പദ്ധതിയുടെ ചെലവുകള്‍ പെരുപ്പിച്ചുകാട്ടിയെന്നും അധിക ഫണ്ട് ഷെല്‍ കമ്പനികളിലൂടെ നിയമ വിരുദ്ധമായി വഴിതിരിച്ചുവിട്ടു; ദുബായിലേക്ക് പണം കൈമാറിയെന്നും ഇഡി; ഫണ്ട് തട്ടിപ്പ് കേസില്‍ ഫെമ പ്രകാരം അനില്‍ അംബാനിക്ക് സമണ്‍സ് അയച്ച് ഇഡി; നേരില്‍ ഹാജരാകണമെന്ന് ആവശ്യം; വെര്‍ച്വലായി ഹാജരാകാമെന്ന് അനില്‍ അംബാനിയും
വെര്‍ച്വലായി ഹാജരാകാമെന്ന് അനില്‍ അംബാനിയും
മുംബൈ: റിലയന്‍സ് ഗ്രൂപ്പ് ചെയര്‍മാന്‍ അനില്‍ അംബാനിക്ക് കുരുക്ക് മുറുകുന്നു. ഫണ്ട് തട്ടിപ്പു കേസില്‍ ഇഡി അനില്‍ അംബാനിയോട് ചോദ്യം ചെയ്യലിന് ഹാജറാകാന്‍ നിര്‍ദേശിച്ചു. ഫോറിന്‍ എക്‌സ്‌ചേഞ്ച് മാനേജ്‌മെന്റ് ആക്ട് (ഫെമ) പ്രകാരം പുറപ്പെടുവിച്ച സമന്‍സ് പുറപ്പെടുവിച്ചു. ഇതോടെ അനില്‍ അംബാനി തിങ്കളാഴ്ച എന്‍ഫോഴ്സ്മെന്റ് ഡയറക്ടറേറ്റിന് (ഇഡി) മുന്നില്‍ വെര്‍ച്വലായി ഹാജരാകാന്‍ സന്നദ്ധത പ്രകടിപ്പിച്ചു.
ഇഡിക്ക് സൗകര്യപ്രദമായ തീയതിയിലും സമയത്തും വെര്‍ച്വല്‍ ഹാജരാകുകയോ റെക്കോര്‍ഡുചെയ്ത വീഡിയോ പ്രസ്താവനയിലൂടെയോ തന്റെ മൊഴി രേഖപ്പെടുത്താന്‍ അംബാനി സന്നദ്ധത പ്രകടിപ്പിച്ചതായി 66 കാരനായ ബിസിനസുകാരന്റെ വക്താവ് പ്രസ്താവനയില്‍ പറഞ്ഞു. ഫെമയുമായി ബന്ധപ്പെട്ട സമന്‍സ് വെള്ളിയാഴ്ച അനില്‍ അംബാനി അവഗണിച്ചു, പകരം നടപടിക്രമങ്ങളില്‍ വെര്‍ച്വലായി പങ്കെടുക്കാമെന്ന് വാഗ്ദാനം ചെയ്തു.
അതേസമയം വെര്‍ച്വല്‍ സാക്ഷ്യപ്പെടുത്തലിനുള്ള അദ്ദേഹത്തിന്റെ അഭ്യര്‍ഥന ഇഡി നിരസിച്ചു, നവംബര്‍ 17 തിങ്കളാഴ്ച ഏജന്‍സിയുടെ ഡല്‍ഹി ആസ്ഥാനത്ത് നേരിട്ട് ഹാജരാകാന്‍ റിലയന്‍സ് അനില്‍ ധീരുഭായ് അംബാനി (എഡിഎ) ഗ്രൂപ് ചെയര്‍മാനോട് രണ്ടാമത്തെ സമന്‍സിലൂടെ നിര്‍ദേശിച്ചിരിക്കയാണ്. ഫോറിന്‍ എക്‌സ്‌ചേഞ്ച് മാനേജ്‌മെന്റ് ആക്ട് (ഫെമ) പ്രകാരമുള്ള അന്വേഷണത്തില്‍ വെര്‍ച്വലായി പങ്കെടുക്കാനുള്ള അംബാനിയുടെ അഭ്യര്‍ഥന ഇഡി നിരസിച്ചതിനെ തുടര്‍ന്നാണിത്. സഹകരിക്കാനും വെര്‍ച്വലായി ഹാജരാകാനും അംബാനി സന്നദ്ധത പ്രകടിപ്പിച്ചിരുന്നെങ്കിലും ഏജന്‍സി നേരിട്ട് ഹാജരാകണമെന്ന് നിര്‍ബന്ധിച്ചു.
പദ്ധതിയുടെ ചെലവുകള്‍ പെരുപ്പിച്ചുകാട്ടിയെന്നും അധിക ഫണ്ട് സൂറത്ത് ആസ്ഥാനമായുള്ള ഷെല്‍ കമ്പനികളുടെ ഒരു ശൃംഖല വഴി നിയമവിരുദ്ധമായി വഴിതിരിച്ചുവിട്ടെന്നും ഒടുവില്‍ ദുബൈയിലേക്ക് പണം കൈമാറിയെന്നും ഇഡി സംശയിക്കുന്നു. ഈ കമ്പനികള്‍ക്ക് യഥാര്‍ത്ഥ ബിസിനസ്സ് പ്രവര്‍ത്തനങ്ങള്‍ കുറവാണെന്നും സാമ്പത്തിക ഇടപാടുകള്‍ മറച്ചുവെക്കാന്‍ ഇവയെ ഉപയോഗിച്ചതായും റിപ്പോര്‍ട്ടുണ്ട്. സെപ്റ്റംബറില്‍, റിന്‍ഫ്രയുടെയും അതിന്റെ കരാറുകാരുടെയും നിരവധി സ്ഥലങ്ങള്‍ ഇഡി പരിശോധിച്ചു.
വിദേശനാണ്യ ലംഘനങ്ങളൊന്നും റിന്‍ഫ്ര നിഷേധിച്ചു, ഇപിസി കരാര്‍ പൂര്‍ണ്ണമായും ആഭ്യന്തരമാണെന്നും 2022 വരെ നോണ്‍-എക്സിക്യൂട്ടീവ് ഡയറക്ടറായി സേവനമനുഷ്ഠിച്ച അംബാനി ദൈനംദിന പ്രവര്‍ത്തനങ്ങളില്‍ ഏര്‍പ്പെട്ടിരുന്നില്ലെന്നും പ്രസ്താവിച്ചു. പദ്ധതിയുമായി ബന്ധപ്പെട്ട മുന്‍കാല സാമ്പത്തിക ഇടപാടുകളെക്കുറിച്ചുള്ള വിശാലമായ അന്വേഷണത്തിന്റെ ഭാഗമാണ് ഇഡിയുടെ അന്വേഷണം, ഇത് 600 കോടി രൂപയിലധികം വരുന്ന ഹവാല ശൃംഖല കണ്ടെത്തിയതായി റിപ്പോര്‍ട്ടുണ്ട്.
ജയ്പുര്‍-റിംഗസ് ഹൈവേ പദ്ധതിയെക്കുറിച്ചുള്ള 15 വര്‍ഷം പഴക്കമുള്ള അന്വേഷണവുമായി ബന്ധപ്പെട്ടതാണ് സമന്‍സ്, അതില്‍ ഏകദേശം 100 കോടി രൂപ ഹവാല വഴി വിദേശത്തേക്ക് അനധികൃതമായി കൈമാറ്റം ചെയ്തതായി ഇഡി സംശയിക്കുന്നു. 2010 ല്‍ പ്രകാശ് ആസ്ഫാല്‍റ്റിങ്‌സ് ആന്‍ഡ് ടോള്‍ ഹൈവേസിന് (പാത്ത്) റിലയന്‍സ് ഇന്‍ഫ്രാസ്ട്രക്ചര്‍ ലിമിറ്റഡ് (റിന്‍ഫ്ര) നല്‍കിയ ഹൈവേ പദ്ധതിക്കായി 2013 ല്‍ പൂര്‍ത്തിയായ എഞ്ചിനീയറിംഗ്, സംഭരണം, നിര്‍മാണ (ഇപിസി) കരാറുമായി ബന്ധപ്പെട്ട സാമ്പത്തിക ക്രമക്കേടുകള്‍ കേന്ദ്രീകരിച്ചാണ് അന്വേഷണം.
അതേസമയം സിബിഐയും അനില്‍ അംബാനിക്കെതിരായ കേസുകള്‍ ശക്തിപ്പെടുത്തിയിട്ടുണ്ട്. യെസ് ബാങ്ക്, അനില്‍ അംബാനിയുടെ അനില്‍ ധീരുഭായ് അംബാനി ഗ്രൂപ്പ് കമ്പനികള്‍, റിലയന്‍സ് നിപ്പോണ്‍ അസറ്റ് മാനേജ്‌മെന്റ് (ആര്‍എന്‍എഎം) എന്നിവ സാമ്പത്തിക നേട്ടത്തിനായി പരസ്പരം ഫണ്ട് തിരിമറി നടത്തിയെന്നും സെബിയുടെ പ്രൈവറ്റ് പ്ലേസ്‌മെന്റ് ചട്ടം ലംഘിച്ച് സ്വന്തം ഗ്രൂപ്പ് കമ്പനികളില്‍ നിക്ഷേപം നടത്തിയെന്നുമുള്ള കേസിലാണ് സിബിഐ അന്വേഷണം നടക്കുന്നത്. റിലയന്‍സ് ക്യാപിറ്റല്‍, ജപ്പാനിലെ നിപ്പോണ്‍ ലൈഫ് ഇന്‍ഷുറന്‍സ് എന്നിവയുടെ സംയുക്ത സംരംഭമായിരുന്നു ആര്‍എന്‍എഎം.
യെസ് ബാങ്കും എഡിഎ ഗ്രൂപ്പ് ഓഫ് കമ്പനീസും ഉപസ്ഥാപനങ്ങള്‍ വഴിയും മറ്റും പുറത്തിറക്കിയ കടപ്പത്രങ്ങള്‍ (എന്‍സിഡി ഉള്‍പ്പെടെ) പരസ്പരം വാങ്ങി നേട്ടമുണ്ടാക്കിയെന്നാണ് പ്രധാന ആരോപണം. അനില്‍ അംബാനിയും കപുറും തമ്മില്‍ ചര്‍ച്ച ചെയ്താണ് ഈ 'മ്യൂച്വല്‍' ഇന്‍വെസ്റ്റ് പ്ലാന്‍ തയാറാക്കിയതെന്ന് സിബിഐ ആരോപിക്കുന്നു. കടക്കെണിയില്‍പ്പെട്ട് പ്രതിസന്ധിയിലായിരിക്കേ, നിപ്പോണുമായി സഹകരിക്കുന്നത് ഉള്‍പ്പെടെ നടപടികള്‍ക്ക് ചുക്കാന്‍ പിടിച്ചതും റിലയന്‍സ് ഗ്രൂപ്പിനെ തിരികെ വളര്‍ച്ചയിലേക്ക് നയിച്ചതും ജയ് അന്‍മോല്‍ അംബാനിയായിരുന്നു. ഇതോടെയാണ് അദ്ദേഹവും സിബിഐയുടെ അന്വേഷണ വലയത്തിലായത്.
17,000 കോടി രൂപയുടെ വായ്പാത്തിരിമറിക്കേസില്‍ അനില്‍ അംബാനി, കമ്പനിയിലെ ഇപ്പോഴത്തെയും മുന്‍പത്തെയും മുതിര്‍ന്ന ഉദ്യോഗസ്ഥര്‍ തുടങ്ങിയവര്‍ക്കെതിരെ ഇ.ഡിയുടെ അന്വേഷണം നടക്കുകയാണ്. അതേസമയം, അനില്‍ അംബാനി കഴിഞ്ഞ 3 വര്‍ഷത്തിലേറെയായി റിലയന്‍സ് പവറിന്റെ ഡയറക്ടര്‍ ബോര്‍ഡ് അംഗമല്ല. അതുകൊണ്ട്, ഈ വിഷയത്തില്‍ അദ്ദേഹത്തിന് ആശങ്കകളുമില്ലെന്ന് റിലയന്‍സ് പവര്‍ പറയുന്നു. കമ്പനിയെ ചിലര്‍ തട്ടിപ്പിന്റെ ഇരയാക്കുകയായിരുന്നെന്നും റിലയന്‍സ് പവര്‍ ആരോപിക്കുന്നു.
