ഭർത്താവിനൊപ്പം രാത്രി നടത്തം, ഇരുട്ടിൽ കാത്തുനിന്ന് കാമുകനും സംഘവും; പ്ലാൻ നടപ്പാക്കിയതോടെ സ്വർണ്ണം ഊരി നൽകി കവർച്ചാ നാടകം; 'ഹിറ്റ് ആൻഡ് റൺ കേസ്' അന്വേഷണത്തിൽ ചുഴുളഴിഞ്ഞത് ഭാര്യയുടെ കൊലച്ചതി; ശരീരത്തിലെ ആ പാടുകൾ കള്ളം പൊളിച്ചു; കൊലപാതകത്തിൽ യുവതിയും കാമുകനും കുടുങ്ങിയത് ഇങ്ങനെ

ശ്രീഗംഗാനഗർ: രാജസ്ഥാനിലെ ശ്രീഗംഗാനഗറിൽ നടന്ന വാഹനാപകട മരണം അന്വേഷിച്ച പോലീസിനെ കാത്തിരുന്നത് ഞെട്ടിക്കുന്ന വിവരങ്ങൾ. മേഘാലയയിലെ കുപ്രസിദ്ധമായ 'ഹണിമൂൺ കൊലപാതകത്തിന്' സമാനമായ രീതിയിൽ ഭർത്താവിനെ ഭാര്യ കാമുകനെക്കൊണ്ട് കൊലപ്പെടുത്തുകയായിരുന്നു എന്ന് പോലീസ് കണ്ടെത്തി. ആഷിഷ് എന്ന യുവാവാണ് കൊല്ലപ്പെട്ടത്. സംഭവത്തിൽ ഭാര്യ അഞ്ജു (23), കാമുകൻ സഞ്ജു, ഇയാളുടെ സുഹൃത്തുക്കളായ റോക്കി, ബാദൽ എന്നിവരെ പോലീസ് അറസ്റ്റ് ചെയ്തു.

ജനുവരി 30-ന് രാത്രി ഒൻപത് മണിയോടെയാണ് ഒരു ദമ്പതികൾ റോഡിൽ അബോധാവസ്ഥയിൽ കിടക്കുന്നു എന്ന വിവരം പോലീസിന് ലഭിക്കുന്നത്. ഉടൻ തന്നെ ഇവരെ ആശുപത്രിയിൽ എത്തിച്ചെങ്കിലും ആഷിഷ് അപ്പോഴേക്കും മരിച്ചിരുന്നു. വൈകുന്നേരം നടത്തത്തിനിറങ്ങിയപ്പോൾ തിരിച്ചറിയാത്ത വാഹനം ഇടിച്ചതാണെന്നും തന്നെ ആക്രമിച്ച് ആഭരണങ്ങൾ കവർന്നുവെന്നുമാണ് അഞ്ജു പോലീസിനോട് പറഞ്ഞത്. എന്നാൽ അഞ്ജുവിന്റെ മൊഴിയിലെ വൈരുദ്ധ്യങ്ങൾ പോലീസിൽ സംശയം ജനിപ്പിച്ചു.

പോലീസിനെ സഹായിച്ച തെളിവുകൾ:

ആഷിഷിന്റെ ശരീരത്തിൽ വാഹനം ഇടിച്ചതിനേക്കാൾ ഉപരി മർദ്ദനമേറ്റ പാടുകളും ശ്വാസം മുട്ടിച്ചതിന്റെ ലക്ഷണങ്ങളും മെഡിക്കൽ റിപ്പോർട്ടിൽ കണ്ടെത്തി. എന്നാൽ അപകടത്തിൽപ്പെട്ടെന്ന് അവകാശപ്പെട്ട അഞ്ജുവിന്റെ ശരീരത്തിൽ നിസാര പരിക്കുകൾ പോലും ഉണ്ടായിരുന്നില്ല. തുടർന്ന് അഞ്ജുവിന്റെ ഫോൺ രേഖകൾ പരിശോധിച്ചപ്പോൾ അയൽവാസിയായ സഞ്ജുവുമായി ഇവർ നിരന്തരം ബന്ധപ്പെട്ടിരുന്നതായി പോലീസ് കണ്ടെത്തി.

പ്രണയവും കൊലപാതക പദ്ധതിയും:

മൂന്ന് മാസം മുൻപായിരുന്നു ആഷിഷിന്റെയും അഞ്ജുവിന്റെയും വിവാഹം. എന്നാൽ ഈ ബന്ധത്തിൽ അതൃപ്തയായിരുന്ന അഞ്ജു സ്വന്തം നാട്ടിലേക്ക് മടങ്ങിയപ്പോൾ മുൻ കാമുകനായ സഞ്ജുവുമായി വീണ്ടും അടുത്തു. ഇരുവരും ചേർന്ന് ആഷിഷിനെ വകവരുത്താൻ പദ്ധതിയിട്ടു. കൊലപാതകത്തിനായി അഞ്ജു മനഃപൂർവ്വം ആഷിഷിനെ രാത്രി നടത്തത്തിനായി വിജനമായ വഴിയിലേക്ക് കൊണ്ടുപോയി. അവിടെ ഒളിച്ചിരുന്ന സഞ്ജുവും കൂട്ടാളികളും ആഷിഷിനെ ക്രൂരമായി മർദ്ദിക്കുകയും ശ്വാസം മുട്ടിച്ച് കൊല്ലുകയുമായിരുന്നു.

സംഭവം ലൂട്ടിംഗും (കവർച്ച) അപകടവുമാണെന്ന് വരുത്തിത്തീർക്കാൻ അഞ്ജു തന്റെ കമ്മലുകളും ഫോണും കാമുകന് നൽകുകയും റോഡിൽ അബോധാവസ്ഥയിലെന്നപോലെ കിടന്ന് അഭിനയിക്കുകയും ചെയ്തു. എന്നാൽ ആഷിഷിന്റെ ശരീരത്തിലെ മുറിവുകളും അഞ്ജുവിന്റെ പരസ്പരവിരുദ്ധമായ മൊഴികളും ഗൂഢാലോചന പുറത്തുകൊണ്ടുവരാൻ പോലീസിനെ സഹായിച്ചു.