അയ്യോ..എന്റെ എല്ലാം അടിച്ചോണ്ട് പോയെന്ന് ബസ് സ്റ്റാൻഡിൽ നിലവിളി; ഓടിക്കൂടിയ ആളുകൾ കള്ളലക്ഷണത്തിൽ നിന്ന രണ്ടുപേരെ തൂക്കി; കൗണ്ടറിൽ നിന്ന ജീവനക്കാരുടെ വരവിൽ അടുത്ത പൊല്ലാപ്പ്; സിസിടിവി ദൃശ്യങ്ങൾ കണ്ട് തലയിൽ കൈവച്ച് പോലീസ്

ബെംഗളൂരു: ഷിവാജിനഗർ ബിഎംടിസി ബസ് സ്റ്റാൻഡിൽ പോക്കറ്റടിക്കാരെച്ചൊല്ലിയുള്ള ബഹളത്തിനിടെ ബസ് പാസ് കൗണ്ടറിൽ നിന്നും വൻ തുകയുടെ കവർച്ച. ഏകദേശം 40,000 രൂപയിലധികം പണം, 397 പ്രതിമാസ ബസ് പാസുകൾ, ഒരു സ്വൈപ്പിംഗ് മെഷീൻ എന്നിവ അടങ്ങിയ ബോക്സ് ആണ് മോഷ്ടാവ് കടത്തിക്കൊണ്ടുപോയത്. സെപ്റ്റംബർ 25-ന് വൈകുന്നേരം 6:55 നും 7 മണിക്കും ഇടയിലാണ് സംഭവം നടന്നത്.

ബിഎംടിസി ബസ് സ്റ്റേഷനിലെ ട്രാഫിക് കൺട്രോളറായ ശിവലിംഗപ്പ (47) ആണ് കൗണ്ടറിലുണ്ടായിരുന്നത്. ഉച്ചയ്ക്ക് 2 മണി മുതൽ വൈകുന്നേരം വരെ പാസുകൾ വിറ്റഴിച്ചതിലൂടെ ഏകദേശം 40,000 രൂപയിലധികം കൗണ്ടറിൽ സൂക്ഷിച്ചിരുന്നു. വൈകുന്നേരം 6:50 ഓടെ, കൗണ്ടറിലേക്ക് എത്തിയ മറ്റൊരു ജീവനക്കാരൻ ആദ്യത്തെയും രണ്ടാമത്തെയും പ്ലാറ്റ്‌ഫോമുകളിൽ ചില യാത്രക്കാർ ബഹളമുണ്ടാക്കുന്നതായും സ്ഥിതി നിയന്ത്രണവിധേയമല്ലാത്തതായും ശിവലിംഗപ്പയെ അറിയിച്ചു.

ഈ വിവരം ലഭിച്ചയുടൻ, ശിവലിംഗപ്പ കൗണ്ടറിലുണ്ടായിരുന്ന പണവും ബസ് പാസുകളും സ്വൈപ്പിംഗ് മെഷീനും ഒരു അലുമിനിയം ബോക്സിലാക്കി പൂട്ടി. തുടർന്ന് കൗണ്ടറിൻ്റെ വാതിൽ അടച്ച്, ബഹളം നിയന്ത്രിക്കാൻ പ്ലാറ്റ്‌ഫോമുകളിലേക്ക് പോയി. യാത്രക്കാർ മോഷ്ടിച്ചെന്ന് സംശയിക്കുന്നവരെ പിടികൂടുകയും അവരുടെ പേഴ്സുകളും മൊബൈൽ ഫോണുകളും മോഷ്ടിക്കാൻ ശ്രമിച്ചെന്നാരോപിച്ച് ബഹളം വെക്കുകയുമായിരുന്നു.

ജീവനക്കാർക്ക് വേണ്ട നിർദ്ദേശങ്ങൾ നൽകി കൗണ്ടറിലേക്ക് തിരിച്ചെത്തിയപ്പോഴാണ് ശിവലിംഗപ്പ ഞെട്ടിക്കുന്ന കാഴ്ച കണ്ടത്. കൗണ്ടറിൻ്റെ വാതിൽ തുറന്നുകിടക്കുകയും ബോക്സ് അവിടെനിന്ന് കാണാതിരിക്കുകയുമായിരുന്നു. മോഷ്ടിക്കപ്പെട്ട പ്രതിമാസ പാസുകൾക്ക് 035117, 035118 എന്നിങ്ങനെ തുടങ്ങുന്ന സീരിയൽ നമ്പറുകളുണ്ടായിരുന്നതായി അദ്ദേഹം പോലീസിന് മൊഴി നൽകി.

സംഭവത്തെക്കുറിച്ച് പോലീസ് അന്വേഷണം ആരംഭിച്ചിട്ടുണ്ട്. സിസിടിവി ദൃശ്യങ്ങൾ പരിശോധിച്ചപ്പോഴാണ് ഒരു മോഷ്ടാവ് കൗണ്ടറിൻ്റെ വാതിൽ തുറന്ന് ബോക്സ് എടുത്തുകൊണ്ടുപോകുന്നതായി കണ്ടെത്തിയത്. പ്രതിയെ പിടികൂടാനുള്ള ശ്രമങ്ങൾ ഊർജിതമാക്കിയതായി മുതിർന്ന പോലീസ് ഉദ്യോഗസ്ഥൻ അറിയിച്ചു. ബിഎൻഎസ് (BNS) സെക്ഷൻ 305 പ്രകാരം പോലീസ് കേസെടുത്തിട്ടുണ്ട്.