പാഞ്ഞെത്തിയ ടിപ്പർ ബൈക്കിനെ മറികടക്കാൻ ശ്രമിച്ചതും അപകടം; വെമ്പായത്ത് ബൈക്ക് യാത്രികന് ദാരുണാന്ത്യം; ഭാര്യയുടെ നില അതീവ ഗുരുതരം

തിരുവനന്തപുരം: വെമ്പായത്ത് ഭാര്യയും ഭർത്താവും സഞ്ചരിച്ച ബൈക്കിൽ ടിപ്പർ ലോറി ഇടിച്ചുകയറി ഭർത്താവ് മരിച്ചു. ഭാര്യയ്ക്ക് ഗുരുതരമായി പരിക്കേൽക്കുകയും ചെയ്തു. ഇന്നലെ ഉച്ചയോടെയാണ് ദാരുണമായ സംഭവം നടന്നത്.

കണിയാപുരം ചിറ്റാറ്റുമുക്ക് സ്വദേശി റഹീം (45) ആണ് അപകടത്തിൽ മരിച്ചത്. ഇദ്ദേഹത്തിൻ്റെ ഭാര്യ നസീഹയ്ക്ക് ഗുരുതരമായ പരിക്കേറ്റിട്ടുണ്ട്. നസീഹയെ തിരുവനന്തപുരം മെഡിക്കൽ കോളേജിൽ അതീവ ഗുരുതരാവസ്ഥയിൽ തീവ്രപരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്.

ഇന്നലെ ഉച്ചയ്ക്ക് മൂന്ന് മണിയോടെയാണ് അപകടം നടന്നത്. കുടുംബ വീട്ടിലേക്ക് വരികയായിരുന്ന ദമ്പതികൾ സഞ്ചരിച്ച ബൈക്കിനെ, പോത്തൻകോട് - വെമ്പായം റോഡിൽ കൊഞ്ചിറ ചാത്തമ്പാട്ട് വച്ച് പുറകിൽ നിന്ന് വന്ന ടിപ്പർ ലോറി മറികടക്കാൻ ശ്രമിക്കുന്നതിനിടെയാണ് ഇടിച്ചത്. ലോറിയിടിച്ച് ബൈക്ക് നിയന്ത്രണം വിട്ട് റോഡിലേക്ക് മറിഞ്ഞുവീഴുകയായിരുന്നു. അപകടത്തിൽ ടിപ്പർ ലോറിയുടെ അടിയിൽപ്പെട്ട റഹീം സംഭവസ്ഥലത്ത് വെച്ച് തന്നെ മരണപ്പെട്ടു. മെഡിക്കൽ കോളേജിൽ ചികിത്സയിൽ കഴിയുന്ന നസീഹയുടെ ആരോഗ്യനില അതീവ ഗുരുതരമായി തുടരുകയാണ്.