സ്വകാര്യമായി സംസാരിക്കാനുണ്ടെന്ന് പറഞ്ഞ ശേഷം അടുത്തേക്ക് വിളിച്ച് തുരുതുരാ വെടിവെച്ചു; മഹേഷ് ഗുര്‍ജാര്‍ നിഷ്‌കരുണം മകളെ കൊന്നത് പോലിസിന്റെ കണ്‍മുന്നിലിട്ട്: 20കാരിയെ പിതാവ് കൊന്നു തള്ളിയത് പ്രണയം തുറന്ന് പറഞ്ഞതിന് പിന്നാലെ
പോലിസിന്റെ കണ്‍മുന്നിലിട്ട് 20കാരിയെ വെടിവെച്ച് കൊന്ന് പിതാവ്: അറസറ്റ് ചെയ്ത് പോലിസ്
ഗ്വാളിയര്‍: വിവാഹത്തിന് നാലു നാള്‍ മാത്രം ബാക്കി നില്‍ക്കെ പോലിസിന്റെ കണ്‍മുന്നിലിട്ട് നവവധുവിനെ പിതാവ് വെടിവെച്ചു കൊന്നു. മധ്യപ്രദേശിലെ ഗ്വാളിയര്‍ ഗോലകാ മന്ദിര്‍ ഏരിയയില്‍ കഴിഞ്ഞ ചൊവ്വാഴ്ച രാത്രി ഒന്‍പത് മണിയോടെയാണ് നാടിനെ നടുക്കിയ സംഭവം നടന്നത്. തനു ഗുര്‍ജാര്‍ എന്ന 20 വയസുകാരിയാണ് കൊല്ലപ്പെട്ടത്. പിതാവ് നിശ്ചയിച്ച വിവാഹത്തില്‍ താല്‍പര്യമില്ലെന്നും താന്‍ മറ്റൊരാളുമായി ഇഷ്ടത്തിലാണെന്നും യുവതി വെളിപ്പെടുത്തിയതാണ് കൊലപാതകത്തിലേക്ക് നയിച്ചത്.
പോലിസിനൊപ്പം വീടുവിടാന്‍ ഒരുങ്ങിയ തനുവിനെ പിതാവ് മഹേഷ് ഗുര്‍ജാര്‍ അടുത്തേക്ക് വിളിച്ച ശേഷം നാടന്‍ തോക്കുകൊണ്ട് പോയിന്റ് ബ്ലാങ്കില്‍ വെടിവെച്ച് കൊല്ലുക ആയിരുന്നു. നിശ്ചയിച്ച വിവാഹം വേണ്ടെന്നും മറ്റൊരാളെ ഇഷ്ടമാണെന്നും തനു പറഞ്ഞതോടെയാണ് മഹേഷ് മകളെ കൊലപ്പെടുത്തിയതെന്ന് പൊലീസ് പറഞ്ഞു. മഹേഷ് എന്ന യുവാവുമായി പിതാവ് തനുവിന്റെ വിവാഹം നിശ്ചയിച്ചിരുന്നു. വിവാഹത്തിന് നാല് ദിവസം മാത്രം ബാക്കിയുള്ളപ്പോഴാണ് തനിക്ക് മറ്റൊരാളെ ഇഷ്ടമാണെന്ന വിവരം തനു പറയുന്നത്. എന്നാല്‍ കുടുംബം ഇതിനെ എതിര്‍ത്തു.
എന്നാല്‍ അന്ന് വൈകിട്ട് തനിക്ക് ഇഷ്ടമില്ലാത്ത വിവാഹത്തിന് കുടുംബം നിര്‍ബന്ധിക്കുകയാണെന്ന് ആരോപിച്ച് തനു സോഷ്യല്‍ മീഡിയയില്‍ ഒരു വീഡിയോ പോസ്റ്റ് ചെയ്തിരുന്നു. 52 സെക്കന്‍ഡ് ദൈര്‍ഘ്യമുള്ള വീഡിയോയില്‍ തനിക്ക് പിതാവ് നിശ്ചയിച്ച വിവാഹത്തില്‍ താല്‍പ്പര്യമില്ലെന്നും മറ്റൊരാളുമായി പ്രണയത്തിലാണെന്നും യുവതി വെളിപ്പെടുത്തി.
വിക്കി എന്ന യുവാവുമായി താന്‍ ആറ് വര്‍ഷമായി പ്രണയിത്തിലാണെന്നാണ് യുവതി പറയുന്നത്. വിക്കിയെ വിവാഹം കഴിക്കാനാണ് തനിക്ക് ആഗ്രഹം. നവവരന്‍ മഹേഷിനെയും കുടുംബത്തെയും പിതാവിനെയും വിഷമിപ്പിക്കുന്നതില്‍ തനിക്ക് ദുഖമുണ്ടെന്നും യുവതി പറയുന്നു. ഈ വീഡിയോ പുറത്ത് വന്നാല്‍ താന്‍ ജീവനോടെ ഉണ്ടാകുമോ എന്നറിയില്ലെന്നും തനു പറയുന്നത് വീഡിയോയില്‍ പറയുന്നുണ്ട്. വീഡിയോ പുറത്ത് വന്ന് നാല് മണിക്കൂറുകള്‍ക്ക് ശേഷമാണ് കൊലപാതകം നടന്നത്.
വീഡിയോ വൈറലായതോടെ ജില്ലാ പൊലീസ് മേധാവി ധര്‍മ്മവീര്‍ സിങ്ങിന്റെ നേതൃത്വത്തിലുള്ള പൊലീസ് സംഘം മഹേഷിന്റെ വീട്ടിലെത്തി. തനുവുമായി സംസാരിച്ചെങ്കിലും യുവതി വീട്ടില്‍ നില്‍ക്കില്ലെന്ന് തറപ്പിച്ചു പറഞ്ഞു. തുടര്‍ന്ന് യുവതിയെ സര്‍ക്കാര്‍ അഗതി മന്ദിരത്തിലേക്ക് കൊണ്ടുപോകാന്‍ തീരുമാനമായി. ഇതിനിടെയിലാണ് മകളോട് സ്വകാര്യമായി സംസാരിക്കണമെന്ന് പറഞ്ഞ് അടുത്തെത്തിയ മഹേഷ് ഗുര്‍ജാര്‍ നാടന്‍ തോക്കുപയോഗിച്ച് മകളെ വെടിവെച്ചത്.
ബന്ധുവായ രാഹുലിന്റെ സഹായത്തോടെയാണ് മഹേഷ് മകളെ വെടിവെച്ച് വീഴ്ത്തിയത്. മഹേഷ് മകളുടെ നെഞ്ചിലാണ് വെടിവെച്ചത്. തോക്ക് വാങ്ങി രാഹുലും തനുവിന് നേരെ വെടിയുതിര്‍ത്തു. തനുവിന്റെ നെറ്റിയിലും കഴുത്തിലും കണ്ണിനും മൂക്കിനുമിടയിലുള്ള ഭാഗത്താണ് രാഹുല്‍ വെടിയുതിര്‍ത്തത്. സംഭവ സ്ഥലത്തുവെച്ചു തന്നെ തനു മരിച്ചു. സംഭവത്തിന് പിന്നാലെ മഹേഷ് ഗുര്‍ജാറിനെ പൊലീസ് അറസ്റ്റ് ചെയ്തു. എന്നാല്‍ തോക്കുമായി രാഹുല്‍ ഓടി രക്ഷപ്പെട്ടു. ഇയാള്‍ക്കായി അന്വേഷണം നടക്കുന്നതായി പൊലീസ് അറിയിച്ചു.
