വസ്ത്രത്തിനുള്ളില്‍ കൈകടത്തി ലൈംഗികാതിക്രമം; സഹയാത്രികന്‍ പലതവണ കടന്നുപിടിച്ചതോടെ ദൃശ്യങ്ങള്‍ പകര്‍ത്തി; പെണ്‍കുട്ടി ഇയാളുടെ കൈ തട്ടിയെറിഞ്ഞു; മുഖത്ത് അടിക്കുകയും ചെയ്തു; എന്നിട്ടും നോക്കിനിന്ന് മറ്റു യാത്രക്കാര്‍; പൊലീസ് സ്റ്റേഷനിലേക്ക് പോകാന്‍ ആവശ്യപ്പെട്ടിട്ടും പ്രതിയെ കെഎസ്ആര്‍ടിസി ബസില്‍ നിന്നും ഇറക്കിവിട്ട് കണ്ടക്ടര്‍; ദൃശ്യങ്ങള്‍ വൈറലായതോടെ കേസെടുത്ത് പൊലീസ്
തിരുവനന്തപുരം: കെഎസ്ആര്‍ടിസി ബസില്‍ വച്ച് പെണ്‍കുട്ടിക്കു നേരെ സഹയാത്രികന്‍ ലൈംഗിക അതിക്രമം നടത്തിയ സംഭവത്തില്‍ വീഡിയോ ദൃശ്യങ്ങള്‍ വൈറലായതോടെ പൊലീസ് കേസെടുത്തു. സംഭവത്തിന്റെ പെണ്‍കുട്ടി പകര്‍ത്തിയ ദൃശ്യങ്ങള്‍ സാമൂഹ്യ മാധ്യങ്ങളില്‍ വൈറലായിരുന്നു. എന്നാല്‍ പെണ്‍കുട്ടിയോ കെഎസ്ആര്‍ടിസി അധികൃതരോ പരാതി നല്‍കിയിരുന്നില്ല. എന്നാല്‍ ദൃശ്യങ്ങള്‍ വൈറലായതോടെയാണ് പൊലീസ് അന്വേഷണം ആരംഭിച്ചത്. കഴിഞ്ഞ ദിവസം തിരുവനന്തപുരത്തു നിന്ന് വെള്ളറടയിലേക്ക് പോയ ബസിലാണ് പെണ്‍കുട്ടിക്ക് നേരെ അതിക്രമം ഉണ്ടായത്. സഹയാത്രികന്‍ പലതവണ കടന്നുപിടിച്ചതോടെ പെണ്‍കുട്ടി മൊബൈലില്‍ ദൃശ്യങ്ങള്‍ പകര്‍ത്തുകയായിരുന്നു.
കാട്ടാക്കടയിലേക്ക് പോകാന്‍ തിരുവനന്തപുരത്തു നിന്നാണ് പെണ്‍കുട്ടിയും യുവാവും ബസില്‍ കയറിയത്. പേയാട് ഭാഗത്ത് എത്തിയപ്പോഴാണ് ഇയാള്‍ പെണ്‍കുട്ടിയോട് ലൈംഗികാതിക്രമം നടത്തിയത്. ഇത് പകര്‍ത്തുന്നതിനിടെ പ്രതി അപ്രതീക്ഷിതമായി വസ്ത്രത്തിനുള്ളില്‍ കൈകടത്തി അതിക്രമം നടത്തിയത്. ഈ സമയം പെണ്‍കുട്ടി ഇയാളുടെ കൈ തട്ടിയെറിഞ്ഞു. ഇയാളുടെ മുഖത്ത് അടിക്കുകയും ചെയ്തു. സംഭവം നടക്കുമ്പോള്‍ മറ്റു യാത്രക്കാര്‍ പ്രതികരിച്ചിരുന്നില്ല. ഒന്നുകില്‍ പൊലീസ് സ്റ്റേഷനിലേക്ക് പോകണമെന്നും അല്ലെങ്കില്‍ പ്രതിയെ ബസില്‍ നിന്ന് ഇറക്കി വിടണമെന്നും പെണ്‍കുട്ടി ആവശ്യപ്പെട്ടു. ഇതോടെ കണ്ടക്ടര്‍ എത്തി പ്രതിയെ പേയാട് ഭാഗത്ത് ഇറക്കിവിട്ടു.
പെണ്‍കുട്ടി പുറത്തുവിട്ട വീഡിയോ സാമൂഹ്യ മാധ്യമങ്ങളിലൂടെ പ്രചരിക്കുകയും വൈറലാവുകയും ചെയ്തിരുന്നു. സമൂഹ മാധ്യമങ്ങളില്‍ പ്രചരിക്കുന്ന വിഡിയോയില്‍ യുവതിക്കുനേരെ ലൈംഗിക അതിക്രമം നടത്തുന്നത് വ്യക്തമായി കാണാന്‍ സാധിക്കും. പിന്നീട് വീഡിയോ ഉന്നത പൊലീസ് ഉദ്യോഗസ്ഥരുടെ ശ്രദ്ധയില്‍പ്പെട്ടതോടെയാണ് കേസില്‍ സ്വയമേ കേസെടുക്കാന്‍ തീരുമാനിച്ചത്. സംഭവത്തെ കുറിച്ച് അന്വേഷിച്ച് റിപ്പോര്‍ട്ട് നല്‍കാനും ഉചിതമായ നടപടി സ്വീകരിക്കാനും പൂജപ്പുര പൊലീസിന് തിരുവനന്തപുരം സിറ്റി പൊലീസ് കമ്മീഷണര്‍ നിര്‍ദ്ദേശം നല്‍കിയത്. പെണ്‍കുട്ടിയെ കണ്ടെത്തിയ പൊലീസ് മൊഴിയെടുത്ത ശേഷമാണ് കേസ് രജിസ്റ്റര്‍ ചെയ്തത്. സംഭവം നടന്ന സ്ഥലം വിളപ്പില്‍ ശാല സ്റ്റേഷന്‍ പരിധിയിലായതിനാല്‍ കേസ് അവിടേക്ക് കൈമാറി. പ്രതിയെ കണ്ടെത്താന്‍ ശ്രമം തുടങ്ങിയെന്ന് പൊലീസ് പറഞ്ഞു.
വെള്ളറട ഡിപ്പോയിലെ ബസില്‍ വിളപ്പില്‍ ശാല ഭാഗത്തു വച്ചാണ് അതിക്രമം ഉണ്ടായത്. പെണ്‍കുട്ടിയുടെ അടുത്തിരുന്ന യാത്രക്കാരന്‍ ബാഗ് മറച്ചുവച്ച് ശരീരത്തില്‍ പിടിക്കുകയായിരുന്നു. ഇതിന്റെ വിഡിയോ പകര്‍ത്തിയ പെണ്‍കുട്ടി കൈ തട്ടിമാറ്റിയ ശേഷം ബഹളം വയ്ക്കുകയും അക്രമിയെ അടിക്കുകയും ചെയ്തു. ഇങ്ങനെയാണോ ബസില്‍ പെരുമാറുന്നതെന്നു പെണ്‍കുട്ടി ചോദിച്ചു. എന്നാല്‍ ഒപ്പമുണ്ടായിരുന്ന ആരും പ്രതികരിക്കാന്‍ തയാറായില്ലെന്ന് വിഡിയോയില്‍ കാണാം. തുടര്‍ന്ന് കണ്ടക്ടര്‍ എത്തി ബസ് നിര്‍ത്തി പെണ്‍കുട്ടിയെ ഉപദ്രവിച്ച ആളെ ഇറക്കിവിടുകയായിരുന്നു. പെണ്‍കുട്ടിക്കു പരാതി ഇല്ലാത്തതിനാലാണ് പൊലീസില്‍ വിവരം അറിയിക്കാതിരുന്നതെന്നാണ് കെഎസ്ആര്‍ടിസി അധികൃതര്‍ അന്ന് പറഞ്ഞത്.
