ഒന്നര വയസുകാരന്‍ മകനെ കടല്‍പ്പാറയില്‍ എറിഞ്ഞു കൊന്ന കേസിലെ പ്രതി ശരണ്യ ജീവനൊടുക്കാന്‍ ശ്രമിച്ചു; വിഷം കഴിച്ചത് കോഴിക്കോട്ടെ ലോഡ്ജില്‍; വിചാരണ തുടങ്ങാനിരിക്കെ ആത്മഹത്യാ ശ്രമം
കണ്ണൂര്‍: കാമുകനൊപ്പം ജീവിക്കുന്നതിനായി ഒന്നരവയസുകാരന്‍ മകനെ വീട്ടിനടുത്തുള്ള കടലോരത്തെ പാറക്കൂട്ടത്തില്‍ എറിഞ്ഞു കൊന്ന കേസിലെ പ്രതിയും അമ്മയുമായ കണ്ണൂര്‍ തയ്യില്‍ സ്വദേശിനി ശരണ്യ ജീവനൊടുക്കാന്‍ ശ്രമിച്ചു. കോഴിക്കോട്ടെ ലോഡ്ജില്‍ വച്ച് വിഷം കഴിച്ചാണ് യുവതി ജീവനൊടുക്കാന്‍ ശ്രമിച്ചത്. കേസില്‍ ഇന്ന് കോടതിയില്‍ വിചാരണ തുടങ്ങാനിരിക്കെയാണ് ആത്മഹത്യാശ്രമം. ലോഡ്ജില്‍ മുറിയെടുത്ത് വിഷം കഴിച്ചതിനു ശേഷം റെയില്‍വെ സ്റ്റേഷനിലെത്തിയ ശരണ്യയെ അവശനിലയില്‍ കണ്ടെത്തുകയായിരുന്നു. റെയില്‍വേ പൊലിസാണ് ഇവരെ കോഴിക്കോട് മെഡിക്കല്‍ കോളേജ് ആശുപത്രിയിലെത്തിച്ചത്.
2022 ഫെബ്രുവരിയിലാണ് ശരണ്യ ഒന്നര വയസുള്ള മകന്‍ വിയാനെ കടല്‍ത്തീരത്തെ പാറയില്‍ എറിഞ്ഞു കൊന്നുകളഞ്ഞത്. കാമുകനായ കണ്ണൂര്‍ വാരം പുന്നയ്ക്കല്‍ സ്വദേശി നിധിനൊപ്പം ജീവിക്കുന്നതിനായിട്ടായിരുന്നു ക്രൂരകൃത്യം. രാത്രിയില്‍ ശരണ്യയ്ക്കും ഭര്‍ത്താവ് പ്രണവിനുമൊപ്പം കിടന്നുറങ്ങിയ കുഞ്ഞാണ് അതിക്രൂരമായി കൊല്ലപ്പെട്ടത്. പ്രണവുമായി അകന്ന് സ്വന്തം മാതാപിതാക്കള്‍ക്കൊപ്പമായിരുന്നു ശരണ്യയുടെ താമസം. എന്നാല്‍ ഞായറാഴ്ച പ്രണവിനെ വിളിച്ചുവരുത്തി വീട്ടില്‍ താമസിപ്പിക്കുകയും പിറ്റേന്നു പുലര്‍ച്ചെ മൂന്നരയ്ക്കും നാലരയ്ക്കുമിടയില്‍ കൃത്യം നടത്തുകയുമായിരുന്നുവെന്ന് പൊലീസ് കണ്ടെത്തുകയായിരുന്നു.
ശരണ്യയെ പ്രണയം നടിച്ച് നിധിന് ചൂഷണം ചെയ്യുകയും ആഭരണങ്ങള്‍ കൈക്കലാക്കുകയും ചെയ്തതായി പൊലീസ് പറയുന്നു. വായ്പ എടുക്കാനായി നിരന്തരം ഭീഷണിപ്പെടുത്തുകയും നിര്‍ബന്ധിക്കുകയും ചെയ്തു. ശരണ്യയെ കാണാനും പലപ്പോഴുമെത്തിയിരുന്നു. ഇതിനിടെയാണ് നിധിന് മറ്റൊരു പ്രണയമുണ്ടെന്നും ആ പെണ്‍കുട്ടിയെ വിവാഹം കഴിക്കാന്‍ പോവുകയാണെന്നും ശരണ്യ അറിഞ്ഞത്. ഇതേ ചൊല്ലി തര്‍ക്കമുണ്ടായപ്പോള്‍ സ്വീകരിക്കാന്‍ ഒരുക്കമാണെന്നും കുഞ്ഞുള്ളതാണ് തടസമെന്നും പറഞ്ഞു. ഇതോടെയാണ് കുഞ്ഞിനെ ഒഴിവാക്കാന്‍ ശരണ്യ തീരുമാനിച്ചത്.
കേസില്‍ പ്രതിയായതിനു ശേഷം ഏറെക്കാലം റിമാന്‍ഡില്‍ കഴിഞ്ഞ ശരണ്യ വീട്ടുകാരുമായി അകന്ന് കഴിയുകയായിരുന്നു. കേസില്‍ ജാമ്യത്തിലായിരുന്നു ശരണ്യ. കണ്ണൂരില്‍ താമസിക്കരുതെന്നായിരുന്നു ഇവരുടെ ജാമ്യ വ്യവസ്ഥ. ഇതു കാരണം കേരളത്തിന് പുറത്തായിരുന്നു താമസം. കേസിന്റെ വിചാരണയില്‍ ഹാജരാകുന്നതിനായി ഇന്നലെയാണ് ഇവര്‍ കോഴിക്കോട് വന്നത്.
