പാർക്ക് ചെയ്ത കാറിനടുത്തേക്ക് നടക്കവേ അപകടം; ആറടിയോളം താഴ്ചയുള്ള ഓടയിൽ വീണ് പരിക്ക്; ഡ്രൈവറുടെ കൈയ്ക്ക് പരിക്ക്; കാലിലെ വിരലുകള്‍ക്ക് പൊട്ടൽ

കോഴിക്കോട്: സ്ലാബില്ലാത്ത ഓടയില്‍ വീണ് ടാക്‌സി ഡ്രൈവര്‍ക്ക് പരിക്ക് പറ്റി. നാദാപുരം പുറമേരി സ്വദേശി മഠത്തില്‍ ലിബീഷി(35)നാണ് ആറടിയോളം താഴ്ചയുള്ള ഓടയില്‍ വീണ് പരിക്ക് പറ്റിയത്. വടകര-നാദാപുരം സംസ്ഥാന പാതയില്‍ കക്കംവെള്ളിയില്‍ വച്ചാണ് അപകടം ഉണ്ടായത്. റോഡരികില്‍ പാര്‍ക്ക് ചെയ്ത തന്റെ വാഹനത്തിന് സമീപത്തേക്ക് നടന്നു പോകുന്നതിനിടയിലാണ് ലിബീഷ് അപകടത്തിൽപ്പെടുന്നത്.

വീഴ്ചയുടെ ആഘാതത്തില്‍ വലതു കൈയ്ക്കും കാലിനുമുള്‍പ്പെടെ പരിക്ക് പറ്റി. ആശുപത്രിയില്‍ എത്തിച്ച് സ്‌കാന്‍ ചെയ്തപ്പോള്‍ വലതു കൈയ്യിലെ പൊട്ടല്‍ സ്ഥിരീകരിക്കുകയായിരുന്നു. ഇടതു കാലിലെ വിരലുകള്‍ക്കും പൊട്ടൽ ഉണ്ട്. അപകടം നടന്ന സ്ഥലത്തെ ഓടയില്‍ ഒരിടത്തും സ്ലാബ് ഇട്ടിരുന്നില്ല. ഇതാണ് അപകടത്തിന് കാരണമായതെന്ന് നാട്ടുകാർ പറയുന്നു.