സിം കാര്‍ഡ് എടുക്കാന്‍ വരുന്നവരുടെ ആധാര്‍ കാര്‍ഡുകള്‍ സ്‌കാന്‍ ചെയ്ത് ആവശ്യക്കാരുടെ ഫോട്ടോ പതിപ്പിക്കും; വ്യാജ ആധാര്‍ കാര്‍ഡുമായി പിടികൂടിയതില്‍ ബംഗ്ലാദേശികളും; അന്വേഷണത്തില്‍ കണ്ടെത്തിയത് 'അസ്ലം മൊബൈല്‍' ഷോപ്പിലെ വ്യാജ ആധാര്‍ കാര്‍ഡ് നിര്‍മാണം; പെരുമ്പാവൂരില്‍ അസം സ്വദേശി പിടിയില്‍
'അസ്ലം മൊബൈല്‍' ഷോപ്പില്‍ വ്യാജ ആധാര്‍ കാര്‍ഡ് നിര്‍മാണം; പെരുമ്പാവൂരില്‍ അസം സ്വദേശി പിടിയില്‍
കൊച്ചി: വ്യാജ ആധാര്‍ കാര്‍ഡുമായി ബംഗ്ലാദേശികള്‍ കൊച്ചിയില്‍ നിന്നടക്കം പിടിയിലായ കേസില്‍ അന്വേഷണം തുടരവെ പെരുമ്പാവൂരില്‍ വ്യാജ ആധാര്‍ കാര്‍ഡ് നിര്‍മ്മിച്ച് നല്‍കിയ ഇതര സംസ്ഥാന തൊഴിലാളി പിടിയില്‍. അസം സ്വദേശിയായ ഹരിജുള്‍ ഇസ്ലാമാണ് പിടിയിലായത്. കേസില്‍ കൂടുതല്‍ പേര്‍ ഉള്‍പ്പെട്ടിട്ടുണ്ടോ എന്ന് പൊലീസ് അന്വേഷിക്കുന്നുണ്ട്. മൊബൈല്‍ ഷോപ്പ് കേന്ദ്രീകരിച്ചാണ് വ്യാജ ആധാര്‍ കാര്‍ഡ് നിര്‍മ്മിച്ചത്.
പെരുമ്പാവൂരില്‍ ഇതരസംസ്ഥാന തൊഴിലാളികള്‍ക്കിടയില്‍ ലഹരി ഉപയോഗവും ലഹരി വില്‍പനയും വ്യാപകമായി നടക്കുന്നതിന്റെ പശ്ചാത്തലത്തില്‍ ക്ലീന്‍ പെരുമ്പാവൂര്‍ എന്ന പദ്ധതി പോലീസ് നടപ്പിലാക്കിവരികയായിരുന്നു. ഇതിന്റെ ഭാഗമായ പരിശോധനയിലാണ് വ്യാജ ആധാര്‍ കാര്‍ഡ് നിര്‍മിച്ചയാള്‍ പിടിയിലായത്. പെരുമ്പാവൂര്‍ സ്വകാര്യ ബസ് സ്റ്റാന്‍ഡില്‍ 'അസ്ലം മൊബൈല്‍' എന്ന സ്ഥാപനം നടത്തി വരികയായിരുന്നു ഇയാള്‍. ഇവിടെനിന്ന് വ്യാജ ആധാറുകള്‍ നിര്‍മിക്കാനുപയോഗിച്ച ലാപ്ടോപും 55,000 രൂപയും പ്രത്യേക അന്വേഷണ സംഘം പിടിച്ചെടുത്തിട്ടുണ്ട്.
മൊബൈല്‍ ഷോപ്പില്‍ സിം കാര്‍ഡ് എടുക്കാന്‍ വരുന്നവരുടെ ആധാര്‍ കാര്‍ഡുകള്‍ സ്‌കാന്‍ ചെയ്ത് 'ആവശ്യക്കാരുടെ' ഫോട്ടോ പതിപ്പിച്ചാണ് ഇയാള്‍ വ്യാജ തിരിച്ചറിയല്‍ രേഖകള്‍ നിര്‍മിച്ചിരുന്നത്. അറസ്റ്റിലായ പ്രതി നിലവില്‍ പെരുമ്പാവൂര്‍ പോലീസിന്റെ കസ്റ്റഡിയിലാണ്. ഇയാളെ ചോദ്യം ചെയ്തുവരികയാണ്. നഗരത്തില്‍ വ്യാജ തിരിച്ചറിയല്‍ രേഖകളുമായി ഇതര സംസ്ഥാന തൊഴിലാളികളെ കൂട്ടത്തോടെ പിടികൂടിയത് ഈയിടെയാണ്. വ്യാജ ആധാര്‍ കാര്‍ഡുപയോഗിച്ച് കേരളത്തിലെത്തിയ 27 ബംഗ്ലാദേശികള്‍ പറവൂരില്‍ പിടിയിലായിരുന്നു. വടക്കന്‍ പറവൂരില്‍ ഒരുവീട്ടില്‍ ഒരുമിച്ച് താമസിച്ചുവരികയായിരുന്നു ഇവര്‍.
സമാനമായ രീതിയില്‍ എറണാകുളം റൂറല്‍ പോലീസ് പരിധിയില്‍നിന്ന് ഏഴ് ബംഗ്ലാദേശികളും ഇതിന് മുമ്പ് പിടിയിലായിരുന്നു. വൈപ്പിന്‍ ഞാറയ്ക്കലില്‍നിന്ന് ഒറിജിനല്‍ ആധാര്‍ കാര്‍ഡുമായി ബംഗ്ലാദേശ് പൗരന്‍ പിടിയിലായതും വാര്‍ത്തയായതാണ്. ഇതിനിടെയാണ് വ്യാജ ആധാര്‍ കാര്‍ഡ് നിര്‍മിച്ചു നല്‍കുന്നയാള്‍ പെരുമ്പാവൂരില്‍നിന്ന് പ്രത്യേക അന്വേഷസംഘത്തിന്റെ പിടിയിലാകുന്നത്.
