യുവതിയുമായി പരിചയത്തിലായത് വാട്‌സാപ്പിലൂടെ; പ്രണയത്തിലായതോടെ പരസ്പരം കാണാൻ മോഹം; ആദ്യം കണ്ടത് മാളിലെ പാർക്കിംഗ് ഏരിയയിൽ; പ്രായം അൽപ്പം കൂടുതലാണെങ്കിലും യുവതിക്ക് ബിരിയാണിയും ജ്യൂസും വാങ്ങി കൊടുത്തു; കൈകഴുകാൻ പോയി വന്നപ്പോൾ ആളുമില്ല, സ്‌കൂട്ടറുമില്ല; പാലക്കാട് സ്വദേശിനിയും കാമുകനും അറസ്റ്റിൽ
കൊച്ചി: വാട്‌സാപ്പിലൂടെ പരിചയപ്പെട്ട കാമുകനെ ആദ്യമായി കാണാനെത്തിയപ്പോൾ സ്കൂട്ടറും മൊബൈൽ ഫോണും മോഷ്ടിച്ച് കടന്നുകളഞ്ഞ യുവതിയും കാമുകന്റെ സുഹൃത്തും പിടിയിൽ. ഒരുമാസം നീണ്ട ചാറ്റിംഗിനൊടുവിൽ കൊച്ചിയിലെ പ്രമുഖ മാളിൽവെച്ച് കൂടിക്കാഴ്ചയ്ക്ക് എത്തിയപ്പോഴാണ് പാലക്കാട് സ്വദേശിനിയായ യുവതി ഈ തട്ടിപ്പ് നടത്തിയത്. കായംകുളം സ്വദേശിയായ 24-കാരന്റെ സ്കൂട്ടറാണ് യുവതി മോഷ്ടിച്ചത്. സംഭവത്തിൽ യുവാവ് നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിൽ സിസിടിവി ദൃശ്യങ്ങൾ കേന്ദ്രീകരിച്ചാണ് കളമശ്ശേരി പൊലീസ് പ്രതികളെ പിടികൂടിയത്.
ചോറ്റാനിക്കര സ്വദേശിനിയായ യുവതിയും പാലക്കാടുള്ള അവരുടെ ആൺ സുഹൃത്തുമാണ് അറസ്റ്റിലായത്. എറണാകുളം കൈപ്പട്ടൂർ സ്വദേശിയായ 24 വയസ്സുള്ള യുവാവിന്റെ പുതിയ സ്കൂട്ടറാണ് മോഷ്ടിക്കപ്പെട്ടത്. മൂന്ന് മാസം മുൻപ് വാങ്ങിയ സ്കൂട്ടറുമായാണ് യുവതി കടന്നുകളഞ്ഞത്. ഒരുമാസം നീണ്ടുനിന്ന വാട്‌സ്ആപ്പ് ചാറ്റിങ്ങിനൊടുവിൽ പ്രണയത്തിലായ ഇരുവരും ആദ്യമായി നേരിൽ കാണാൻ തീരുമാനിക്കുകയായിരുന്നു. ഫോട്ടോകൾ പോലും കൈമാറാതെയാണ് ഇരുവരും ചാറ്റ് ചെയ്തിരുന്നത്.
മാളിലെ പാർക്കിംഗ് ഏരിയയിൽ വെച്ച് നേരിൽ കണ്ടതിന് ശേഷം, യുവതിയുടെ നിർബന്ധപ്രകാരം യുവാവ് സ്കൂട്ടർ അല്പം മാറ്റി നിർത്തുകയായിരുന്നു. യുവതിക്ക് തന്നെക്കാൾ പ്രായമുണ്ടെന്ന് യുവാവ് അപ്പോഴാണ് തിരിച്ചറിഞ്ഞത്. തുടർന്ന് ഇരുവരും ഫുഡ് കോർട്ടിൽ കയറി യുവാവിന്റെ ചെലവിൽ ബിരിയാണിയും ജ്യൂസും കഴിച്ചു. ഭക്ഷണം കഴിച്ചതിന് ശേഷം യുവാവ് കൈകഴുകാൻ പോയ തക്കത്തിന് യുവതി സ്കൂട്ടറിന്റെ താക്കോലുമായി കടന്നുകളയുകയായിരുന്നു.
തിരിച്ചെത്തിയപ്പോൾ യുവതിയെയും സ്കൂട്ടറിനെയും കാണാതായതോടെയാണ് യുവാവിന് ചതിപറ്റി എന്ന് മനസ്സിലായത്. മാളിൽ പലയിടത്തും തിരഞ്ഞെങ്കിലും യുവതിയെ കണ്ടെത്താനായില്ല. ഇതോടെ യുവാവ് ബസിൽ കയറി വീട്ടിലെത്തി പിറ്റേദിവസം പൊലീസിൽ പരാതി നൽകുകയായിരുന്നു. ബസ് ജീവനക്കാരനായ യുവാവാണ് മൂന്ന് മാസം മുൻപ് സ്കൂട്ടർ വാങ്ങിയത്.
