കെഎസ്ആർടിസി ബസിൽ അതിക്രമം; യാത്രക്കിടെ യുവതിയെ കടന്നുപിടിച്ചു; 47 കാരനെ പോലീസ് അറസ്റ്റ് ചെയ്തു

നെടുമങ്ങാട്: കെഎസ്ആർടിസി ബസിൽ യാത്ര ചെയ്യവേ യുവതിയെ ആക്രമിച്ച മധ്യവയസ്കൻ പിടിയിൽ. ആനാട് മൂഴി ഊരാളിക്കോണം സ്വദേശി പള്ള് ഷിബു എന്ന എസ്. ഷിബു (47) വിനെയാണ് നെടുമങ്ങാട് പോലീസ് അറസ്റ്റ് ചെയ്തത്. വെള്ളിയാഴ്ച രാത്രി 8.30ന് ആറ്റിങ്ങലിൽ നിന്നും വെഞ്ഞാറമൂട് പുത്തൻപാലം വഴി നെടുമങ്ങാട്ടേയ്ക്ക് വന്ന ബസിലായിരുന്നു ഇയാൾ സഞ്ചരിച്ചത്.

ബസ് കല്ലിയോട് എത്തിയപ്പോൾ ബസിലെ യാത്രക്കാരിയെ ഇയാൾ കടന്നു പിടിച്ചതായാണ് പരാതി. സ്ത്രീ ബഹളം വച്ചതിനെ തുടർന്ന് ബസിലെ മറ്റു യാത്രക്കാർ ഇയാളെ തടഞ്ഞുവച്ച് നെടുമങ്ങാട് പൊലീസിനു കൈമാറുകയായിരുന്നു. ഷിബുവിനെ കോടതിയിൽ ഹാജരാക്കി റിമാൻഡ് ചെയ്തു. ഇയാൾക്കെതിരെ സമാന സ്വഭാവമുള്ള വേറെ കേസുകളും നിലവിലുണ്ടെന്നും പോലീസ് വ്യക്തമാക്കി.