'ഭയങ്കര..നെഞ്ചുവേദനയാണ് സാറെ..രക്ഷിക്കണം'; പ്രതിയുടെ നിലവിളി കേട്ട് ആശുപത്രിയിലെത്തിച്ചു; പിന്നാലെ മുട്ടൻ പണി; മെഡിക്കൽ കോളേജ് ഐസിയുവിൽ നിന്ന് പ്രതി ചാടിപ്പോയി; തിരച്ചിൽ ഊർജിതം

തിരുവനന്തപുരം: തിരുവനന്തപുരം മെഡിക്കൽ കോളേജ് ഐസിയുവിൽ നിന്ന് തടവുകാരൻ രക്ഷപ്പെട്ടു. കൊല്ലം ഈസ്റ്റ് പോലീസ് അറസ്റ്റ് ചെയ്ത രാജീവ് എന്ന പ്രതിയാണ് ഇന്ന് പുലർച്ചെ ഐസിയുവിൻ്റെ ജനൽ വഴി രക്ഷപ്പെട്ടത്.

നെഞ്ചുവേദനയെത്തുടർന്നാണ് പ്രതിയെ ഇന്നലെ വൈകുന്നേരത്തോടെ മെഡിക്കൽ കോളേജ് ഐസിയുവിൽ പ്രവേശിപ്പിച്ചത്. ഇന്ന് പുലർച്ചെയോടെയാണ് പ്രതി തടവിൽ നിന്ന് രക്ഷപ്പെട്ടതായി അധികൃതർ കണ്ടെത്തുന്നത്. സംഭവത്തെ തുടർന്ന് പ്രതിയെ കണ്ടെത്താനുള്ള വ്യാപകമായ തിരച്ചിൽ പോലീസ് ആരംഭിച്ചു.

ഈ സംഭവം മെഡിക്കൽ കോളേജിലെ സുരക്ഷാ വീഴ്ചയിലേക്കാണ് വിരൽ ചൂണ്ടുന്നത്. ഗുരുതരമായ കേസിൽ പ്രതിയായിരുന്നിട്ടും എങ്ങനെയാണ് പ്രതിക്ക് ഐസിയുവിലെ ജനൽ വഴി രക്ഷപ്പെടാൻ കഴിഞ്ഞതെന്നതിനെക്കുറിച്ച് പോലീസ് അന്വേഷിച്ചു വരുന്നു. പ്രതി രാജീവിനെക്കുറിച്ച് കൂടുതൽ വിവരങ്ങൾ ലഭ്യമായിട്ടില്ല. പോലീസ് തിരച്ചിൽ ഊർജിതമാക്കിയിട്ടുണ്ട്.