നാട്ടില്‍ പെണ്ണ് കിട്ടാതെ വന്നപ്പോള്‍ പെട്ടെന്ന് പണവും സ്വത്തും സമ്പാദിക്കാന്‍ അതിമോഹം; സ്വത്തുകാരെ നോട്ടമിട്ട കൂട്ടത്തില്‍ അവിവാഹിതനായ പ്രദീപ് കൊയിലിയുടെ ഭൂസ്വത്തില്‍ അനില്‍ കണ്ണുവച്ചു; ഭൂമി വാങ്ങാനെന്ന പേരില്‍ പരിചയപ്പെട്ട് അരുംകൊല; കണ്ണൂര്‍ സ്വദേശിയായ തോട്ടം ഉടമയുടെ കൊലപാതക കേസില്‍ അനില്‍ അടക്കം അഞ്ചുകര്‍ണാടക സ്വദേശികള്‍ അറസ്റ്റില്‍
കണ്ണൂര്‍ സ്വദേശിയായ തോട്ടം ഉടമയുടെ കൊലപാതകം : അഞ്ച് കര്‍ണ്ണാടക സ്വദേശികള്‍ അറസ്റ്റില്‍
കണ്ണൂര്‍: കണ്ണൂരിലെ കാപ്പിതോട്ടം ഉടമ കൊയിലി പ്രദീപനെ വീരാജ്‌പേട്ടയില്‍ കൊല ചെയ്ത അഞ്ചുപേരെ ഗോണിക്കുപ്പ പൊലീസ് അറസ്റ്റ് ചെയ്തു. കുടകിലെ ഗോണിക്കുപ്പ പൊലീസ് സ്റ്റേഷന്‍ പരിധിയിലെ ബി ഷെട്ടിഗേരിയിലെ പ്രദീപിന്റെ കാപ്പിത്തോട്ടത്തില്‍ കഴിഞ്ഞ മാസം 23 നാണ് ഇദ്ദേഹത്തെ കഴുത്തില്‍ കയര്‍ മുറുക്കി കൊലപ്പെടുത്തിയ നിലയില്‍ കണ്ടെത്തിയത്.
ഗോണിക്കുപ്പ പോലീസ് സ്റ്റേഷനില്‍ ഇത് സംബന്ധിച്ച് രജിസ്റ്റര്‍ ചെയ്ത കേസിലാണ് കര്‍ണ്ണാടക സ്വദേശികളായ അഞ്ചുപേരെ പ്രത്യേക അന്വേഷണ സംഘം അറസ്റ്റ് ചെയ്തത്. പൊന്നമ്പേട്ട മുഗുട്ടേരിയിലെ എന്‍.എസ്. അനില്‍ (25 ), സോംവാര്‍പേട്ട അല്ലൂര്‍ക്കാട്ടെ ദീപക് എന്ന ദീപു (21), സോംവാര്‍പേട്ട നെരുഗലെ സ്റ്റീഫന്‍ ഡിസൂസ (26), സോംവാര്‍പേട്ട ഹിതലമക്കി എച്ച്.എം. കാര്‍ത്തിക് (27), പൊന്നമ്പേട്ട നല്ലൂരിലെ ടി.എസ്. ഹരീഷ് (29) എന്നിവരാണ് അറസ്റ്റിലായത്.
ഇവരില്‍ നിന്നും കുറ്റകൃത്യത്തിന് ഉപയോഗിച്ച രണ്ടു ബൈക്കുകള്‍, ഇവിടെ നിന്നും കളവു ചെയ്ത 13,03,000 രൂപ, കൊല ചെയ്യപ്പെട്ട പ്രദീപിന്റെതടക്കം മൂന്ന് മൊബൈല്‍ ഫോണുകള്‍, പ്രദീപിന്റെ സ്വത്തുക്കളുടെ രേഖകള്‍ എന്നിവ പൊലീസ് കണ്ടെടുത്തു.
കേസിലെ ഒന്നാം പ്രതിയായ അനില്‍ നാട്ടിലെ ഒരു പെണ്‍കുട്ടിയെ വിവാഹം കഴിക്കാന്‍ ആഗ്രഹിച്ചെങ്കിലും ജോലിയും തൊഴിലും സ്വത്തുമില്ലാത്ത യുവാവെന്ന നിലയില്‍ പെണ്‍വീട്ടുകാര്‍ വിവാഹാലോചന നിരസിക്കുകയായിരുന്നു. ഇതിനെത്തുടര്‍ന്ന് പെട്ടെന്ന് പണവും സ്വത്തും സമ്പാദിക്കുക യെന്ന ലക്ഷ്യത്തോടെയാണ് കൊലപാതകത്തിന് തുനിഞ്ഞതെന്നാണ് പൊലീസിന്റെ കണ്ടെത്തല്‍.
ഇതേ തരത്തില്‍ പെട്ടെന്ന് പണമുണ്ടാക്കുക എന്ന ലക്ഷ്യത്തോടെ പലരെയും പരിചയപ്പെടുകയും ഹാസന്‍, പൊന്നമ്പേട്ട എന്നിവിടങ്ങളില്‍ ഭൂമിയില്‍ നിധിയുണ്ടെന്ന് പറഞ്ഞ് കബളിപ്പിക്കുകയും ചെയ്തതായും അന്വേഷണസംഘം കണ്ടെത്തിയിട്ടുണ്ട്. ഗോണിക്കുപ്പ പോലീസ് സ്റ്റേഷന്‍ പരിധിയിലെ ഒരു അവിവാഹിതയായ സ്ത്രീയെയും, ഒറ്റക്ക് താമസിക്കുന്നവരെയും, നിരവധി സ്വത്തുക്കള്‍ ഉള്ളവരെയും സൗഹൃദം നടിച്ച് കബളിപ്പിച്ചിട്ടുണ്ട്.
കൊലചെയ്യപ്പെട്ട പ്രദീപ് കൊയിലിയും അവിവാഹിതനാണെന്നും ധാരാളം സ്വത്തിനു ഉടമയാണെന്നും മലയാളിയാണെന്നും ഇടനിലക്കാരില്‍ നിന്നുമറിയാനിടയാവുകയും ചെയ്തതോടെയാണ് ഇദ്ദേഹത്തിന്റെ ഭൂമി വാങ്ങാന്‍ എന്ന നിലയില്‍ പരിചയപ്പെട്ടത്. പ്രദീപിന്റെ സ്വത്തിനു വില പറയുകയും ഒരു ലക്ഷം രൂപ മുന്‍കൂറായി നല്‍കുകയും ചെയ്തു. കൊലപാതകം നടത്തിയ ശേഷം വീട്ടിലെ നിരീക്ഷണക്യാമറകള്‍ നശിപ്പിക്കാനുള്ള ശ്രമവും പ്രതികള്‍ നടത്തി.
വീരാജ്‌പേട്ട സബ് ഡിവിഷന്‍ ഡി എസ് പി എസ്. മഹേഷ്‌കുമാര്‍, ഗോണിക്കുപ്പസര്‍ക്കില്‍ സി പി ഐ മാരായ ശിവരാജ് മുധോള്‍, അനൂപ് മടപ്പാപ്പി, ഗോണിക്കൊപ്പ സ്റ്റേഷന്‍ പി എസ് ഐ പ്രദീപ് കുമാര്‍ എന്നിവരടങ്ങിയ സംഘമാണ് കേസ് അന്വേഷിച്ചത്. നേരത്തെ കണ്ണൂരിലെ പ്രശസ്തമായ ആശുപത്രിയായ കൊയിലിയുടെ നടത്തിപ്പുകാരന്‍ കൂടിയായിരുന്നു പ്രദീപന്‍.
