ലഹരി വില്ക്കാന് തിരഞ്ഞെടുത്തത് ക്ഷേത്ര പരിസരം! ഗ്രാമിന് 13,000 രൂപ; കടവന്ത്രയില് കൊക്കെയ്നുമായി പിടിയിലായ ഡെയ്സണ് വെറും കണ്ണി; പണം കൊയ്യുന്നത് 'ചോക്ലേറ്റ് ബിനു'; ക്രിസ്മസിന് വന് കച്ചവടം; ന്യൂ ഇയര് പാര്ട്ടികള് ലക്ഷ്യമിട്ട് കൊച്ചിയില് രാസലഹരിയുടെ ഒഴുക്ക്; ഡാന്സാഫിന്റെ മിന്നല് ഓപ്പറേഷന്!
കടവന്ത്രയില് കൊക്കെയ്നുമായി പിടിയിലായ ഡെയ്സണ് വെറും കണ്ണി; പണം കൊയ്യുന്നത് 'ചോക്ലേറ്റ് ബിനു'
കൊച്ചി: 2026-നെ വരവേല്ക്കാന് ആവേശത്തിലായിരിക്കുന്ന കൊച്ചി നഗരത്തില് ലഹരി വിതരണത്തിനെത്തിയ സംഘത്തെ പിടികൂടി ഡാന്സാഫ്. കടവന്ത്രയില് 8 ഗ്രാം കൊക്കെയ്നുമായാണ് നോര്ത്ത് പറവൂര് സ്വദേശി ഡെയ്സണ് ജോസഫിനെ (49) പോലീസ് പൊക്കിയത്. ലഹരി മരുന്ന് എത്തിച്ചു നല്കിയ 'ചോക്ലേറ്റ് ബിനു'വിനായി പോലീസ് തിരച്ചില് ഊര്ജ്ജിതമാക്കി.
വില കേട്ടാല് ഞെട്ടും! ബിനുവാണ് താരം
ഗ്രാമിന് 13,000 രൂപയ്ക്കാണ് ഡെയ്സണ് കൊക്കെയ്ന് വിറ്റിരുന്നത്. ഇതില് 1000 രൂപ ഡെയ്സണ് കമ്മീഷനായി എടുക്കും. ബാക്കി തുക ലഹരി എത്തിക്കുന്ന ബിനുവിന് നല്കും. ക്രിസ്മസ് ദിനത്തില് ബിനു വന്തോതില് ലഹരി വില്പ്പന നടത്തിയെന്നാണ് പിടിയിലായ ഡെയ്സണ് പോലീസിനോട് വെളിപ്പെടുത്തിയത്.
കൊച്ചി സിറ്റി പോലീസിന്റെ ആന്റി നാര്ക്കോട്ടിക് സ്പെഷ്യല് ആക്ഷന് ഫോഴ്സായ ഡാന്സാഫ് -4 ആണ് ഡെയ്സണെ പിടി കൂടിയത്. നിലവില് കടവന്ത്രയില് വാടകയ്ക്ക് താമസിച്ചുവരികയായിരുന്നു ഇയാള്. ചൊവ്വാഴ്ച ഉച്ചയോടുകൂടിയാണ് ഡാന്സാഫ് സംഘം ഇയാളെ കസ്റ്റഡിയിലെടുത്തത്. കടവന്ത്ര ദേവി ക്ഷേത്രത്തിന് സമീപം വെച്ച് ഇരുചക്ര വാഹനത്തില് കൊക്കെയ്ന് വില്പനയ്ക്കായി എത്തുന്നുണ്ടെന്ന രഹസ്യ വിവരത്തെത്തുടര്ന്നാണ് പോലീസ് പരിശോധന നടത്തിയത്. ക്ഷേത്രത്തിന് സമീപം വെച്ച് ഇയാളെ തടഞ്ഞുവെച്ച് ദേഹപരിശോധന നടത്തിയപ്പോള് ഇയാളുടെ പക്കല് നിന്നും 8 ഗ്രാം കൊക്കെയ്ന് കണ്ടെത്തുകയായിരുന്നു.
ഡാന്സാഫ് സംഘം പിടികൂടിയ പ്രതിയെയും തൊണ്ടിമുതലും കൂടുതല് നിയമനടപടികള്ക്കായി എറണാകുളം സൗത്ത് പോലീസിന് കൈമാറി. ഇയാള്ക്ക് ലഹരിമരുന്ന് നല്കിയ ചോക്ലേറ്റ് ബിനുവിനേയും പ്രതി ചേര്ത്തിട്ടുണ്ട്.
ന്യൂ ഇയര് ആഘോഷത്തിന് 'ലിമിറ്റുണ്ട് കെട്ടോ'!
പുതുവത്സരാഘോഷം ലക്ഷ്യമിട്ട് വന്തോതില് രാസലഹരികള് കേരളത്തിലേക്ക് എത്തുന്നതായി രഹസ്യവിവരമുണ്ട്. ഇതിന്റെ പശ്ചാത്തലത്തില് പരിശോധന കര്ശനമാക്കിയതായി സിറ്റി പോലീസ് കമ്മീഷണര് പുട്ട വിമലാദിത്യ അറിയിച്ചു. ഫോര്ട്ട് കൊച്ചിയിലും നഗരത്തിന്റെ വിവിധ ഭാഗങ്ങളിലുമായി 1,200 പോലീസുകാരെയാണ് വിന്യസിച്ചിരിക്കുന്നത്.
നാളെ ഫോര്ട്ട് കൊച്ചി 'നോ പാര്ക്കിംഗ് സോണ്'
പുതുവത്സര രാവില് ഫോര്ട്ട് കൊച്ചിയിലേക്ക് എത്തുന്നവര് അറിയേണ്ട പ്രധാന കാര്യങ്ങള്:
പ്രവേശനം: രാത്രി 7 മണി വരെ മാത്രം.
നോ പാര്ക്കിംഗ്: ഫോര്ട്ട് കൊച്ചി പൂര്ണ്ണമായും നോ പാര്ക്കിംഗ് സോണ് ആയിരിക്കും.
വാഹനങ്ങള്: ഉച്ചയ്ക്ക് 2 മണി വരെ മാത്രമേ സ്വകാര്യ വാഹനങ്ങളെ കടത്തിവിടൂ. സ്വകാര്യ ബസുകള്ക്ക് വൈകിട്ട് 5 വരെ മാത്രം അനുമതി.
മെട്രോ സൗകര്യം: വാട്ടര് മെട്രോ പുലര്ച്ചെ 4 മണി വരെയും കൊച്ചി മെട്രോ രാത്രി 2 മണി വരെയും സര്വീസ് നടത്തും.
ഡ്രോണ് നിരോധനം: സുരക്ഷാ കാരണങ്ങളാല് ഫോര്ട്ട് കൊച്ചി മേഖലയില് ഡ്രോണ് പറത്തുന്നത് നിരോധിച്ചു.
കഴിഞ്ഞ വര്ഷത്തേക്കാള് കൂടുതല് ആളുകള് ഇത്തവണ പരേഡ് ഗ്രൗണ്ടിലും വേളി ബീച്ചിലും എത്തുമെന്നാണ് കണക്കുകൂട്ടല്. ആഘോഷിക്കുന്നതൊക്കെ കൊള്ളാം, പക്ഷേ നിയമം ലംഘിച്ചാല് പോലീസ് 'കൈവെയ്ക്കുമെന്ന' കാര്യത്തില് സംശയം വേണ്ട.
ക്രൗഡ് മാനേജ്മെന്റിനായി സിസിടിവി നിരീക്ഷണവും ഡ്രോണ് പട്രോളിംഗും ഉള്പ്പെടെയുള്ള വിപുലമായ സജ്ജീകരണങ്ങളാണ് കമ്മീഷണറുടെ നേതൃത്വത്തില് ഒരുക്കിയിരിക്കുന്നത്.
