ഡൽഹി: ട്രെയിൻ യാത്രയ്ക്കിടെ പഴ്‌സ് മോഷണം പോയതിനെത്തുടർന്ന് പൊലീസിൽ നിന്ന് മതിയായ നടപടി ഉണ്ടാകാത്തതിലുള്ള രോഷാകുലയായ യുവതി എ.സി കോച്ചിന്റെ ജനൽച്ചില്ല് തല്ലിത്തകർത്തു. സംഭവത്തിന്റെ ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിക്കുകയും വലിയ പ്രതിഷേധങ്ങൾക്ക് ഇടയാക്കുകയും ചെയ്തതോടെ ഇന്ത്യൻ റെയിൽവേയുടെ പ്രതികരണത്തിനായി കാത്തിരിക്കുകയാണ് ജനം.

യാത്രയ്ക്കിടെയാണ് യുവതിയുടെ പഴ്‌സ് നഷ്ടപ്പെട്ടത്. സംഭവത്തെക്കുറിച്ച് റെയിൽവേ ജീവനക്കാരിൽ നിന്നും അധികാരികളിൽ നിന്നും സഹായം ലഭിക്കാത്തതിലുള്ള നിരാശയും ദേഷ്യവുമാണ് യുവതിയെ ഇത്തരമൊരു പ്രവൃത്തി ചെയ്യാൻ പ്രേരിപ്പിച്ചത്. സാമൂഹിക മാധ്യമങ്ങളിൽ പ്രചരിക്കുന്ന വീഡിയോ ക്ലിപ്പുകളിൽ, കടുത്ത മാനസിക സംഘർഷത്തിലായിരുന്ന യുവതി എ.സി കോച്ചിന്റെ ജനൽച്ചില്ല് അടിച്ചു തകർക്കുന്ന ദൃശ്യങ്ങൾ വ്യക്തമാണ്.

യാത്രക്കാർ എത്ര നിർബന്ധിച്ചിട്ടും യുവതി പിന്മാറാൻ തയ്യാറായില്ല. ജനൽച്ചില്ല് പൊട്ടിത്തെറിച്ച് കോച്ചിനുള്ളിൽ ചിതറിത്തെറിച്ചു. ഇത് കണ്ട പ്ലാറ്റ്‌ഫോമിൽ നിന്നിരുന്ന യാത്രക്കാർ ഞെട്ടലോടെയാണ് ഈ രംഗം നോക്കിനിന്നത്. ഈ സമയത്ത് യുവതിയുടെ ചെറിയ കുഞ്ഞ് സമീപത്തുണ്ടായിരുന്നു എന്നതും ശ്രദ്ധേയമാണ്.

ഈ വീഡിയോ കണ്ടതോടെ സാമൂഹിക മാധ്യമ ഉപയോക്താക്കൾക്കിടയിൽ വലിയ പ്രതിഷേധമാണ് ഉയരുന്നത്. യുവതിയുടെ പ്രവർത്തി ഒരു അതിക്രമമാണെന്നും പൗരബോധമില്ലായ്മയാണെന്നും പലരും അഭിപ്രായപ്പെട്ടു.

എന്തു ന്യായീകരണങ്ങൾ പറഞ്ഞാലും ഈ പ്രവൃത്തിയെ അംഗീകരിക്കാനാവില്ലെന്ന് ഭൂരിഭാഗം പേരും കുറിച്ചു. എന്നാൽ, കടുത്ത മാനസിക സമ്മർദ്ദത്തിലോ വൈകാരിക അസ്ഥിരതയിലോ ആയതുകൊണ്ടാകാം യുവതി ഇങ്ങനെ പ്രതികരിച്ചതെന്നും ചിലർ അഭിപ്രായപ്പെടുന്നുണ്ട്. "ആ കുട്ടിയെ ഓർക്കുമ്പോൾ വിഷമം തോന്നുന്നു" എന്നായിരുന്നു മറ്റൊരാളുടെ പ്രതികരണം.

ഈ സംഭവം റെയിൽവേയുടെ സുരക്ഷാ സംവിധാനങ്ങളെയും യാത്രക്കാരുടെ പരാതികളോടുള്ള സമീപനത്തെയും സംബന്ധിച്ച ചോദ്യങ്ങൾ ഉയർത്തുന്നു. ഇത്തരം സംഭവങ്ങൾ ആവർത്തിക്കാതിരിക്കാൻ റെയിൽവേ കൂടുതൽ ജാഗ്രത പുലർത്തണമെന്നും യാത്രക്കാരുടെ സുരക്ഷ ഉറപ്പാക്കണമെന്നും ആവശ്യമുയർന്നിട്ടുണ്ട്. ഇതുവരെ ഇന്ത്യൻ റെയിൽവേ ഈ വിഷയത്തിൽ ഔദ്യോഗികമായി പ്രതികരിച്ചിട്ടില്ല. സംഭവത്തെക്കുറിച്ച് കൂടുതൽ അന്വേഷണം നടക്കുമോ എന്നും നടപടികൾ ഉണ്ടാകുമോ എന്നും ഉറ്റുനോക്കുകയാണ് യാത്രക്കാരും ബന്ധപ്പെട്ടവരും.

ട്രെയിൻജനൽച്ചില്ല്യുവതിഅടിച്ചുപൊട്ടിച്ചു

മറുനാടൻ മലയാളി ബ്യൂറോ