ദുബൈയില്‍ മലയാളി യുവാവ് ഷോക്കേറ്റ് മരിച്ചു; ചാലിശ്ശേരിക്കാരൻ അജ്മൽ മരിച്ചത് ഈ മാസം നാട്ടിലേക്ക് വരാനിരിക്കെ

ദുബൈ: മലയാളി യുവാവ് ദുബൈയില്‍ ഷോക്കേറ്റ് മരിച്ച സംഭവത്തിൽ ഞെട്ടലോടെ ബന്ധുക്കൾ. പാലക്കാട് കൂറ്റനാട് ചാലിശ്ശേരി ദുബൈ റോഡ് കൊളവർണിയിൽ വീട്ടിൽ അജ്മൽ (24) ആണ് മരിച്ചത്. ഇലക്ട്രീഷ്യനായി ജോലി ചെയ്ത് വരികയായിരുന്നു അജ്മൽ നാട്ടിലേക്ക് മടങ്ങാനിരിക്കെയാണ് ദാരുണമായ സംഭവമുണ്ടായത്.

ബുധനാഴ്ചയാണ് സംഭവം. കപ്പലിലെ വര്‍ക്ഷോപ്പില്‍ ജോലി ചെയ്യുന്നതിനിടെ ഷോക്കേല്‍ക്കുകയായിരുന്നെന്നാണ് പ്രാഥമിക വിവരം. ഒന്നര വര്‍ഷം മുമ്പ് സഹോദരിയുടെ വിവാഹത്തില്‍ പങ്കെടുക്കുന്നതിനായാണ് അജ്മല്‍ അവസാനം നാട്ടില്‍ വന്നത്. ഈ മാസം 30ന് നാട്ടിലേക്ക് വരാനിരിക്കെയാണ് മരണം. പിതാവ്: മാനു, മാതാവ്: സുബൈദ, സഹോദരങ്ങൾ: അസ്‌ലഹ, അഫീന, നിഷ.