാം. "പപ്പാ, ഞാൻ ജംഗ്ഷനിലായിരുന്നു..." എന്ന് ഇയാൾ പറയുന്നത് വീഡിയോയിൽ വ്യക്തമായി കേൾക്കാം.

അപകടമുണ്ടാക്കിയ വാടക വാഹനം പോലീസ് പിടിച്ചെടുത്തു. അശ്രദ്ധമായും അമിതവേഗത്തിലും വാഹനമോടിച്ച് മരണത്തിന് കാരണമായതിനാണ് പോലീസ് കേസെടുത്തിരിക്കുന്നത്. 'ഡ്രൈവറെ മാറ്റി' എന്ന ആരോപണത്തെക്കുറിച്ച് വിശദമായ അന്വേഷണം നടന്നുവരികയാണ്. അപകടത്തിന്റെ പൂർണ്ണരൂപം വ്യക്തമാക്കുന്നതിനായി ഫോറൻസിക് തെളിവുകൾ, ദൃക്സാക്ഷി മൊഴികൾ, വീഡിയോ ദൃശ്യങ്ങൾ എന്നിവ പോലീസ് പരിശോധിച്ചു വരികയാണ്.

ഗോവഹ്യുണ്ടായ്മഹീന്ദ്ര ഥാർഅപകടം

സ്വന്തം ലേഖകൻ