അംഗപരിമിതനിൽ നിന്നും ലോട്ടറി ടിക്കറ്റ് വാങ്ങി പഴയ ഫോൺ നൽകി; പിന്നാലെ എ.ടി.എമ്മിൽനിന്നു പണം എടുത്തുവരാമെന്ന് പറഞ്ഞ് മുങ്ങി; തട്ടിയെടുത്ത ലോട്ടറി ടിക്കറ്റുകൾ മറിച്ചുവിറ്റ് മദ്യപിക്കും; പിടിയിലായ ശാന്തമ്പാറക്കാരൻ ബിജു സ്ഥിരം തട്ടിപ്പുക്കാരൻ
കോട്ടയം: വിൽപ്പനക്കാരെ കബളിപ്പിച്ച് ലോട്ടറി ടിക്കറ്റുകൾ തട്ടിയെടുത്ത് മറിച്ചുവിറ്റ കേസിൽ പ്രതി അറസ്റ്റിൽ. ഇടുക്കി ശാന്തമ്പാറ സ്വദേശി ബിജു (39) ആണ് കോട്ടയം വെസ്റ്റ് പോലീസിന്റെ പിടിയിലായത്. കോട്ടയം നഗരത്തിൽനിന്ന് മാത്രം പത്ത് ഓണം ബമ്പർ ടിക്കറ്റുകൾ അടക്കം ലക്ഷക്കണക്കിന് രൂപയുടെ ലോട്ടറി ടിക്കറ്റുകൾ ഇയാൾ തട്ടിയെടുത്തതായി പോലീസ് കണ്ടെത്തി. ലോട്ടറി ടിക്കറ്റുകൾ മോഷ്ടിച്ചെടുത്തതാണെന്നറിയാതെ നിരവധി പേർ ഇയാളിൽനിന്ന് ടിക്കറ്റുകൾ വാങ്ങിയിട്ടുണ്ട്.
ഇങ്ങനെ വിറ്റുകിട്ടുന്ന പണം മദ്യപാനത്തിനും മറ്റു ലഹരി ഉപയോഗത്തിനും ഉപയോഗിക്കുകയാണ് പതിവ്. തട്ടിപ്പുമായി ബന്ധപ്പെട്ട് കോട്ടയം വെസ്റ്റ് പോലീസ് ഇൻസ്പെക്ടർ കെ.ആർ. പ്രശാന്ത്കുമാർ, എസ്ഐ ടി.ജി. രാജേഷ് എന്നിവരുടെ നേതൃത്വത്തിലുള്ള സംഘമാണ് ഇയാളെ എറണാകുളത്തുനിന്ന് അറസ്റ്റ് ചെയ്തത്. ഇടുക്കിയിൽ നേരത്തെ പോക്സോ കേസിൽ പ്രതിചേർക്കപ്പെട്ടിട്ടുള്ളയാളാണ് ബിജു. തട്ടിപ്പ് നടത്തിയതിന്റെ സിസിടിവി ദൃശ്യങ്ങൾ പ്രതിയെ പിടികൂടാൻ പോലീസിന് സഹായകമായി.
സിസിടിവി ദൃശ്യങ്ങളിൽനിന്ന് പ്രതിയെ തിരിച്ചറിഞ്ഞ പോലീസ് ഇടുക്കിയിലെ വീട്ടിലെത്തിയിരുന്നു. എന്നാൽ പ്രതി വീട്ടിലില്ലെന്നും വഴിയോരങ്ങളിലും ബസ് സ്റ്റാൻഡുകളിലുമാണ് കാണാറുള്ളതെന്നും വീട്ടുകാർ പറഞ്ഞതോടെ പോലീസ് ബസ് സ്റ്റാൻഡുകൾ കേന്ദ്രീകരിച്ച് അന്വേഷണം ആരംഭിച്ചു. പിന്നീട് എറണാകുളത്തുനിന്നുള്ള സിസിടിവി ദൃശ്യങ്ങളാണ് പ്രതിയെ കണ്ടെത്താൻ തുണയായത്.
കഴിഞ്ഞ ഓഗസ്റ്റ് 18-നും 22-നും ആണ് കോട്ടയം നഗരമധ്യത്തിൽനിന്ന് ലോട്ടറി ടിക്കറ്റുകളുടെ തട്ടിപ്പ് നടന്നത്. ഫുട്പാത്തിൽ ലോട്ടറി വിൽക്കുകയായിരുന്ന അംഗപരിമിതനായ ആന്ധ്ര ചിറ്റൂർ സ്വദേശി അയ്യൂബിന്റെ കൈയ്യിൽനിന്ന് ഓണം ബമ്പറിന്റെ പത്ത് ലോട്ടറി ടിക്കറ്റുകളാണ് പ്രതി തട്ടിയെടുത്തത്. ടിക്കറ്റ് വാങ്ങി കയ്യിലുണ്ടായിരുന്ന പഴയ ഫോൺ അയ്യൂബിന് നൽകിയ ശേഷം എ.ടി.എമ്മിൽനിന്ന് പണം എടുത്തുവരാമെന്ന് പറഞ്ഞ് കടന്നുകളയുകയായിരുന്നു.
സമാനമായ രീതിയിൽ തിരുനക്കര എസ്ബിഐയുടെ മുന്നിൽ ലോട്ടറി വിറ്റിരുന്ന സുബുവിന്റെ കൈയ്യിൽനിന്ന് ലോട്ടറിയുടെ 40 ടിക്കറ്റുകളും ഇയാൾ തട്ടിയെടുത്തു. ഗൂഗിൾ പേ വഴി പണത്തിനുപകരം പണമയക്കാനുള്ള റിക്വസ്റ്റ് അയച്ചാണ് ഇയാൾ ടിക്കറ്റുകൾ തട്ടിച്ചത്. തുടർന്ന് കോട്ടയം വെസ്റ്റ് പോലീസ് കേസ് രജിസ്റ്റർ ചെയ്ത് അന്വേഷണം ആരംഭിക്കുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. മറ്റു സ്ഥലങ്ങളിലും സമാനമായ ലോട്ടറിത്തട്ടിപ്പുകളിൽ ഇയാൾക്ക് പങ്കുണ്ടോ എന്ന് പോലീസ് അന്വേഷിച്ചു വരികയാണ്.
