മയക്കുമരുന്നുമായി ബോളിവുഡ് നടന്‍ ചെന്നൈ എയര്‍പോര്‍ട്ടില്‍ പിടിയില്‍; 40 കോടി രൂപ വിലമതിക്കുന്ന മെതക്വലോണാണ് പിടിച്ചെടുത്തത്; ട്രോളി ബാഗിന്റെ അടിയില്‍ ഒളിപ്പിച്ച നിലയിലാണ് മയക്കുമരുന്ന് കണ്ടെത്തിയത്; പിടിയിലായത് സ്റ്റുഡന്റ് ഓഫ് ദ ഇയര്‍ എന്ന ചിത്രത്തില്‍ സഹനടനായി അഭിനയിച്ച താരം
ചെന്നൈ: അസം സ്വദേശിയും ബോളിവുഡില്‍ സഹനടനായി അഭിനയിച്ചിരുന്ന വിഷാല്‍ ബ്രഹ്‌മയെ 40 കോടി രൂപ വിലമതിക്കുന്ന മയക്കുമരുന്നുമായി ഡയറക്ടറേറ്റ് ഓഫ് റവന്യൂ ഇന്റലിജന്‍സ് (ഡിആര്‍ഐ) അറസ്റ്റ് ചെയ്തു. മെതക്വലോണ്‍ എന്നാണ് പിടിച്ചെടുത്ത മയക്കുമരുന്ന്. സിംഗപ്പൂര്‍ വഴി കംബോഡിയയില്‍ നിന്ന് ചെന്നൈയില്‍ തിരിച്ചെത്തിയപ്പോഴാണ് ഇയാള്‍ എയര്‍ ഇന്ത്യയുടെ A1 347 വിമാനത്തില്‍ നിന്ന് ഇറങ്ങിയ ഉടന്‍ പിടിയിലായത്. ട്രോളി ബാഗിന്റെ അടിയില്‍ ഒളിപ്പിച്ച നിലയിലാണ് മയക്കുമരുന്ന് കണ്ടെത്തിയത്.
ധനകാര്യ പ്രതിസന്ധിയിലായിരുന്ന നടനെ നൈജീരിയന്‍ സംഘമാണ് ഉപയോഗിച്ചത് എന്നാണ് അന്വേഷണ ഏജന്‍സിയുടെ സംശയം. അവധിക്കാല യാത്രയുടെ പേരില്‍ കംബോഡിയയിലേക്ക് അയച്ച ശേഷം മയക്കുമരുന്ന് കൊണ്ടുവരാന്‍ നിര്‍ദ്ദേശിച്ചുവെന്നാണ് കണ്ടെത്തല്‍. എന്നാല്‍ സിംഗപ്പൂര്‍ വിമാനത്താവളത്തില്‍ വെച്ച് ചെന്നൈയിലുള്ള ആള്‍ക്ക് കൈമാറണമെന്ന് ആവശ്യപ്പെട്ട് അജ്ഞാതനായ വ്യക്തി ബാഗ് ഏല്‍പ്പിക്കുകയായിരുന്നു എന്നാണ് നടന്റെ വാദം.
2019-ല്‍ പുറത്തിറങ്ങിയ ''സ്റ്റുഡന്റ് ഓഫ് ദ ഇയര്‍'' എന്ന ചിത്രത്തില്‍ സഹനടനായി അഭിനയിച്ചിട്ടുള്ള വ്യക്തിയാണ് വിഷാല്‍. ഈ വര്‍ഷം ജൂണില്‍ തമിഴ് സിനിമാ നടന്‍മാരായ കൃഷ്ണ, ശ്രീകാന്ത് എന്നിവര്‍ മയക്കുമരുന്ന് കേസില്‍ അറസ്റ്റിലായതും അന്വേഷണം സിനിമാ മേഖലയുമായി ബന്ധപ്പെട്ടു കൊണ്ടിരിക്കുന്ന വിപുലമായ നാര്‍ക്കോട്ടിക്സ് ശൃംഖലയിലേക്കാണ് വിരല്‍ചൂണ്ടുന്നത്. അന്ന് മധുരയിലെ ആയുധസംരക്ഷണ പോലീസ് കോണ്‍സ്റ്റബിള്‍ സെന്തില്‍ അടക്കമുള്ളവരും കേസില്‍ കുടുങ്ങിയിരുന്നു.
വിഷാല്‍ ബ്രഹ്‌മയുടെ അറസ്റ്റ്, സിനിമാ ലോകവും അന്താരാഷ്ട്ര ലഹരി കാര്‍ട്ടലുകളും തമ്മിലുള്ള ബന്ധത്തെക്കുറിച്ച് ഗൗരവമായ അന്വേഷണം ആവശ്യപ്പെടുന്ന സാഹചര്യമാണ് സൃഷ്ടിക്കുന്നത്.
