ചെക്ക് പോസ്റ്റ് വഴി നടന്നുവന്ന യുവാവിനെ ശ്രദ്ധിച്ചു; മുഖത്ത് പരുങ്ങൽ ഭാവം; തടഞ്ഞുനിര്‍ത്തി പരിശോധിച്ചപ്പോൾ കഞ്ചാവ്; വലയിൽ കുടുങ്ങി

മാനന്തവാടി: തിരുനെല്ലി പോലീസ് സ്റ്റേഷൻ പരിധിയിൽ ഉൾപ്പെട്ട ബാവലി ചെക്ക് പോസ്റ്റ് സമീപത്ത് നിന്ന് കഞ്ചാവുമായി യുവാവ് അറസ്റ്റിലായി. തിരുനെല്ലി തോൽപ്പെട്ടി ആളൂറിലെ കണ്ണനെ (24) യാണ് തിരുനെല്ലി പോലീസും ജില്ലാ ലഹരിവിരുദ്ധ സ്ക്വാഡും ചേർന്ന് പിടികൂടിയത്. കഴിഞ്ഞ ദിവസം വൈകുന്നേരം ബാവലി പോലീസ് എയ്ഡ് പോസ്റ്റിനു സമീപം നടത്തിയ പരിശോധനയിലാണ് ഇയാൾ പിടിയിലാവുന്നത്.

കർണാടക ഭാഗത്തു നിന്നും ചെക് പോസ്റ്റ് വഴി നടന്നു പോകവെ പോലീസിനെ കണ്ട യുവാവ് പരിഭ്രമിക്കുകയായിരുന്നു. തടഞ്ഞു നിർത്തി പരിശോധിച്ചപ്പോഴാണ് ലഹരി മരുന്ന് കണ്ടെടുത്തത്. കയ്യിലുണ്ടായിരുന്ന പൊതിയിൽ നിന്ന് പതിനാല് ഗ്രാം കഞ്ചാവ് ആണ് കണ്ടെടുത്തത്.