തൊട്ട് അടുത്ത വീട്ടിൽ പണിക്കെത്തിയതോടെ കണ്ട് നല്ല പരിചയത്തിലായി; മറ്റൊരു സംസ്ഥാനത്ത് നിന്നെത്തിയ ആളെന്ന വേർതിരിവ് കട്ടാതെ സ്വന്തം മകനെ പോലെ നോക്കിയ ആ വൃദ്ധ; ഒടുവിൽ കഴുത്ത് മിനുങ്ങുന്നത് കണ്ടതും ആദം അലിയുടെ കൊടും ക്രൂരത; കേശവദാസപുരത്തെ നടുക്കിയ മനോരമ വധക്കേസിൽ വിധി പറഞ്ഞ് ജഡ്ജി; കോടതി മുറിക്കുള്ളിൽ നാടകീയ രംഗങ്ങൾ
തിരുവനന്തപുരം: കേശവദാസപുരം മനോരമ വധക്കേസിൽ പ്രതിയായ ബംഗാൾ സ്വദേശി ആദം അലിക്ക് തിരുവനന്തപുരം കോടതി ജീവപര്യന്തം കഠിന തടവും 90,000 രൂപ പിഴയും വിധിച്ച് ഉത്തരവായി. തൊട്ടടുത്ത വീട്ടിലെ ജോലിക്കാരനായിരുന്ന ആദം അലി, മനോരമയെന്ന വൃദ്ധയെ കൊലപ്പെടുത്തി മൃതദേഹം കിണറ്റിലിട്ട കേസിലാണ് വിധി വന്നത്. അതിക്രൂരമായ കൊലപാതകമാണ് 2022-ൽ കേശവദാസപുരത്ത് നടന്നത്.
ശിക്ഷാവിധി പ്രഖ്യാപിക്കുന്നതിന് മുൻപ് ഇന്ന് രാവിലെ കോടതിയിൽ നാടകീയ സംഭവങ്ങൾ അരങ്ങേറി. താൻ കുറ്റക്കാരനാണെന്ന് കോടതി കണ്ടെത്തിയതിന് പിന്നാലെ പ്രതിയായ ആദം അലി കോടതി മുറിയിൽനിന്ന് പെട്ടെന്ന് ഇറങ്ങിയോടാൻ ശ്രമിച്ചു.
കോടതി വളപ്പിൽനിന്ന് രക്ഷപ്പെടാനുള്ള ഇയാളുടെ ശ്രമം ശ്രദ്ധയിൽപ്പെട്ട അഭിഭാഷകരും പോലീസും ഉടൻതന്നെ ഇയാളെ പിന്തുടർന്നു. തുടർന്ന് ഓടിച്ചിട്ട് പിടികൂടിയ ശേഷമാണ് പ്രതിയെ വീണ്ടും കോടതിയിൽ ഹാജരാക്കിയത്. ഉച്ചയ്ക്ക് രണ്ട് മണിക്ക് ശിക്ഷാവിധി സംബന്ധിച്ച വാദം നടക്കാനിരിക്കെയായിരുന്നു പ്രതിയുടെ ഈ അപ്രതീക്ഷിത നീക്കം.
കൊല്ലപ്പെടുമ്പോൾ 21 വയസ്സ് മാത്രമാണ് ബംഗാൾ സ്വദേശിയായ ആദം അലിക്ക് പ്രായമുണ്ടായിരുന്നത്. മോഷണം ലക്ഷ്യമിട്ടുള്ള കൊലപാതകമാണെന്നാണ് പോലീസ് കണ്ടെത്തിയത്. കൊല്ലപ്പെട്ട മനോരമയുടെ തൊട്ടടുത്ത വീട്ടിൽ ജോലിക്കായി വന്നതായിരുന്നു ഇയാൾ. പതിവായി മനോരമയുടെ വീട്ടിൽ വെള്ളം കുടിക്കാനായി പോയിരുന്നതിനാൽ പ്രതിക്ക് വീടിനുള്ളിലേക്ക് എളുപ്പത്തിൽ കടന്നുചെല്ലാൻ സാധിച്ചു. ഈ പരിചയം മുതലെടുത്താണ് ഇയാൾ അതിക്രമം നടത്തിയത്.
കൊലപാതകത്തിന് ശേഷം മനോരമയുടെ ആഭരണങ്ങൾ നഷ്ടപ്പെട്ടതായി കണ്ടെത്തി. കഴുത്ത് ഞെരിച്ചാണ് വൃദ്ധയെ കൊലപ്പെടുത്തിയത്. കൊലപാതകത്തിന് ശേഷം മൃതദേഹം ഒളിപ്പിക്കാൻ പ്രതി നടത്തിയ ശ്രമങ്ങളാണ് കേസിൽ നിർണായകമായ സി.സി.ടി.വി ദൃശ്യങ്ങളിലൂടെ പുറത്തുവന്നത്. മനോരമയെ വധിച്ച ശേഷം ആദം അലി ഒറ്റയ്ക്കാണ് മൃതദേഹം ചുമന്ന് തൊട്ടടുത്ത പുരയിടത്തിലേക്ക് കൊണ്ടുപോയത്. അവിടെനിന്ന് കിണറ്റിൻകര വരെ മൃതദേഹം വലിച്ചിഴച്ചുകൊണ്ട് പോവുകയായിരുന്നു.
തുടർന്ന്, മൃതദേഹം പൊങ്ങിവരാതിരിക്കാൻ പ്രതി കാലിൽ കല്ല് ചേർത്ത് കെട്ടിയ ശേഷമാണ് കിണറ്റിലേക്ക് തള്ളിയിട്ടത്. ഈ ദൃശ്യങ്ങൾ പോലീസിന് ലഭിച്ചതോടെയാണ് പ്രതിയിലേക്കുള്ള അന്വേഷണം വേഗത്തിലായത്.
കൊലപാതകത്തിന് ശേഷം ട്രെയിൻ മാർഗം കേരളം വിട്ട പ്രതിയെ ചെന്നൈ റെയിൽവേ സ്റ്റേഷനിൽവെച്ച് ആർ.പി.എഫ് പിടികൂടുകയായിരുന്നു. അത്യന്തം ക്രൂരമായ കൊലപാതകമാണ് പ്രതി നടത്തിയത് എന്ന പ്രോസിക്യൂഷൻ വാദം കോടതി അംഗീകരിച്ചു. പിഴത്തുകയായ 90,000 രൂപ കൊല്ലപ്പെട്ട മനോരമയുടെ ആശ്രിതർക്ക് നൽകാനും കോടതി വിധിച്ചു.
