പയർ വള്ളിയിലേക്ക് നിമിഷ നേരം കൊണ്ട് തീആളിക്കത്തി; പ്രദേശത്തെ പരിഭ്രാന്തിയിലാക്കി മുഴുവൻ പുക; ഏക്കർ കണക്കിന് തോട്ടം കത്തിനശിച്ചു

കാസർകോട്: കാസർകോട് ജില്ലയിലെ വെള്ളരിക്കുണ്ടിലുള്ള വിമല എസ്റ്റേറ്റിൽ വൻ തീപിടുത്തം. ഉച്ചയ്ക്ക് 12 മണിയോടെയാണ് തീപിടുത്തമുണ്ടായത്. ഏക്കർ കണക്കിന് റബ്ബർ തോട്ടത്തിലേക്ക് തീ പടർന്നുപിടിച്ചത് വലിയ നാശനഷ്ടങ്ങൾക്ക് കാരണമായി.

റബ്ബർ മരങ്ങൾ മുറിച്ചുമാറ്റിയ പ്രദേശത്തെ പയർ വള്ളികളിലേക്കാണ് ആദ്യം തീ പടർന്നതെന്നാണ് പ്രാഥമിക നിഗമനം. വിവരമറിഞ്ഞയുടൻ കുറ്റിക്കോലിൽ നിന്ന് ഫയർ ഫോഴ്‌സ് സംഘമെത്തി തീ അണയ്ക്കാനുള്ള ശ്രമങ്ങൾ ആരംഭിച്ചു. മണിക്കൂറുകൾ നീണ്ട പരിശ്രമത്തിനൊടുവിൽ അഗ്നിരക്ഷാ സേന തീ പൂർണമായും നിയന്ത്രണ വിധേയമാക്കി. വെള്ളരിക്കുണ്ട് പോലീസും റവന്യൂ വകുപ്പ് ഉദ്യോഗസ്ഥരും സ്ഥലത്തെത്തി സ്ഥിതിഗതികൾ വിലയിരുത്തി.

വേനൽക്കാലത്ത് ഈ മലയോര മേഖലയിൽ ഇടയ്ക്കിടെ തീപിടുത്തങ്ങൾ ഉണ്ടാകുന്നത് പതിവാണ്. ദുർഘടമായ ഭൂപ്രകൃതി കാരണം അഗ്നിരക്ഷാ സേനയ്ക്ക് കൃത്യസമയത്ത് എത്തിച്ചേരാൻ പ്രയാസമാണെന്നതും രക്ഷാപ്രവർത്തനത്തിന് വെല്ലുവിളിയാകാറുണ്ട്. വെള്ളരിക്കുണ്ടിൽ ഒരു ഫയർ സ്റ്റേഷൻ വേണമെന്ന ആവശ്യം നാട്ടുകാർ വർഷങ്ങളായി ഉന്നയിക്കുന്നുണ്ടെങ്കിലും ഇതുവരെ നടപടിയായിട്ടില്ല.

തുടർച്ചയായ അഗ്നിബാധകളും രക്ഷാപ്രവർത്തനത്തിനുള്ള കാലതാമസവും ഈ പ്രദേശത്തെ ജനങ്ങൾക്ക് കടുത്ത ആശങ്കയുണ്ടാക്കുന്ന വിഷയമാണ്, ഇത് പ്രദേശത്ത് ഫയർ സ്റ്റേഷൻ എന്ന ആവശ്യത്തിന് കൂടുതൽ പ്രസക്തി നൽകുന്നു.