വെറുമൊരു മിസ്സിങ്ങ് കേസിൽ തുടങ്ങിയ അന്വേഷണം; ഒടുവിൽ ദിവസങ്ങൾ നീണ്ട പരിശോധനയിൽ പോലീസിനെ തന്നെ ഒന്നടങ്കം ഞെട്ടിപ്പിച്ച് ആ സത്യം പുറത്ത്; തങ്ങൾ തേടി നടക്കുന്ന ആൾ സരോവരത്തെ ചതുപ്പില് മരണപ്പെട്ടു കിടക്കുന്ന കാഴ്ച; കൂട്ടുകാരുമൊത്തുള്ള ലഹരി ഉപയോഗത്തിനിടെ നടന്ന ക്രൂരത; വഴിത്തിരിവായത് വിജിലിന്റെ ഡിഎൻഎ ഫലവും; ഏറെ ദുരൂഹത നിറഞ്ഞ ആ കേസിന് ഫുൾസ്റ്റോപ്പ്; പ്രതികൾ ഇനി അഴിയെണ്ണും
കോഴിക്കോട്: ഏറെ ദുരൂഹത നിറഞ്ഞ എലത്തൂർ വിജിൽ തിരോധാനക്കേസിൽ നിർണായക വഴിത്തിരിവ്. വിജിലിന്റെ മൃതദേഹാവശിഷ്ടങ്ങൾ ഡിഎൻഎ പരിശോധനയിലൂടെ സ്ഥിരീകരിച്ചതിന് പിന്നാലെ ബന്ധുക്കൾക്ക് കൈമാറി. സരോവരത്ത് നിന്ന് കണ്ടെടുത്ത അവശിഷ്ടങ്ങൾ വിജിലിന്റേതാണെന്ന് കണ്ണൂർ റീജിയണൽ ഫോറൻസിക് ലാബിൽ നിന്നുള്ള പരിശോധനാഫലത്തിലൂടെ ഉറപ്പിച്ചു. വിജിലിന്റെ അച്ഛനും സഹോദരനുമാണ് കോഴിക്കോട് മെഡിക്കൽ കോളേജ് മോർച്ചറിയിൽ സൂക്ഷിച്ചിരുന്ന മൃതദേഹാവശിഷ്ടങ്ങൾ ഏറ്റുവാങ്ങിയത്.
കോഴിക്കോട് വെസ്റ്റ്ഹിൽ ചുങ്കം സ്വദേശിയായ വിജിലിനെ 2019 മാർച്ച് 24-നാണ് കാണാതായത്. മിസ്സിങ് കേസുകളിൽ സിറ്റി പോലീസ് കമ്മീഷണറുടെ നിർദ്ദേശപ്രകാരം നടത്തിയ തുടരന്വേഷണത്തിലാണ് കേസിൽ നിർണായകമായ വിവരങ്ങൾ അന്വേഷണ സംഘത്തിന് ലഭിച്ചത്. ലഹരിമരുന്ന് ഉപയോഗിക്കുന്നതിനിടെ കുഴഞ്ഞുവീണ വിജിലിനെ സുഹൃത്തുക്കൾ ചേർന്ന് സരോവരത്തെ ചതുപ്പിൽ ചവിട്ടിത്താഴ്ത്തുകയായിരുന്നു എന്നാണ് പോലീസിന്റെ കണ്ടെത്തൽ.
വിജിലിന്റെ സുഹൃത്തുക്കളായ നിഖിൽ, രഞ്ജിത്ത്, ദീപേഷ് എന്നിവരാണ് കേസിൽ പ്രതികൾ. സംസ്ഥാനത്തിന് പുറത്ത് ഒളിവിൽ കഴിഞ്ഞിരുന്ന ഇവരെ എലത്തൂർ സി ഐ കെ.ആർ. രഞ്ജിത്തിന്റെ നേതൃത്വത്തിലുള്ള അന്വേഷണ സംഘം പിടികൂടിയിരുന്നു. പ്രതികളുടെ മൊഴിയുടെ അടിസ്ഥാനത്തിൽ ദിവസങ്ങൾ നീണ്ട തിരച്ചിലിനൊടുവിലാണ് വിജിലിന്റെ ശരീരഭാഗങ്ങൾ സരോവരത്ത് നിന്ന് കണ്ടെത്തിയത്.
ആദ്യ ഘട്ടത്തിൽ കാണാതായ കേസ് എന്ന നിലയിൽ മുന്നോട്ട് പോയ ഈ കേസ്, മൃതദേഹാവശിഷ്ടങ്ങൾ കണ്ടെത്തിയതോടെ കൊലപാതകമായി സ്ഥിരീകരിക്കുകയായിരുന്നു. മൃതദേഹാവശിഷ്ടങ്ങൾ വിജിലിന്റേതെന്ന് ഡിഎൻഎ പരിശോധനയിൽ സ്ഥിരീകരിച്ചതോടെയാണ് നീണ്ട കാലത്തെ കാത്തിരിപ്പിന് ശേഷം മൃതദേഹം കുടുംബത്തിന് വിട്ടുനൽകിയത്. ലഹരി ഉപയോഗം ഒരു ജീവൻ നഷ്ടപ്പെടുത്തുന്നതിലേക്കും, മൃതദേഹം ഒളിപ്പിക്കാൻ ശ്രമിക്കുന്നതിലേക്കും സുഹൃത്തുക്കളെ എത്തിച്ച ഈ സംഭവം ഏറെ ഞെട്ടലുളവാക്കുന്നതാണ്.
