പാലക്കാട് നിയന്ത്രണം വിട്ട് കാർ അപകടത്തിൽപ്പെട്ടു; ഡ്രൈവർ കാറിൽ നിന്നും ഇറങ്ങിയോടി; പരിശോധനയിൽ കണ്ടെടുത്തത് നിരോധിത പുകയില ഉൽപന്നങ്ങളുടെ വൻശേഖരം
ചെർപ്പുളശ്ശേരി: പാലക്കാട് നിയന്ത്രണം വിട്ട് അപകടത്തിൽപെട്ട കാറിൽ നിന്നും പിടിച്ചെടുത്തത് നിരോധിത പുകയില ഉൽപന്നങ്ങളുടെ വൻശേഖരം. വ്യാഴാഴ്ച രാവിലെ 6 മണിയോടെയായിരുന്നു സംഭവം. ഒറ്റപ്പാലം റോഡിൽ പത്താംമൈലിൽ കാറ് അപകടത്തിൽപ്പെട്ടത്.
അപകടം പറ്റിയ ഉടനെ ഡ്രൈവർ കാറിൽ നിന്നും ഇറങ്ങി ഓടുകയായിരുന്നു. സംശയം തോന്നിയ നാട്ടുകാർ പോലീസിൽ വിവരമറിക്കുകയായിരുന്നു. തുടർന്ന് പോലീസെത്തി നടത്തിയ പരിശോധനയിലാണ് 18000 പാക്കറ്റ് ഹാൻസ് തുടങ്ങിയ നിരോധിത ഉൽപന്നങ്ങൾ 22 ചാക്കുകളിലായി കണ്ടെത്തിയത്.
കെ.എൽ 56 ഡി 9573 നമ്പറിലുള്ള വാഹനമാണ് അപകടത്തിൽ പെട്ടത്. ഒറ്റപ്പാലം സ്വദേശിയുടെ പേരിലാണ് വാഹനം. സംഭവത്തിൽ കേസെടുത്ത് പോലീസ് അന്വേഷണം ആരംഭിച്ചിട്ടുണ്ട്. കടകളിൽ വിതരണത്തിനായി കൊണ്ടുവന്നതാകാമെന്നാണ് പോലീസിന്റെ പ്രാഥമിക നിഗമനം.
