നിയന്ത്രണം വിട്ട കാർ രണ്ട് കാറിലും സ്‌കൂട്ടറിലും ഇടിച്ചു; തെറിച്ച് വീണ് സ്‌കൂട്ടർ യാത്രക്കാരിക്ക് ഗുരുതര പരുക്ക്; സ്‌കൂട്ടറിന് തീപിടിച്ചു: അപകടം കോന്നി സെന്റ് ജോർജ് വലിയ പള്ളിക്ക് സമീപം
കോന്നി: സെന്റ് ജോർജ് ഓർത്തഡോക്സ് വലിയ പള്ളിക്ക് സമീപം നിയന്ത്രണം വിട്ട കാർ രണ്ട് കാറുകളിൽ ഇടിച്ച ശേഷം സ്‌കൂട്ടർ യാത്രക്കാരിയെ ഇടിച്ച് തെറിപ്പിച്ചു. ചൊവ്വ ഉച്ചക്ക് പന്ത്രണ്ട് മണിയോടെ ആണ് സംഭവം നടന്നത്. കോന്നി മരങ്ങാട്ട് മുക്ക് സ്വദേശിയുടെ കാറാണ് ഇടിച്ചത്. അപകടത്തിൽ സ്‌കൂട്ടർ യാത്രക്കാരിയായ അരുവാപ്പുലം വയക്കര സ്വദേശിയും പോസ്റ്റ് ഓഫീസ് ജീവനക്കാരിയുമായ ഷൈനു സുസൻ ജോസി(25)ന് ഗുരുതരമായി പരുക്കേറ്റു. സ്‌കൂട്ടർ പൂർണമായി തകർന്നു. രണ്ട് കാറുകൾക്കും തകരാർ സംഭവിച്ചിട്ടുണ്ട്. അപകടമുണ്ടാക്കിയ കാർ കോന്നിയിലെ ഹോട്ടൽ ഉടമ മാണിക്യത്തിന്റെ കാറിൽ ഇടി ച്ചതിന് ശേഷം മറ്റൊരു കാറിലും സംസ്ഥാന പാതയുടെ വേലിയിൽ ഇടിച്ച് നിൽക്കുകയായിരുന്നു.
ഷൈനു സ്‌കൂട്ടറിൽ നിന്നും തെറിച്ച് റോഡിൽ വീണു. ഇടിയുടെ ആഘാതത്താൽ സ്‌കൂട്ടറിന് തീപിടിച്ചു. ഫയർഫോഴ്സ് എത്തി തീ അണച്ച് ഗതാഗത തടസം ഒഴിവാക്കുകയുമായിരുന്നു.പൊലീസ് സ്ഥലത്ത് എത്തി നടപടികൾ സ്വീകരിച്ചു. പരുക്കേറ്റ യുവതിയെ ആശുപത്രിയിൽ പ്രവേശിപ്പിച്ചു.
