എപ്പിസിയോട്ടമി ഇട്ടത് പാളി; മലദ്വാരത്തിലെ ഞരമ്പ് മുറിച്ചു! സ്വാഭാവിക പ്രസവത്തിനിടെ ഡോക്ടര് കാണിച്ചത് കൊടും ക്രൂരത; പിഴവ് മറച്ചുവെക്കാന് വീണ്ടും തുന്നിക്കെട്ടി? വിതുര സ്വദേശിനിയ്ക്ക് ദുരിത ജീവിതം; നെടുമങ്ങാട് ജില്ലാ ആശുപത്രിയിലെ ഡോക്ടര്ക്കെതിരെ പരാതിയുമായി 23-കാരിയുടെ കുടുംബം
തിരുവനന്തപുരം: നെടുമങ്ങാട് ജില്ലാ ആശുപത്രിയില് ഗുരുതര ചികിത്സാ പിഴവെന്ന് പരാതി. സ്വാഭാവിക പ്രസവത്തിനിടെ ഡോക്ടര്ക്ക് ഗുരുതര പിഴവ് പറ്റിയെന്നാണ് ആരോപണം. പ്രസവത്തെ തുടര്ന്ന് ഗുരുതര ആരോഗ്യപ്രശ്നങ്ങള് ഉണ്ടായെന്നു കാട്ടി വിതുര സ്വദേശി ഹസ്ന ഫാത്തിമയാണ് മനുഷ്യാവകാശ കമ്മിഷനും വനിതാ കമ്മിഷനും പരാതി നല്കിയത്. ആറ് മാസമായി വിതുര സ്വദേശിനി കടുത്ത ദുരിതത്തിലാണ്.
പ്രസവത്തിനു ശേഷം തുന്നിക്കെട്ടിയത് ശരിയായ രീതിയില് അല്ലെന്നും ഇതുമൂലം മലദ്വാരത്തിലെ ഞരമ്പ് മുറിഞ്ഞ് അണുബാധയുണ്ടായെന്നും പരാതിയില് പറയുന്നു. തുടര്ന്ന് വിവിധ ആശുപത്രികളിലായി മൂന്നു ശസ്ത്രക്രിയകള് കൂടി ചെയ്യേണ്ടിവന്നു. രണ്ട് സെന്റിമീറ്ററോളം നീളത്തില് ഞരമ്പ് മുറിഞ്ഞതായി സ്കാനിങ്ങില് കണ്ടെത്തിയിരുന്നു. മലമൂത്ര വിസര്ജനത്തിന് ബാഗുമായി നടക്കേണ്ട അവസ്ഥയിലാണെന്ന് യുവതി പറഞ്ഞു.
പ്രസവ ശേഷം 23-കാരിക്ക് മലവിസര്ജനത്തിന് തടസമുണ്ട്. യോനിയിലൂടെയാണ് മലം പോകുന്നത്. മലം പോകാതെ വയറ്റില് കെട്ടിക്കിടന്ന് അണുബാധയുണ്ടായി. ചികിത്സാ പിഴവ് മറച്ചുവെച്ച് ഡോക്ടര് മുറിവ് തുന്നി കെട്ടിയെന്നും ആരോപണമുണ്ട്. പ്രസവത്തെത്തുടര്ന്ന് എപ്പിസിയോട്ടമി ഇട്ടതില് ഡോക്ടര്ന്ന് കൈപ്പിഴവുണ്ടായെന്നാണ് ആരോപണം. പ്രസവസമയത്ത് കുഞ്ഞിന് എളുപ്പത്തില് പുറത്തുവരാനായി യോനിക്കും മലദ്വാരത്തിനും ഇടയിലുള്ള ഭാഗത്ത് ഡോക്ടര് ചെയ്യുന്ന ഒരു ചെറിയ ശസ്ത്രക്രിയാ മുറിവാണ് എപ്പിസിയോട്ടമി. മലദ്വാരത്തിലെ ഞരമ്പ് മുറിഞ്ഞതാണ് പ്രശ്നത്തിന് കാരണമെന്ന് സ്കാനിംഗില് കണ്ടെത്തി.
2025 ജൂണ് 19നാണ് പ്രസവം നടന്നത്. മൂന്നു ദിവസത്തിനു ശേഷം മുറിവില് പ്രശ്നം തുടങ്ങി. തുന്നിക്കെട്ടിയതിലുണ്ടായ പിഴവ് മറച്ചു വച്ച ഡോക്ടര്, വാര്ഡിലേക്ക് മാറ്റിയെന്നും പരാതിയില് പറയുന്നു. തുടര്ന്ന് മെഡിക്കല് കോളജ് ആശുപത്രിയിലും സ്വകാര്യ ആശുപത്രിയിലും ചികിത്സ തേടി. കോസ്റ്റോമി ശസ്ത്രക്രിയയും പ്ലാസ്റ്റിക് സര്ജറിയും ചെയ്തു. രണ്ടു ശസ്ത്രക്രിയകള് കൂടി ചെയ്യാനുണ്ട്. ഇതുവരെ ചികിത്സയ്ക്കായി ആറു ലക്ഷം രൂപ ചെലവായെന്നും പരാതിക്കാരി വ്യക്തമാക്കുന്നു. പരാതിയില് അന്വേഷണം നടക്കുകയാണെന്ന് നെടുമങ്ങാട് ജില്ലാ ആശുപത്രി അധികൃതര് പറഞ്ഞു.
വിഷയത്തില് പ്രാഥമിക അന്വേഷണത്തിന് ഉത്തരവിട്ടുണ്ടെന്ന് നെടുമങ്ങാട് ജില്ലാ ആശുപത്രി സൂപ്രണ്ട് പറഞ്ഞു. വണ്ടിയില് ഇരുന്ന് യാത്ര ചെയ്തതാണ് ഞരമ്പ് മുറിയാന് കാരണമെന്നാണ് പ്രസവം നടത്തിയ ഡോക്ടര് നല്കുന്ന വിശദീകരണം.
