നിയന്ത്രണം വിട്ട ഥാർ ജീപ്പ് ഇടിച്ച് സ്കൂട്ടർ യാത്രക്കാരനും വിദ്യാർഥിക്കും പരിക്ക്; സംഭവം തിരുവനന്തപുരത്ത്

തിരുവനന്തപുരം: നിയന്ത്രണം വിട്ട ഥാർ ജീപ്പ് ഇടിച്ച് സ്കൂട്ടർ യാത്രക്കാരനും വിദ്യാർഥിക്കും പരിക്ക്. പാപ്പനംകോട് എസ്റ്റേറ്റിന് സമീപം കോലിയക്കോട് ഇന്നലെ വൈകീട്ട് മൂന്നരയോടെയാണ് അപകടം നടന്നത്. അപകടത്തിൽ ട്യൂഷൻ കഴിഞ്ഞ് വീട്ടിലേക്ക് മടങ്ങുകയായിരുന്ന ജിഷ്ണു (12) എന്ന വിദ്യാർഥിക്കും പൂഴിക്കുന്ന് മടവിള സ്വദേശിയായ സ്കൂട്ടർ യാത്രക്കാരനുമാണ് പരിക്കേറ്റത്.

മലയിൻകീഴ് ഭാഗത്തേക്ക് പോകുകയായിരുന്ന ഥാർ ജീപ്പ് നിയന്ത്രണം വിട്ട് എതിരെ വന്ന സ്കൂട്ടറിലും റോഡിലൂടെ നടന്നു പോകുകയായിരുന്ന വിദ്യാർഥിയെയും ഇടിച്ചു തെറിപ്പിക്കുകയായിരുന്നു. തുടർന്ന് റോഡിൽ നിന്ന് മാറിയ ജീപ്പ് സമീപത്തെ പുരയിടത്തിലെ ഇലക്ട്രിക് പോസ്റ്റിൽ ഇടിച്ചു നിന്നു.

ഇരുവരെയും സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു. വിദ്യാർഥിയുടെ നില തൃപ്തികരമാണെന്ന് അധികൃതർ അറിയിച്ചു. ഇടിയുടെ ആഘാതത്തിൽ സ്കൂട്ടർ പൂർണ്ണമായും തകർന്നു. ഇലക്ട്രിക് പോസ്റ്റും ഒടിഞ്ഞു. മലയിന്‍കീഴ് സ്വദേശിയായ ഡോക്ടറും ഭാര്യയുമാണ് ജീപ്പിലുണ്ടായിരുന്നതെന്ന് നാട്ടുകാര്‍ പറഞ്ഞു.