വിദേശത്തിരുന്ന് 'ഒളിച്ചുകളിച്ച' 'കൊണ്ടോട്ടി അബു' കുടുങ്ങി! ലുക്കൗട്ട് നോട്ടീസിനു പിന്നാലെ നെടുമ്പാശേരിയില് വിമാനമിറങ്ങിയപ്പോള് പോലീസ് പൊക്കി; കെ ജെ ഷൈനിനെതിരെ അശ്ലീല പ്രചാരണം നടത്തിയ യാസര് എടപ്പാള് റൂറല് സൈബര് പോലീസിന്റെ വലയില്
യാസര് എടപ്പാള് റൂറല് സൈബര് പോലീസിന്റെ വലയില്
കൊച്ചി: സിപിഎം നേതാവ് കെ.ജെ. ഷൈനിനെതിരെ അശ്ലീലച്ചുവയുള്ളതും അപകീര്ത്തികരവുമായ പ്രചാരണം നടത്തിയ കേസില് പ്രമുഖ യൂട്യൂബറും മുസ്ലീം ലീഗ് സൈബര് വിംഗിലെ സജീവ പ്രവര്ത്തകനുമായ യാസര് എടപ്പാളിനെ (കൊണ്ടോട്ടി അബു) ആലുവ റൂറല് സൈബര് ക്രൈം പോലീസ് അറസ്റ്റ് ചെയ്തു.
വിദേശത്ത് ഒളിവിലായിരുന്ന യാസറിനെതിരെ പോലീസ് നേരത്തെ ലുക്കൗട്ട് നോട്ടീസ് പുറപ്പെടുവിച്ചിരുന്നു. എന്നാല് പിടിയിലാകുമെന്ന് ഉറപ്പായതോടെ ഇന്നലെ രാത്രി നെടുമ്പാശേരി വിമാനത്താവളത്തില് എത്തിയ ഇയാളെ എമിഗ്രേഷന് വിഭാഗം തടഞ്ഞുവെക്കുകയും തുടര്ന്ന് സൈബര് പോലീസ് കസ്റ്റഡിയിലെടുക്കുകയുമായിരുന്നു. കെ.ജെ. ഷൈന് നല്കിയ പരാതിയില് ജാമ്യമില്ലാ വകുപ്പുകള് പ്രകാരമാണ് ഇയാള്ക്കെതിരെ കേസെടുത്തിരിക്കുന്നത്.
വൈപ്പിന് എംഎല്എ കെ.എന്. ഉണ്ണികൃഷ്ണനുമായി ബന്ധപ്പെടുത്തി കെ.ജെ. ഷൈനിനെതിരെ തികച്ചും മോശമായ രീതിയില് യൂട്യൂബ് ചാനലിലൂടെ പ്രചാരണം നടത്തിയതാണ് നിലവിലെ കേസ്. കേസില് മൂന്നാം പ്രതിയാണ് യാസര്. നേരത്തെ ഇതേ കേസില്, കെ.എം. ഷാജഹാന്, പ്രാദേശിക കോണ്ഗ്രസ് നേതാവ് സി.കെ. ഗോപാലകൃഷ്ണന് എന്നിവരെ പോലീസ് അറസ്റ്റ് ചെയ്തിരുന്നു. ഇവര്ക്ക് വിവരങ്ങള് കൈമാറുന്നതിലും വ്യാജ പ്രചാരണം ആസൂത്രണം ചെയ്യുന്നതിലും യാസറിന് പ്രധാന പങ്കുണ്ടെന്ന് പോലീസ് കണ്ടെത്തി.
ആവര്ത്തിക്കുന്ന കുറ്റകൃത്യങ്ങള്
2021-ല്, മുന് മന്ത്രി കെ.ടി. ജലീലിന്റെ പരാതിയില് സമാനമായ രീതിയില് അപകീര്ത്തികരമായ പോസ്റ്റുകള് ഇട്ടതിന് ഇയാളെ മുന്പ് അറസ്റ്റ് ചെയ്തിരുന്നു. രാഷ്ട്രീയ എതിരാളികളെ വ്യക്തിപരമായി അധിക്ഷേപിക്കുന്നതിനും കുടുംബജീവിതത്തെ ബാധിക്കുന്ന തരത്തിലുള്ള വ്യാജ വാര്ത്തകള് ചമയ്ക്കുന്നതിനും ഇയാള് തന്റെ സോഷ്യല് മീഡിയ പ്ലാറ്റ്ഫോമുകള് ഉപയോഗിച്ചിരുന്നതായി അന്വേഷണ സംഘം പറയുന്നു.
യാസറിന്റെ യൂട്യൂബ് ചാനലിലെ വീഡിയോകളും സോഷ്യല് മീഡിയ ചാറ്റുകളും പോലീസ് ശാസ്ത്രീയമായി വിശകലനം ചെയ്ത ശേഷമാണ് നടപടി.
