കൽപ്പറ്റ: ബസിൽ കാടിന് നടുവിലുള്ള റോഡിലൂടെ യാത്ര ചെയ്യുമ്പോൾ നിരവധി മനോഹരദൃശ്യങ്ങളാണ് നമ്മുടെ കണ്ണുകളിൽ പതിയുന്നത്. ആ നല്ല ഓർമ്മകൾ ഓർത്ത് വയ്ക്കാൻ നമ്മൾ ദൃശ്യങ്ങൾ പകർത്തുകയും ചെയ്യും. അങ്ങനെ ഒരു ക്യൂട്ട് വീഡിയോ ആണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്. ഓടുന്ന കെഎസ്ആർടിസി ബസിന് മുന്നിൽ കുട്ടിയാന വന്ന് എത്തിയതാണ് സംഭവം.

യാത്രക്കാർ നോക്കുമ്പോൾ ആനവണ്ടിയുടെ മുൻപിൽ തലയെടുപ്പോടെ ചേർന്ന് കുട്ടിയാനയും ഇടം പിടിച്ചിരിക്കുകയാണ്. തോൽപ്പെട്ടി വന്യജീവി സങ്കേതത്തിലാണ് കുട്ടിയാന ഓടുന്ന ബസിന് മുന്നിൽ ചാടിയത്. കാഴ്ച കണ്ടതും മനോഹര ദൃശ്യങ്ങൾ പകർത്താൻ യാത്രക്കാരുടെ തിക്കും തിരക്കുമായി. യാത്രക്കാർ തന്നെയാണ് കുട്ടിയാനയുടെ വീഡിയോ ചിത്രീകരിച്ചത്.

തിരുനെല്ലി തെറ്റ് റോഡിൽ നിന്നുളള ദൃശ്യങ്ങൾ ഇപ്പോൾ നവമാധ്യമങ്ങളിൽ വൈറലാണ്. വണ്ടി മുന്നോട്ടെടുക്കാനായി ശ്രമിക്കുമ്പോൾ കുട്ടിയാന ടയറിന് മുന്നിലേക്ക് കയറി നിൽക്കാൻ ശ്രമിക്കുന്നതും ദൃശ്യങ്ങളിൽ കാണാം. ഒടുവിൽ ബസ് മുന്നോട്ടെടുത്ത് നീങ്ങിയപ്പോൾ ആനക്കുട്ടി വണ്ടിക്ക് പിറകേ ഓടുന്നതും ദൃശ്യങ്ങളിൽ കാണാം. ദൃശ്യങ്ങൾ ഇപ്പോൾ സോഷ്യൽ മീഡിയയിൽ വൈറലാണ്.

കുട്ടിയാനവൈറൽവീഡിയോ

സ്വന്തം ലേഖകൻ